Ni mu mukino wabaye mu mpera z’icyumweru gishize ku wa Gatandatu, tariki ya 31 Mutarama 2026, ubwo imikino yo mu Cyiciro cya Gatatu yakinwaga mu bice bitandukanye by’igihugu.

Abakinnyi ba TFEP bakiniraga vakiniraga ku kibuga cyabo, binjiye mu mukino mbere ndetse buri kanya bakagerageza amahirwe bashaka igitego hakiri kare, ariko ubwugarizi bwa Muhisimbi bukomeza kubabera ibamba.

Iyi kipe na yo yageze aho yinjira muri uyu mukino waranzwemo ishyaka, dore ko TFEP yabuze n’ibitego bibiri yari yashyize mu izamu ariko byombi abasifuzi bakemeza ko bari baraririye.

Umutoza wungirije wa Muhisimbi FC, Habumugisha Eugène, yagaragarije IGIHE ibyishimo byo gukura inota rimwe kuri TFEP kuko andi makipe yose nta yabashije gukura inota ku kibuga cyayo.

Ati “Iki kibuga turi muri bake babashije kukivanaho inota rimwe, andi makipe ahatsindirwa byinshi. Mu rugo twari twarabatsinze 3-0, ndetse twaje benshi bavuga ko dutsindwa 6-0.”

“Ni yo mpamvu twishimiye kunganya, umwaka ushize twitwaye neza mu mikino ya kamarampaka, kandi n’ubu turiteguye kuko twifuza kuzamura ikipe yacu mu cyiciro cya kabiri.”

Habumugisha yongeyeho ko nubwo Muhisimbi FC ari ubwa gatatu iri gukina mu Cyiciro cya Gatatu, abana bo mu irerero rya TFEP bakina neza mu gihe cy’umwaka umwe, nibaramuka bakomeje batyo ntibizatinda ko bazamuka mu Cyiciro cya Kabiri.

TFEP yabonye itike yo gukina imikino ya kamarampaka nyuma yo kuzamuka iyoboye itsinda rya Zone y’Amajyaruguru n’amanota 21, mu gihe ikurikiwe na Muhisimbi FC ifite amanota 20.

Rutahizamu wa TFEP, Yangiriyeneza Erirohe, ni we wasoje imikino yo muri Zone y’Amajyaruguru afite ibitego byinshi, kuko mu mikino 10 yinjije ibitego 12 anatanga indi mipira itatu ivamo ibindi.