Umuyobozi wa Gereza ya Mageragere ukekwaho gutonesha murumuna wa Gen Nyamvumba yasabye kurekurwa

Yanditswe na IGIHE
Kuya 23 Nyakanga 2020 saa 01:40
Yasuwe :
0 0

Umuyobozi wa Gereza ya Mageragere, CSP Camille Zuba, ukurikiranyweho kwemerera abagororwa gusurwa mu bihe bya COVID-19, yasabye kurekurwa avuga ko icyaha aregwa nta ngingo igisobanura mu mategeko kandi ibyo yakoze yatangaga serivisi nk’umuyobozi kandi byari byubahirije amabwiriza yo kwirinda iki cyorezo.

Camille Zuba akurikiranyweho icyaha cy’itonesha yakoze ubwo yemereraga abantu batandukanye gusurwa barimo Robert Nyamvumba, murumuna wa Gen Patrick Nyamvumba wahagaritswe ku nshingano ze nka Minisitiri w’Umutekano w’Imbere mu Gihugu, kandi amabwiriza yo kwirinda COVID-19 atabyemera.

Kuri uyu wa Kane tariki 23 Nyakanga 2020 nibwo Zuba yaburaniye mu Rukiko rwisumbuye rwa Nyarugenge ku bujurire ku ifungwa ry’iminsi 30 y’agateganyo.

Camille Zuba ubusanzwe ufungiye muri Gereza ya Nyanza, yari mu rukiko i Nyamirambo yambaye iroza; yunganiwe n’abunganizi babiri barimo Me Mutabingwa Aloys na Me Ngarambe Raphaël.

Uyu mugabo yahakanye ibyo aregwa avuga ko ibyo kurenga ku mabwiriza yo kwirinda COVID-19 atari icyaha ahubwo ari amakosa yakozwe mu kazi bityo ko nta mpamvu yo gukomeza kumufunga.

Me Ngarambe yavuze ko umukiliya we afite uburwayi bityo kuba afungiye i Nyanza kandi umuganga we ari i Kanombe nabyo byatuma ubuzima bwe budakurikiranwa neza.

Yavuze ko kugeza ubu basanga nta cyaha yakoze ariko ko bibaye amakosa yakoze mu kazi yahabwa igihano cy’iminsi 30 iteganywa n’urwego rw’amagereza.

Ku ngingo ya 8 y’itegeko ryerekeye kurwanya ruswa Ubushinjacyaha bwashingiyeho bumushinja ’itonesha’, abunganizi be bagaragaje ko itonesha rivugwa muri iryo tegeko ntaho rihuriye n’ibyo umukiliya wabo ashinjwa.

Bavuze ko ibikubiye muri iyo ngingo byerekena ko ugira itonesha hari icyo aba agamije cyitwa kwigwizaho imitungo mu buryo butemewe n’amategeko cyangwa ishimishamubiri kandi muri ibyo byose nta na kimwe Camille Zuba yari agamije.

Bavuze ko Ubushinjacyaha bwateruye agace gato k’itegeko bukirengengiza iyo mpamvu bityo ko agomba kurekurwa agakurikiranwa adafunze kuko icyo akurikiranyweho amategeko atagisobanura neza.

Ubushinjacyaha bwavuze ko kuba yarinjizaga abantu batanditse mu bitabo by’abasura mu biro bye, hakaba hari n’abatangabuhamya bagera ku munani bemeza ko yagiye agira aho ‘abaseseka’ bisobanura neza icyari kigamijwe.

Umushinjacyaha yavuze ko hari abantu bagiye basura mu bihe bitandukanye kandi akabakira mu biro bye barimo n’abasuye murumuna wa Patrick Nyamvumba witwa Robert Nyamvumba ufungiye muri Gereza ya Mageragere kandi ko bitari byemewe.

Yavuze ko Camille Zuba yishe nkana amategeko kandi ari umuyobozi, kuba yarakoreshaga ibiro bye yakira abo bantu no kuba hari ibyafatiriwe byari bijyanywe n’abasuye, bigaragaza icyari kigamijwe [atavuze] ashimangira ko itegeko risobanutse kandi rijyanye n’ibyabaye.

Camille Zuba yahise asaba ijambo atangira avuga ko kuba umuntu atanditse aho abantu binjirira bitaba ikosa ry’umuyobozi wa Gereza cyane ko aho abiboneye nyuma ariwe wabajije impamvu batanditse bakabona kubikora.

Ku bijyanye no gusura yavuze ko ari serivisi yatanze nk’umuyobozi ku mfungwa n’abagororwa. Yavuze ko ababisabaga bakoreshaga telefoni y’akazi kandi ko nk’uwari uzaniye umufungwa umuti yagombaga kumwakira kugira ngo harebwe koko niba ari umuti, kandi ko ari ibisanzwe umuyobozi yakirira abantu mu biro bye.

Mu kubakira yavuze ko amabwiriza yo kwirinda COVID-19 yubahirizwaga harimo guhana intera kuko ibiro bye ari bigari no kuba abaje bambaye agapfukamunwa.

Ku mpamvu yemereye Robert Nyamvumba ko azanirwa ibikoresho ni uko yaje mu gihe cya COVID-19 kandi hari amabwiriza yuko abafungwa bashya baza bakajya mu kato. Kuba yari agiye kuba mu ihema (tente) byatumye “amuha serivisi” yo guhabwa ibikoresho by’ibanze.

Yavuze ko yazaniwe ibikoresho birimo amashuka, inkweto, igitabo cyo gusoma, isume, T-Shirt n’ikote. Hanyuma mu ikoti bagasangamo amadorali 1900 agahita abimenyekanisha. Aya ayaregwa n’Ubushinjacyaha buvuga ko yemereye umufungwa gutunga amafaranga kandi bibujijwe.

Hari amakuru IGIHE yamenye ko ayo mafaranga yasanzwe mu ikote yarimo n’amayero 100 n’ifaranga ryo muri Quatar rimwe.

Camille Zuba yemereye abagize Umuryango wa Robert Nyamvumba kumusura ku wa 25 Gicurasi 2020.

Umucamanza yamubajije niba hari n’abandi bantu yemereraga izo serivisi, maze Umwunganizi we Me Mutabingwa Aloys afata ijambo avuga ko ibyo umukiliya we yakoze kwari ukurengera ikiremwamuntu ahubwo iyo atabikora ubu haba havugwa ibindi bibazo.

Yavuze ko kuba twari mu bihe bidasanzwe, umuyobozi na we yagombaga gukora mu buryo budasanzwe kugira ngo hatagira ugira ikibazo, avuga ko ahubwo yakabaye abishimirwa kuko kugeza ubu ngo nta muntu uragaragaraho COVID-19 muri Gereza ya Mageragere.

Yavuze ko uko abakora mu nzego z’ubuzima cyangwa abandi bantu bemererwaga gutambuka kubera impamvu zabo zumvikana ari nako umuyobozi wa Gereza atashoboraga kwangira umuntu kuzanira umufungwa umuti, bityo ko yakoze ibikwiye.

Umwanzuro ku bujurire bwa Camille Zuba uzasomwa ku wa 29 Nyakanga saa kumi n’igice.

Umuyobozi wa Gereza ya Mageragere, CSP Camille Zuba, yasabye kurekurwa avuga ko icyaha aregwa nta ngingo igisobanura mu mategeko kandi ibyo yakoze yatangaga serivisi nk’umuyobozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .