Ubutumwa natanze ntibuvuguruzanya n’itangazo rya RDB- Minisitiri Shyaka

Yanditswe na Iradukunda Serge
Kuya 28 Kanama 2020 saa 01:04
Yasuwe :
0 0

Minisitiri w’ubutegetsi bw’igihugu Prof Shyaka Anastase yanyomoje abakomeje kuvuga ko hari ukuvuguruzanya hagati ye n’ikigo cy’igihugu gishinzwe iterambere RDB ku bijyanye n’amabwiriza avuguruye agomba kugenga hoteli,restaurant n’utubari muri ibi bihe bya Covid-19.

Ubwo yari mu kiganiro kuri Televiziyo y’u Rwanda, Minisitiri Shyaka yavuze ko Utubari tutemerewe gukora yaba udukorera mu mahoteli n’ahandi hatandukanye.

Yagize ati “Utubari turafunze, twaba ari twa tubari tuzi, twaba ari utubari twakoreraga muri Hoteli, twaba ari utubari twakoreraga muri Restaurants yaba ari n’utubari twari twarihinduye Restaurants ariko ntitube Restaurants tugakomeza kuba utubari, utwo tubari twose uyu munsi turafunze, aho batibwiriza ngo badufunge inzego zibishinzwe ziraza kujya kudufunga ariko zidufunge bahannye na ba nyirwatwo.”

Yakomeje agira ati “Mwajyaga mubibona abantu bagiraga batya haba ari muri hoteli runaka cyangwa muri Restaurants runaka bagahura ari itsinda bakabanza bagafata nka ka Burushete kamwe hanyuma ahasigaye amacupa agacicikana icyari restaurant kigahinduka akabari [...] aho turi busange bimeze gutya turahafunga nta yindi nteguza.”

Mbere y’uko Prof. Shyaka atangaza ibi RDB yari yasohoye itangazo rikubiyemo amabwiriza agomba kugenga ubukerarugendo, inama n’ibikorwa bya hoteli na za restaurants muri ibi bihe bya Covid-19.

Ingingo ya kane muri aya mabwiriza yagiraga iti “Restaurants na hoteli bishobora gutanga inzoga gusa ku bakiliya bicaye bategereje ibyo kurya.”

Mu basomye iyi ngingo bakumva n’ibyo Minisitiri Shyaka yavuze bahise bakeka ko harimo ukwivuguruza nyamara birengagije ko ingingo ya gatatu muri aya mabwiriza ya RDB ivuga ko ‘Utubari twose harimo n’uturi mu ma Restaurants na hoteli tuzakomeza gufunga.’

Nyuma yo kubona ko abantu bakomeje kutumva neza ko ubutumwa bwe n’ubwa RDB byuzuzanya. Minisitiri Shyaka abinyujije kuri Twitter yagize ati “Tuvanemo urujijo! Ubutumwa natanze kuri RBA n’itangazo rya RDB ntibivuguruzanya, biruzuzanya. Ubutumwa bwombi buri mu murongo w’ibyemezo by’Inama y’Abaminisitiri mu kwirinda COVID19.”

Shayaka yavuze ko kunywa inzoga bitaciwe. Ati “Ntabwo twaciye kunywa inzoga; no mu maduka ziracuruzwa!Ariko twafunze utubari twose, hose Akabari ntikihishira! Uwiringira ruswa cyangwa ikimenyane agakora akabari, arahanwa. N’uhindura restaurant na hoteli mo akabari, na we ni uko. Tureke gutekinika. Twese, abayobozi n’abacuruzi, twubahirize amabwiriza yo kurwanya Covid19. Nta yindi siyansi bisaba.”

Minisitiri w'ubutegetsi bw'igihugu, Prof Shyaka Anastase yavuze ko ntakuvuguruzanya kuri hagati ye na RDB

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .