Mu itangazo UEFA yashyize hanze kuri uyu wa Mbere, tariki ya 16 Ugushyingo 2026, yavuze ko yasabye Diallo kwiyamamariza kuyobora FIFA, ndetse ko abanyamuryango bayo bose uko ari 55 bemeranyije kumushyigikira.

Iyi mpuzamashyirahamwe yatangaje ko Diallo yemeye ubwo busabe, ariko kandidatire ye ikazemezwa ku mugaragaro mu nama y’Ishyirahamwe ry’Umupira w’Amaguru mu Bufaransa iteganyijwe ku wa Kabiri.

Abifuza guhatanira kuyobora FIFA bafite kugeza ku wa Gatatu, tariki ya 18 Ugushyingo 2026, kugira ngo babe batanze kandidatire zabo.

Philippe Diallo w’imyaka 63 ni umuhungu w’Umunya-Sénégal wabaye umukinnyi w’iteramakofe ukomeye. Yatangiye kuyobora Ishyirahamwe ry’Umupira w’Amaguru mu Bufaransa muri Mutarama 2023, asimbuye Noël Le Graët wari weguye nyuma y’ibibazo bitandukanye byamuvuzweho.

Diallo wavukiye mu Mujyi wa Saint-Nazaire mu Burengerazuba bw’u Bufaransa, yabanje kuyobora FFF by’agateganyo, mbere yo gutorerwa izi nshingano muri Kamena 2023 ku majwi menshi.

Mu Ukuboza 2024, yongeye gutorerwa kuyobora iri shyirahamwe muri manda nshya y’imyaka ine.

UEFA imaze amezi ihanganye na Infantino

Kuva muri Nyakanga 2026, UEFA iyobowe n’Umunya-Slovénie Aleksander Čeferin yatangiye kugaragaza kutavuga rumwe na Gianni Infantino, nyuma y’uko uyu muyobozi wa FIFA agaragaje umushinga wo kugurisha imigabane ijyanye n’ubucuruzi bw’Igikombe cy’Isi ku bashoramari bigenga.

Uyu mushinga wateje impaka zikomeye mu mupira w’amaguru, bituma Infantino awukuraho nyuma y’igihe gito awutangaje.

Nubwo yawuhagaritse, UEFA yakomeje kugaragaza kutishimira imiyoborere ye, ndetse yitabaza urukiko rwo muri Leta ya Florida muri Leta Zunze Ubumwe za Amerika, ishaka ibimenyetso byashobora gushingirwaho mu gutanga ikirego mu Busuwisi ku birego bishoboka by’imicungire mibi ifite aho ihuriye n’ibyaha.

UEFA yari imaze amezi ishakisha umukandida ukomeye washobora guhangana na Infantino mu matora ateganyijwe ku wa 18 Werurwe 2027, mu Nama Nkuru ya FIFA izabera i Rabat muri Maroc.

Mu bari batekerejweho harimo Victor Montagliani uyobora Impuzamashyirahamwe y’Umupira w’Amaguru muri Amerika ya Ruguru, iyo Hagati no mu Birwa bya Caraïbes (CONCACAF).

Uyu Munya-Canada yaje gutangaza ko azongera kwiyamamariza kuyobora CONCACAF, bituma UEFA ikomeza gushaka undi mukandida.

Ku rundi ruhande, Impuzamashyirahamwe y’Umupira w’Amaguru muri Aziya (AFC), ifite abanyamuryango 47, yatangaje mu kwezi gushize ko izashyigikira Infantino kugira ngo yongere gutorerwa kuyobora FIFA. Ni mu gihe kandi n’amashyirahamwe 54 agize CAF ashyigikiye uyu muyobozi.

Muri Nzeri 2026, Philippe Diallo yari yatangaje ko Ishyirahamwe ry’Umupira w’Amaguru mu Bufaransa ritazongera gushyigikira Infantino mu matora.

Icyo gihe yavuze ko icyizere bari baragiriye Perezida wa FIFA cyatatiwe, ndetse ko uburyo imiyoborere y’umupira w’amaguru ku Isi itegurwa butakijyanye n’indangagaciro bashyigikiye.

Kuba UEFA ihisemo gushyigikira Diallo bishobora gutuma amatora ya FIFA yo mu 2027 arushaho gukomera, cyane ko Infantino yari amaze igihe ahanganye n’abatavuga rumwe n’imiyoborere ye.

Gianni Infantino, wahoze ari Umunyamabanga Mukuru wa UEFA, ayobora FIFA kuva mu 2016, ubwo yatorerwaga gusimbura Sepp Blatter.