Uburezi bw’abana baturuka mu miryango itishoboye mu bishobora guhungabanywa cyane na Coronavirus

Yanditswe na Iradukunda Serge
Kuya 31 Werurwe 2020 saa 02:07
Yasuwe :
0 0

Umuryango wita ku kurengera abana, Save the Children, urasaba guverinoma z’ibihugu kugira icyo zikora kugira ngo abana baturuka mu miryango itishoboye bahagaritse amasomo kubera icyorezo cya Coronavirus, bitazababera intandaro yo kurivamo burundu no kugerwaho n’imibereho mibi birindaga babifashijwemo n’ishuri.

Izi mpungenge zije nyuma y’uko mu kwirinda ko icyorezo cya Coronavirus, cyakomeza gukwirakwira. Ibihugu birenga 120 byamaze gushyiraho amabwiriza ahagarika amashuri kugeza kuri za kaminuza, bikaba byaragize ingaruka ku banyeshuri bo hirya no hino ku Isi basaga miliyari 1.2 nk’uko ishami ry’umuryango w’Abibumbye rishinzwe uburezi, ubumenyi n’Umuco (UNESCO), ribigaragaza.

Umuryango Save the Chidren, urasaba Leta z’ibihugu ko zashyiraho uburyo bwo kwita ku bana bahagarikiwe amashuri kubera Coronavirus, hashyirwaho uburyo bwo kwiga bw’iyakure budaheza ndetse bafasha n’abarimu kugira ubumenyi bubashoboza kwigisha muri ubu buryo bitabangamiye ireme ry’uburezi.

Umuyobozi ushinzwe uburezi muri Save the children ishami ryo mu Rwanda, Ndahayo Paulin, yavuze ko guhagarika amashuri kubera Coronavirus, bishobora kuzagira ingaruka ku burezi bw’abanyeshuri.

Ati “Duhanganye n’ibihe bidasanzwe, umubare w’abana bahagaritse ishuri na kaminuza bitunguranye urenze kimwe cya kabiri cy’abaturage b’u Rwanda, amagana y’ibihumbi by’abanyeshuri ntibazabasha gusubira ku ishuri nk’uko bisanzwe mu gihe cy’ibyumweru, amezi bishobora no kurenga, ibizamini by’ingenzi byarahagaritswe cyangwa birasubikwa.”

Akomeza agira ati “Ibi byabaye umutwaro ku miryango by’umwihariko ku idafite ubumenyi buhagije ku bijyanye no kwirerera abana mu buryo bubungura ubumenyi ndetse biba nk’ikiza ku bana bakomoka muri iyi miryango”.

Uyu muryango uvuga ko ingaruka z’ifunga ry’amashuri zirenga ku kubangamira uburezi zikagera no ku mibereho y’abana cyane cyane abava mu miryango itishoboye, kuko abenshi bacungira ku mafunguro yo ku ishuri agira uruhare runini mu mirire yabo.

Uyu muryango kandi ushingiye ku bunararibonye ufite mu bijyanye n’uburezi bw’abana, ugaragaza ko uko umwana amara igihe kinini atagiye ku ishuri ari nako biba bishoboka cyane ko atazarisubiramo, ibi bikagaragara cyane ku bana b’abakobwa baturuka mu miryango itifashije.

Izi mpungenge ni zo zituma uyu muryango usaba leta y’u Rwanda, binyuze muri Minisiteri y’uburezi gukorana n’abafatanyabikorwa bayo bose gushyiraho byihuse uburyo bufasha abana kwiga mu buryo bw’iyakure kandi ikagenzura ko iri koranabuhanga ridaheza abana b’abakene n’abafite ubumuga.

Save the Children ivuga ko abana bazagerwaho n’ingaruka cyane barimo abo ku muhanda, abatagira ababyeyi, abagikeneye kurerwa cyane, abari mu nkambi z’impunzi ndetse n’abafite ubumuga.

Umuyobozi wa Save the Children mu Rwanda Maggie Korde yavuze ko uyu muryango witeguye gufatanya n’u Rwanda mu gushakira umuti iki kibazo.

Yagize ati“Twiyemeje gukorana na guverinoma y’u Rwanda, Minisiteri y’Uburezi n’Ikigo cy’Igihugu gishinzwe uburezi ndetse n’abandi bafatanyabikorwa mu iterambere, mu gushaka igisubizo gishingiye mu guhanga udushya kugira ngo abana babashe gutekana mu rugo banashobore gukomeza kugera ku buryo bubafasha kwiga”.

Ubuyobozi bw’uyu muryango mu Rwanda, buvuga ko iki ari igihe cyo gufatanyiriza hamwe mu kurengera abana, ukagira n’inama ababyeyi batandukanye ko mu gihe bubahiriza amabwiriza ya leta yo kuguma mu rugo, ko bakwiye kubyaza uyu mwanya umusaruro barushaho gukundisha abana babo umuco wo gusoma ndetse ukababera n’amahirwe yo kurushaho kumarana umwanya munini na bo babafasha no kwiga.

Icyorezo cya Coronavirus gishobora kuba imbogamizi ku burezi bw'abana bo mu miryango itishoboye
Save the Children yagaragaje ko uko umwana amara igihe kinini atajya ku ishuri bishobora kumuviramo no kutarisubiramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .