Urugendo rwa Kaminuza zo mu Rwanda mu kwigisha hifashishijwe ikoranabuhanga

Yanditswe na Ishimwe Alain
Kuya 21 Nzeri 2020 saa 03:02
Yasuwe :
0 0

Kuva icyorezo cya Coronavirus cyakwaduka ku Isi, zimwe muri kaminuza zari zisangwanywe gahunda yo kwiga hifashishijwe ikoranabuhanga zakajije umurego, mu gihe izitari zakitabira iyo gahunda zarushijeho kuyijyamo dore ko ibikorwa bihuriza abantu benshi hamwe byahagaritswe, bityo na kaminuza zigafunga imiryango mu rwego rwo kwirinda ikwirakwira ry’icyorezo cya Coronavirus.

Zimwe muri kaminuza zigenga mu Rwanda, zabwiye IGIHE ko zitasigaye inyuma muri uru rugendo ruganisha ku gutanga ubumenyi hifashishijwe ikoranabuhanga, aho bashyizeho uburyo bwa ‘blending Learning’ bwo kwigira kuri murandasi, mu gihe amasomo ajyanye n’ubumenyingiro nayo azatangwa ubwo abanyeshuri bazaba basubiye ku ishuri.

IGIHE yaganirije bamwe mu bayobozi b’amashuri makuru na za kaminuza zigenga mu Rwanda, kugira ngo bagaragaze aho bageze bubaka uburyo bw’ikoranabuhanga buzababashisha gukomeza gutanga uburezi mu bihe bya Coronavirus na nyuma yayo, ndetse n’imbogamizi bahura nazo by’umwihariko muri ibi bihe bya Coronavirus.

Umuyobozi Wungirije wa Kaminuza yigenga ya Kigali (ULK), Dr. Sekibibi Ezekiel aganira na IGIHE yatangaje ko mbere y’uko Coronavirus igera mu Rwanda, bari bamaranye igihe igitekerezo cyo gukoresha ikoranabuhanga mu gutanga ubumenyi, dore ko igitekerezo bakigize mu 2015, ariko kigatangira gushyirwa mu bikorwa muri ibi bihe bya Coronavirus.

Yagize ati “Dutangira gutegura ibijyanye na ‘e-learning’ [kwiga binyuze kuri murandasi], twatangiye kubikoraho mu 2015, ariko ntabwo icyo gihe twayikoresheje, [ahubwo] byari muri gahunda yo kwitegura kuyikoresha, ni ukuvuga ko tumaze igihe turi kwitegura kuyikoresha bityo muri ibi bihe bya Coronavirus ntabwo byadutunguye.”

Sekibibi avuga ko bari bamaze igihe batanga amahugurwa ajyanye no kwigira ku ikoranabuhanga ku barimu n’abanyeshuri, aho byabafashije guhita batangira kwigisha binyuze kuri murandasi bitabagoye.

Yagize ati “Kubera ko abanyeshuri bari barahawe amahugurwa yo kwiga binyuze mu buryo bw’ikoranabuhanga [ndetse] n’abarimu bakaba barabonye amahugurwa ajyanye nabyo, ntabwo byatugoye kubyinjiramo cyane ko amasomo yose yari ari muri porogaramu yacu, ndetse tunabibonera no ku buryo abanyeshuri babyitabira”.

Iyi kaminuza ivuga ko izakomeza no gukoresha ubu buryo cyane ko ngo ifite ibikorwaremezo byabugenewe nk’ ibyumba by’ikoranabuhanga [smart rooms] birimo ibikoresho bihagije bifasha abanyeshuri gukurikira amasomo yabo mu buryo bworoshye.

Uyu muyobozi yabwiye IGIHE ko bakoresha porogaramu yitwa Moodle mu gutanga amasomo yabo.

Ku rundi ruhande, Umuyobozi wa Kaminuza y’Ubumenyingiro ya Ines Ruhengeri, Dr. Fr. Hagenimana Fabien, yabwiye IGIHE ko bigoye gukorera ubumenyingiro kuri murandasi cyane ko bo bashoye amafaranga mu gutegura aho kugukorera ubumenyingiro, harimo laboratwari zigezweho n’ahandi hatandukanye.

Yagize ati “Ines Ruhengeri nk’ishuri ry’ubumenyingiro, dukoresha laboratwari cyane, urumva ko gukorera ubumenyingiro kuri murandasi byo ntibishoboka, igishoboka ni uko amasomo atangwa mu magambo (theorie) yo yatangwa binyuze mu koranabuhanga. Icyo ni cyo twe twakoze, amasomo yose atangwa mu magambo kugeza ubu twarayarangije. Igihe bazabonera uburenganzira [abanyeshuri] bazaza bakore n’amasomo-ngiro (pratique)”.

