Ubushomeri mu Rwanda bwageze kuri 16% buvuye kuri 22.1% mu mezi atatu ashize

Yanditswe na Iradukunda Serge
Kuya 21 Ukwakira 2020 saa 04:27
Yasuwe :
0 0

Imibare y’Ikigo cy’Igihugu cy’Ibarurishamibare, NISR, yerekanye ko uko umwaka wa 2020 ugenda wigira imbere, umubare w’abantu bari baratakaje akazi kubera COVID-19 ugenda ugabanuka uko ibikorwa bimwe na bimwe byongera gufungura.

Iyi mibare ikubiye muri Raporo ya NISR ku bushakashatsi ku murimo n’ubushomeri mu Rwanda bwakozwe muri Kanama 2020, bugashyirwa hanze kuri uyu wa 21 Ukwakira 2020. Ubu bushakashatsi bugaragaza ibipimo byafashwe mu mezi atatu [igihembwe], aho bukurikira ubwari bwamuritswe muri Gicurasi 2020.

Iyi raporo igaragaza ko mbere y’uko icyorezo cya Covid-19 kigera mu Rwanda muri Gashyantare ko ikigero cy’ubushomeri cyari kuri 13.1% ariko kubera ingaruka z’iki cyorezo, muri Gicurasi iki kigero cy’ubushomeri cyaje kuzamuka kigera 22.1%.

Gusa nyuma y’aho igihugu kiviriye mu bihe bya guma mu rugo ndetse ibikorwa bimwe na bimwe bikongera gusubukurwa, kugeza muri Kanama iki kigero cy’ubushomeri cyaragabanutse kigera kuri 16.0%.

Iyi raporo igaragaza ko kandi kuva muri Gicurasi 2020 umubare w’abaturage bafite akazi wagize uzamuka nyuma y’uko ibikorwa byongeye gufungura. Umubare w’abafite akazi warazamutse uva kuri 3.199.104 wariho muri Gicurasi ugera kuri 3.212.097 muri Nyakanga, mbere y’uko uzamuka na none ukagera kuri 3.667.611 muri Kanama.

Hashingiwe kuri iyi mibare bigaragara ko kuva muri Gicurasi 2020 kugera muri Kanama umubare w’abafite akazi wazamutse ku kigero cya 15%. Mu gihe kuva muri Kanama 2019 kugera Kanama 2020 wazamutse ku kigero cya 16%.

Zimwe mu nzego z’ubukungu zatanze imirimo ku bantu kurenza izindi hari ubwubatsi, ubucuruzi, inganda, amacumbi ndetse n’ibijyanye no gutegura amafunguro.

Iyi raporo igaragaza ko urwego rw’ubwubatsi rwazamutse ku kigero cya 43% rugatanga akazi ku bakozi bashya 173.368, urwego rw’ubucuruzi rwo rwazamutse ku kigero cya 40% rutanga akazi ku bakozi bashya 172.765, urwego rw’inganda rwo rwazamutse kuri 81% rutanga akazi ku bakozi bashya 133.428.

Ibijyanye n’amacumbi na serivisi z’ibyo kurya byo byazamutse ku kigero cya 150% bitanga akazi ku bakozi bashya 74.694.

Ikindi kigaragara muri iyi raporo ni uko kuva muri Gicurasi 2020 kugera mu Kanama, umubare w’abantu bafite imyaka yo gukora (16 kuzamura) bari ku isoko ry’umurimo wazamutse uva kuri 55.1% wariho muri Gicurasi ugera kuri 58.2% muri Kanama.

Ibi byatumye muri iki gihembwe cya gatatu, umubare w’abafite imyaka yo gukora batari ku isoko ry’akazi ugabanuka ugereranyije n’ibihembwe byabanje. Uyu mubare wavuye kuri 44.8% wariho muri Gicurasi 2020 ugera kuri 41.8% muri Kanama.

Umubare w’abari mu buhinzi n’abikorera waragabanutse

Imibare ya NISR yerekana ko abantu 3.702.000 bafite imyaka 16 gusubiza hejuru bakora mu buhunzi yaba ubugamije kugeza umusaruro ku isoko, kurya cyangwa ubukorwa nk’akazi ka kabiri kaza kiyongera ku bindi umuntu aba akora.

Gusa uyu mubare w’abantu bari mu buhinzi wagiye ugabanuka uva kuri 56.1% wariho muri Gashyantare 2020 ugera kuri 49.3% muri Kanama, ni ikigero kiri hasi kandi na none ugereranyije na 50% wariho muri Kanama 2019.

Ikindi iyi raporo igaragaza ni uko umubare w’abakorera abandi wiyongereyeho 2.5% uva kuri 59.5% by’abafite akazi bose muri Gicurasi 2020 ugera kuri 62% by’abafite akazi bose muri Kanama 2020.

Ku rundi ruhande umubare w’abikorera wagabanutse ku kigero cya 3.1%, uva kuri 34.8% by’abafite akazi wariho muri Gicurasi 2020, ugera kuri 30.7% by’abafite akazi bose muri Kanama.

Uretse aha kuva muri Kanama 2019 kugera muri Kanama 2020 umubare w’abakorera abandi wagabanutse ku kigero cya 5.1% mu gihe uw’abikorera wazamutse ku kigero cya 2.8%.

Mu rwego rw’umurimo n’ubushomeri haracyari icyuho hagati y’abagore n’abagabo kuko iyi raporo igaragaza ko ikigero cy’ubushomeri mu bagore kiri kuri 19.7% mu gihe mu bagabo kiri kuri 13%. Ni

Ikigo cy’Igihugu cy’Ibarurishamibare kigaragaza ko mu Rwanda hari abantu miliyoni 7,5 bujuje imyaka yo gukora, muri bo 3.667.611 nibo bafite akazi, mu gihe abandi 697.210 batagafite naho abagera kuri 3.137.889 bo batari ku isoko ry’umurimo.

Ubushakashatsi bwagaragaje ko ubushomeri mu Rwanda bwageze kuri 16% buvuye kuri 22.1% bwariho muri Gicurasi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .