Real Madrid ni yo yabonye uburyo bwa mbere bukomeye muri uyu mukino ku mupira uremereye watewe na Toni Kroos ku munota wa 28, umunyezamu Yann Sommer awushyira muri koruneri.

Nyuma y’iminota ine, ubwugarizi bwa Real Madrid bwananiwe gukuraho umupira wazamukanywe n’abakinnyi ba Borussia Moenchengladbach, Alassane Plea awutanga kuri Marcus Thuram wafunguye amazamu nyuma yo gusiga Lucas Vasquez.

Ku munota wa 37, Real Madrid yongeye kubona uburyo bwiza bwo kwishyura, umupira watewe na Marco Asensio ushyirwa muri koruneri n’umunyezamu mu gihe Vasquez yateye ishoti ryakoze gato kuri Raphaël Varane mbere yo gusubizwa inyuma n’igiti cy’izamu habura amasegonda make ngo amakipe yombi ajye kuruhuka.

Ikipe y’umutoza Zinedine Zidane yatangiye igice cya kabiri inyotewe no kwishyura, ariko yongera guhusha igitego ku mupira Federico Valverde yahereje Vinicius Junior wateye ishoti rigaca ku ruhande gato.

Umupira wahinduwe uturutse mu ruhande rw’iburyo ku munota wa 57, ni wo wavuyemo igitego cya kabiri cya Borussia Moenchengladbach nyuma y’ko wabanje gukorwaho na Alassane Plea wawuteye mu izamu, umunyezamu Courtois awugaruye usanga Marcus Thuram wari uhagaze neza, awushyuira mu nshundura.

Byasabye Real Madrid gutegereza umunota wa 87, ibona igitego cya mbere cyo kwishyura cyatsinzwe na Karim Benzema ku mupira wasibijwe mu kibuga na Casemiro n’umutwe.

Iminota ine yongereweho ni yo yarokoye Real Madrid, Casemiro ayitsindira igitego cya kabiri cyo kwishyura habura umunota umwe n’amasegonda 16 ngo umukino urangire, ku mupira yahawe na Sergio Ramos n’umutwe nyuma yo guterwa mu izamu na Luka Modrić.

Undi mukino wabaye muri iri tsinda warangiye Shakhtar Donetsk inganyije na Inter Milan ubusa ku busa, iyobora itsinda B n’amanota ane mu gihe Real Madrid ifite inota rimwe, andi makipe akagira amanota abiri.

Umukino utegerejwe kuri uyu wa Gatatu ni uwo mu itsinda G uhuza Juventus na FC Barcelone mu Butaliyani guhera saa yine z’ijoro.

Juventus irawakira idafite rutahizamu wayo ngenderwaho, Cristiano Ronaldo wongeye gusanganwa Coronavirus mu gihe FC Barcelone yizeye ko Lionel Messi ashobora kwigaragaza kuri uyu wa Gatatu.

Juventus y’umutoza Pirlo, iraba idafite kandi abarimo Giorgio Chiellini na Matthijs de Light mu gihe Weston McKennie na we ashobora kudakina uyu mukino.

Pirlo ategereje kumenya niba Leonardo Bonucci na Paolo Dybala bameze neza ku buryo bakina.

FC Barcelone, yo iraza kuba idafite Gérard Piqué ufite ikarita itukura mu gihe Marc-André ter Stegen, Samuel Umtiti na Philippe Coutinho bafite imvune.

Imikino yabaye ku wa Kabiri

Itsinda A

-* Lokomotiv Moscow 1-2 Bayern Munich
-* Atlético Madrid 3-2 Salzburg

Itsinda B

-* Shakhtar Donetsk 0-0 Inter
-* Borussia Moenchengladbach 2-2 Real Madrid

Itsinda C

-* FC Porto 2-0 Olympiacos
-* Marseille 0-3 Manchester City

Itsinda D

-* Atalanta 2-2 Ajax
-* Liverpool 2-0 FC Midtjylland

Imikino iteganyijwe ku wa Gatatu

Itsinda E

-* FC Krasnodar vs Chelsea (19:55)
-* Sevilla vs Rennes

Itsinda F

-* Borussia Dortmund vs Zenit St. Petersburg
-* Club Brugge vs Lazio

Itsinda G

-* Ferencvaros vs Dynamo Kyiv
-* Juventus vs FC Barcelone

Itsinda H

-* Istanbul Basaksehir vs Paris Saint-Germain (19:55)
-* Manchester United vs RasenBallsport Leipzig

Hai