Uyu muyobuzi yatangarije IGIHE ko imbogamizi abanyeshuri bahuye nayo mu gukoresha ikoranabuhanga bari kwiga, ari murandasi ihenze mu Rwanda. Yavuze ko ngo bo bakoresha miliyoni enye z’amafaranga y’u Rwanda ku kwezi yo kugura murandasi, asaba Leta ko yavugana n’abayigurisha bakagabanya ikiguzi cyayo.

Yagize ati “Usanga abenshi badafite ibikoresho byo kwiga hifashishijwe ikoranabuhanga, cyane murandasi. Hari ukuntu Minisiteri [y’uburezi] yadufashije ku buryo iyo uri gukorera ku rubuga rw’ishuri, murandasi iba ari ubuntu. Ariko nanone, kwiga ntabwo ari ugukora ibiri ku rubuga rw’ishuri gusa, ukenera gusoma ibitabo no gukora ubushakashatsi, wajya kubyinjiramo ugasanga ugomba kwishyura”.

Yongeyeho ati “usanga abatayafite batabasha kujya kuri Google, wikipedia n’ahandi, bityo ugasanga n’ubwo yigishwa ariko ireme ry’ubushakashatsi ribura”.

Dr. Fr. Hagenimana yavuze ko muri rusange, kwigira kuri murandasi byarushijeho kugorana kubera akamenyero ko kwiga imbonankubone, aho nk’iyo abanyeshuri bahawe isuzuma bataritangira rimwe, abandi bakaba bashobora gukopera n’ibindi.

Ku ruhande rw’Umuyobozi Wungirije Ushinzwe Amasomo n’Ubushakashatsi mu Ishuri Gaturika rya Kabgayi, Dr. Fr. Dushimimana Fidèle yabwiye IGIHE ko akurikije ubunararibonye afite mu burezi, asanga ikoranabuhanga ritasimbura umwarimu, ahubwo ko ari inyongera ku byo umwarimu yahaye umunyeshyuri.

Yagize ati “Kwiga ni ukujya imbere y’umwarimu akagusobanurira, ukamubazi ibyo utumvise neza, abanyeshuri bakigira mu matsinda. [Rero] Kwiga koko bya nyabyo ni ukwiga uri imbere ya mwarimu, ukagira igihe cyo kwiyigisha ariko wabonanye nawe".

Umuyobozi wa Kaminuza ya University of Tourism Business (UTB), Dr. Kabera Callixte we yavuze ko kaminuza yabo yiteguye kwigisha binyuze mu koranabuhanga, na cyane ko kuva mu 2016 bari bafite ubu buryo.

Ati “Twebwe nka UTB twiteguye byose ku buryo ari na ya masomo-ngiro ashobora gukorerwa kuri murandasi. Icyo dutegereje ni icyemezo cya Minisiteri y’Uburezi, yemeza ko amasomo yose yatangwa binyuze mu buryo bw’ikoranabuhanga tukabukoresha”.

Dr. Kabera yatangaje ko ikoranabuhanga UTB ikoresha uretse kuba ryorohereza umwarimu guhura n’umunyeshyuri mu kwiga, ariko ngo riri no ku rwego rwo hejuru, ku buryo umunyeshuri adashobora gukopera.

Yagize ati “Ndi umwarimu nanjye nzi uko bikora, umunyeshuri aba arebana na mwarimu, abaza ikibazo undi akamusubiza ku buryo baba barebana cyangwa bavugana. Mu gihe cy’ibizamini, usuzuma ikorwa ry’ibizamini aba areba umunyeshuri ari kuri mudasobwa ye kandi insakazamashusho y’iyo mudasobwa tuba twayifunze ku buryo atabasha kujya gukora ubushakashatsi kuri Google. Ibyo yasubIje abitanga kuri murandasi, akaba yanareba uko bamukosoye".

Minisiteri y’Uburezi iri muri gahunda yo kurushaho guteza imbere ikoranabuhanga mu mashuri, ndetse muri ibi bihe bya Coronavirus, iyi minisiteri n’abafatanyabikorwa bayo bakomeje gahunda yo kwigisha amashuri abanza n’ayisumbuye binyuze kuri radio na televiziyo.

Ines Ruhengeri ni imwe muri kaminuza zatangiye gukoresha ikoranabuhanga mu gutanga amasomo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .