Kuri uyu wa 24 Ukwakira 2026 ni bwo amakipe yombi yakinnye imikino yo kwishyura, yombi yabereye hanze y'u Rwanda.

APR FC yari yatsindiwe mu rugo igitego 1-0, yari i Cairo mu Misiri aho yari yakiriwe na Zamalek SC mu mukino wo kwishyura wa CAF Champions League wabereye kuri Cairo International Stadium.

Igitego cyo ku munota wa mbere, cyinjijwe na Ahmed Sherif, cyari gihagije ngo APR FC isezererwe dore ko ari ko iminota 90 yarangiye, igiteranyo kiba ibitego 2-0 mu mikino ibiri.

Ku rundi ruhande i Maputo, Rayon Sports na yo yasabwaga gukora ibisa n'ibitangaza nyuma yo gutsindirwa mu rugo na Black Bulls ibitego 2-0 mu mukino ubanza.

Kuri uyu wa Gatandatu, iyi kipe yambara ubururu n'umweru yigaruriye icyizere mu gice cya mbere, yinjiza igitego cyatsinzwe na Iradukunda Elie Tatou ku munota wa 19.

Black Bulls yari imbere y'abafana bayo, yishyuye ku munota wa 49 ku gitego cyatsinzwe na Crimildo Anuário Massuanganhe nyuma yo guhererekanya neza kwa bagenzi be.

Muderi Akbar yongeye kuzamura icyizere cy'abakunzi ba Rayon Sports atsinda igitego cya kabiri ku munota wa 85, ariko ikosa ryakozwe n'umunyezamu Dande Junior wakuyeho umupira nabi ku munota wa 87, rivamo igitego cyo kwishyura cyatsinzwe na Alírio Cuna.

Umukino warangiye amakipe yombi anganyije ibitego 2-2, Rayon Sports isezererwa ku giteranyo cy'ibitego 4-2.