Amakuru atangazwa n’ibitangazamakuru bitandukanye byo mu Bwongereza avuga ko nubwo nta cyemezo cya nyuma kirafatwa, hari icyizere kigenda cyiyongera ko Carrick ashobora kwirukanwa muri iki kiruhuko cy’imikino mpuzamahanga y’amakipe y’ibihugu.

Nyuma yo gutsindwa na Bournemouth ibitego 3-0 ku wa 25 Ukwakira 2026, ubuyobozi bwa Manchester United bwari bwafashe icyemezo cyo guha uyu mutoza w’imyaka 45 andi mahirwe, mbere yo kongera gusuzuma umusaruro we mu Ugushyingo.

Gusa kunganya na Aston Villa ibitego 4-4 ku Cyumweru byatumye igitutu gikomeza kwiyongera, kuko Manchester United imaze gutsinda umukino umwe gusa mu 10 ya Premier League.

Ni umusaruro mubi iyi kipe itaherukaga kugira mu mikino ibanza ya Shampiyona kuva mu mwaka w’imikino wa 1986/87, ni ukuvuga mu myaka 40 ishize.

Kuri ubu, Manchester United iri ku mwanya wa 18, irusha Crystal Palace ya nyuma inota rimwe gusa. Imaze kandi kwinjizwa ibitego 19 muri Premier League, aho amakipe abiri gusa ari yo yinjijwe byinshi kuyirusha.

Biteganyijwe ko Umuyobozi Mukuru wa Manchester United, Omar Berrada, n'ushinzwe ibikorwa by’umupira w'amaguru, Jason Wilcox, bashobora gusaba Sir Jim Ratcliffe n'umuryango wa Glazer kwirukana Carrick.

Uyu mutoza yananiwe guhindura ibintu nubwo yahawe andi mahirwe, aho mu mikino itatu iheruka yatsinzemo umwe, anganya umwe ndetse atsindwa undi.

Ibibazo by'imvune z'abakinnyi barimo Benjamin Šeško, Amad Diallo na Luke Shaw, hamwe n'ubwugarizi bukomeje kwinjizwa ibitego byinshi, biri mu byagoye Carrick.

Uyu mutoza yanatangiye kutumvikana na bamwe mu bakinnyi be, barimo Bruno Fernandes wanenze amayeri ye nyuma yo gutsindwa na Como ibitego 4-1 muri UEFA Champions League.

Mu gihe Carrick yaba yirukanwe, Manchester United ishobora gushaka umusimbura mu batoza barimo Eddie Howe, Julian Nagelsmann, Antonio Conte na Mauricio Pochettino.

Bivugwa ko Pochettino utoza Ikipe y'Igihugu ya Leta Zunze Ubumwe za Amerika, yiteguye gusuzuma amahirwe yo kujya muri Manchester United.

Muri uyu mwaka w’imikino, Manchester United imaze gutsinda imikino itatu gusa muri 15 yakinnye mu marushanwa yose, ibintu bishobora gutuma Carrick atakaza akazi ke.