Uyu mukino wa UEFA Nations League wabaye ku mugoroba ku wa Gatandatu, tariki ya 14 Ugushyingo 2026, kuri Estádio Municipal de Braga, wari uwa mbere Portugal ikinnye kuva Ronaldo w’imyaka 41 atangaje ko asezeye mu Ikipe y’Igihugu, nyuma y’imyaka 23 ayikinira.

Mbere y’uko utangira, abakinnyi bose ba Portugal n’abana babaherekeje binjiye mu kibuga bambaye imyambaro yanditseho izina rya Ronaldo na nimero 7 yari asanzwe yambara.

Abafana bari buzuye stade na bo bazamuye icyapa cyanditseho amagambo agira ati “Obrigado, Capitão”, bisobanuye ngo “Warakoze, Kapiteni”, aherekejwe n’amafoto agaragaza Ronaldo ateruye ibikombe yatwaranye na Portugal.

Ku munota wa karindwi w’umukino, abafana bongeye gukomera amashyi uyu mukinnyi, mu rwego rwo kumushimira ibyo yakoreye igihugu cye.

Ibyishimo by’abafana ba Portugal byaje gusimburwa n’agahinda ubwo Danemark yatangiraga kuyinyagira ibitego.

Ku munota wa 43, Pierre-Emile Højbjerg yafunguye amazamu kuri penaliti yatanzwe nyuma y’uko umupira ukoze ku kuboko kwa Rúben Dias mu rubuga rw’amahina, umusifuzi akemeza icyo cyemezo yifashishije VAR.

Mu gice cya kabiri, Rasmus Højlund yatsinze igitego cya kabiri ku munota wa 49, nyuma yo guhabwa umupira akawukina atawugaritse.

Uyu rutahizamu wa Napoli yongeye kunyeganyeza inshundura ku munota wa 57, atsinda igitego cya gatatu cya Danemark, nyuma yo gucenga myugariro wa Portugal akarekura ishoti rikomeye.

Joachim Andersen yashyizemo igitego cya kane ku munota wa 75, atsindishije umutwe umupira wari uvuye kuri coup-franc yatewe na Mathias Jensen.

Portugal yabonye igitego cy'impozamarira mu minota y'inyongera, ku munota wa 90+3, gitsinzwe na Bernardo Silva.

Iyi ntsinzi ya Danemark yahagaritse urugendo rwa Portugal yari imaze gutsinda imikino ine ibanza muri UEFA Nations League, ndetse uba umukino wa mbere itsinzwe kuva Jorge Jesus agizwe umutoza wayo.

Nubwo yatsinzwe, Portugal yagumye ku mwanya wa mbere mu Itsinda A4 n'amanota 12, ikurikiwe na Danemark ifite icyenda, Norvège ifite atandatu na Pays de Galles ifite atatu.

Portugal yamaze kubona itike ya ¼ cy’irangiza, mu gihe Danemark izakenera nibura kunganya na Norvège mu mukino wa nyuma w'amatsinda kugira ngo na yo ikomeze.

Portugal izasura Pays de Galles ku wa Kabiri, tariki ya 17 Ugushyingo 2026, mu gihe Danemark izakira Norvège.

Cristiano Ronaldo yasezeye mu Ikipe y’Igihugu nyuma yo kuyikinira imikino 234, agatsinda ibitego 146, akaba yarayifashije kwegukana Igikombe cy’u Burayi cya 2016 ndetse na UEFA Nations League mu 2019 na 2025.

Gusezera kwe kwaje nyuma yo kutumvikana n'umutoza Jorge Jesus ku bijyanye no kudashyirwa mu bakinnyi babanza mu kibuga, ibintu byakurikiwe n'ibihano yari yafatiwe n'Ishyirahamwe ry'Umupira w'Amaguru muri Portugal.