00:00:00 IGIHE NETWORK KN KINYARWANDA EN ENGLISH FR FRANCAIS

Urugo rwa Apôtre Bizimana na Apôtre Mukabadege rugeze mu marembera

Yanditswe na

Emma-Marie Umurerwa

Kuya 27 Mutarama 2016 saa 12:45
Yasuwe :

Ubujura, gucana inyuma, kurwana, gusahura umutungo w’urugo, kubeshya ko basengera abarwayi bagakira,gushinjanya ibinyoma n’ibindi bitandukanye, ni byo bivugwa hagati ya Apôtre Bizimana Abrahim n’umugore we Apotre Mukabadege Liliane.

Nyuma y’imyaka itanu basezeranye kubana nk’umugore n’umugabo, Apôtre Bizimana na Mukabadege, umuhanuzi akaba n’umushumba w’Itorero Umusozi w’Ibyiringiro riherereye ku Kimisagara mu Karere ka Nyarugenge aho bita ku Ntaraga, kuri ubu amakimbirane no guterana amagambo nibyo birangwa hagati yabo.

Umugabo ashinja umugore uburiganya, kwiyitirira ibitangaza atakoze, gusahura umutungo w’urugo,kwiteza inshinge zibuza kubyara n’ibindi bitandukanye. Umugore akavuga ko umugabo ari umupagani yamuhozaga ku nkeke, yamukubitaga, yamushyiragaho iterabwoba n’ibindi byinshi.

‘Umugore wananiranywe n’abagabo babiri si jye wamushobora’

Bizimana Ibrahim avuga ko yashatse Mukabadege amaze gutandukana n’abagabo babiri. Ati “Namushatse ndi uwa gatatu, muri abo bagabo harimo n’uwo babyaranye umwana umwe. Uwananiranye n’abo bagabo bose sijye wamushobora.Njye twashakanye mfite abana bane, nabyaranye n’umugore tutigeze dusezerana mu buryo bwemewe n’amategeko.”

Nk’uko akomeza abivuga, ngo nubwo yari amaranye imyaka itanu na Mukabadege, yari yaranze nkana kumubyarira. Ati “Umugore yanze kubyara ku bushake, yiteza inshinge zituma atabyara, mfite ibimenyetso ko hari n’inda yakuyemo abishaka.”

Umugabo avuga ko umugore we yamufungishije tariki ya 3 Gicurasi 2014, amushinja kurya amafaranga y’abakirisitu bo ku ishami ry’iri Torero riherereye i Runda mu Karere ka Kamonyi, ubwo yababwiraga ko agiye gushinga ‘Compassion’ mu mwaka wa 2014, afungurwa tariki ya tariki 19 Gicurasi muri uwo mwaka.

‘Umugore yaramfungishije, arashaka kunyica’

Bizimana avuga ko umugore we adashobotse, ngo kubana na we ni ukwihambira. Ati “Umugore wanjye yaramfungishije, anshinja ibinyoma kuko azi ko ubutekamutwe bwe bwose mbuzi. Yigeze no gushaka kundogera mu biryo abakozi barabimbwira. Nzi uburyo ashuka abantu ko akora ibitangaza, akagenda akazana abantu ari bwishyure amafaranga bakigira abasazi yabarambikaho ibiganza bakigira nk’aho bakize.Namugiriye inama yo kureka uburyarya arananira.”

‘Yangiriraga ishyari kuko Imana inkoresha we ntimukoreshe’

Mu kiganiro Apôtre Mukabadege Liliane yagiranye na IGIHE yavuze ko ibyo umugabo we avuga byose ari ibinyoma kandi ko yamubwiye ko agiye kumusebya.

Yagize ati “Mu myaka itanu yose tumaranye, nta mahoro nigeze ngira. Yarankubitaga nkaryumaho ngashinyiriza.Ahubwo yangiriraga ishyari kuko Imana inkoresha imirimo n’ibitangaza, we ntimukoreshe.”

Ahakana yivuye inyuma ko atigeze amufungisha, ahubwo yafungishijwe n’abo yaririye amafaranga.

Ati “Yambwiye ko azansebya mu Rwanda no mu mahanga, ibyo yirirwa avuga byose mu itangazamakuru ni ibinyoma kandi yarabinteguje. Arambeshyera ngo natandukanye n’abagabo babiri kandi ni umwe, ubu se ko ntavuga ko afite abana yirirwa abyara hirya no hino yarangiza akavuga ko afite abana bane gusa, kandi afite abana icyenda. Kuba tutarabyaranye si ubushake bwanjye nkunda abana cyane n’abe ni jye wabareraga kandi neza.”

Ba Apôtre Bizimana na Mukabadege barapfa iki?

Iyo uganiriye na Bizimana ndetse na Mukabadege, icyo bombi bahurizaho ni uko imvano y’ubushyamirane bafitanye ari umutungo.Umugore avuga ko umutungo wose bafite ari uw’Itorero Umusozi w’Ibyiringiro, umugabo akavuga ko umutungo bafite ari uw’urugo.

Apôtre Bizimana yagize ati “Umugore twasezeranye ivangamutungo w’umuhahano. Tubana, Itorero ntiryari rifite Urusengero,ariko ubu rifite urusengero ku Kimisagara. Urwo rusengero ni urwanjye, kuko mfite ibimenyetso by’uko rwubatswe n’umutungo wanjye.”

Apôtre Mukabadege avuga ko umugabo we yamusabye ko basenya urusengero. Ati “Yarambwiye ngo nindeke ahari Itorero ryacu tuhahindure ikinamba ngo kuko haboneka abakiriya. Ndamubwira ngo ntabwo namera nka Ananiya na Safira ngo ndye umutungo w’Abakirisitu, sinabikora.”

Apotre Bizimana avuga ko yihanganiye umugore we Apotre Mukabadege igihe kirekire, ariko ngo aho bigeze arananiwe. Iyo umubajije niba nta bwiyunge bushobora kubaho ngo bongere babane, cyangwa se inshuti zabo za hafi zirimo na Apotre Paul Gitwaza wabimitse, asubiza agira ati “Gitwaza ntabwo ari inshuti y’umuryango ni inshuti y’Itorero. Ntabwo rero yatwunga ngo bishoboke.”

Apôtre Mukabadege we ntiyerura ngo avuge ko adashaka gusubirana n’umugabo we, dore ko ngo yamenyereye kwihangana, ariko kuko umugabo yatanze ikirego asaba gatanya, ategereje ko baburana.

Apotre Gitwaza ni we wabimitse
Apôtre Mukabadege Liliane
Apôtre Bizimana Abrahim
Apotre Bizimana ahabwa inkoni y'ubushumba

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .