Ubumwe Grande Hotel yagurishijwe asaga miliyari 30 Frw mu cyamunara

Yanditswe na Habimana James
Kuya 24 Ukuboza 2018 saa 11:57
Yasuwe :
0 0

Sosiyete y’ubucuruzi yitwa Umubano Industries Ltd yegukanye muri cyamunara Ubumwe Grande Hotel kuri miliyoni 34 z’amadolari ihigitse abandi bantu barindwi bashakaga kuyegukana.

Iyi cyamunara yabaye kuri uyu wa Mbere mu Mujyi wa Kigali rwagati aho iyo hotel y’inyenyeri enye yagurushijwe kugira ngo haboneke ubwishyu bw’inguzanyo isaga miliyoni 18 z’amadolari yatanzwe na KCB Rwanda.

Umunyamategeko Joseph Ngabonziza ni we wateje cyamunara iyi hotel. Igiciro fatizo cyari 34 053 703 $ (asaga miliyari 30 Frw).

Ikigo Umubano Industries Ltd cyari gihagarariwe n’uwitwa Gasana Hassan ni cyo cyayegukanye gihigitse abandi barimo Afurika Oswald, kimaze gutanga 34 053 888.9 $ (30.222.015.696 Frw).

Mu bari muri iyi cyamunara harimo Mwumvaneza Édouard, watangiye atanga amafaranga yari yatangajwe nk’igiciro fatizo.

Gasana yayarengejeho ibihumbi 100 Frw, Gasingwa James yongeraho ibihumbi 10 Frw kuri ibi bihumbi 100 Frw, Kabungo Omar nawe yongeyeho ibihumbi 10 Frw ndetse na Afurika Oswald bose bagendaga bongeraho ibihumbi 10 Frw.

Gusa Gasana ni we waje gutangazwa ko yegukanye iyi hoteli, nyuma yo kurenzaho ibihumbi 165 Frw ku mafaranga fatizo yari yatanzwe muri cyamunara.

Mu kiganiro yahaye itangazamakuru, Gasana Hassan, wari uhagarariye Umubano Industries ltd, yavuze ko iyi sosiyete ishyize imbere gutanga serivisi za hotel no kwakira abantu, bityo ko iyi igiye gukora neza kurushaho.

Ati “Twishimiye ko iyi cyamunara yagenze neza kandi mu mucyo, iyi hotel izakomeza gukora uko byari bisanzwe, nta kintu gikomeye kigiye guhinduka kubera ko dushyize imbere gukomeza umuco w’u Rwanda wo kwakira abantu, abakoraga hano nk’abakozi, ndabasaba gukora batuje kuko akazi kabo karahari.”

Ku bijyanye no guhindura izina, Gasana yavuze ko bizarebwaho nyuma.

KCB Rwanda yari iherutse gutangaza ko abubatse Ubumwe Grande Hotel, bayibereremo umwenda ungana na miliyoni 18 z’amadorali, ni ukuvuga agera kuri miliyari 15.8 Frw.

Itejwe cyamunara nyuma yaho mu ntangiriro za Ukwakira 2017, inkuru yasakaye ko Hilton, icyamamare mu gucunga amahoteli, igiye gutangira gucunga Ubumwe Grande Hotel. Gusa iyi gahunda yaburijwemo nyuma y’aho havuzwemo uburiganya.

Iyo icungwa na Hilton yagombaga guhindura izina maze ikitwa Double Tree by Hilton Kigali City Centre.

Iyi hoteli ijya gutangira yitwaga Zinc Hotel, ifite agaciro ka miliyoni 40 z’amadorali ya Amerika. Abanyamigabane bayo bari Ikigo CG Corp Global cya Binod Chaudhary, umugabo ukize kurusha abandi muri Népal, wari no gukora imirimo yo kuyicunga mu gihe cy’imyaka 15 na Mukwano Group, bombi bafite imigabane 80%. Undi ni Robert Bapfakurera ufite imigabane ingana na 20%.

Izina Zinc, ryari ryihariwe n’uwo muherwe wo muri Népal kubera ko afite n’andi mahoteli menshi yitwa atyo hirya no hino ku isi.

Gusa yaje guhinduka yitwa Ubumwe mbere gato y’uko Inama rusange y’Umuryango w’Ubumwe bwa Afurika itangira muri Nyakanga 2016. Bivugwa ko Mukwano Group yirukanye ikigo cyari cyahawe isoko ryo kuyicunga mu gihe cy’imyaka 15.

Ubumwe Grande ni hoteli yafunguwe muri Nzeri 2016, ifite ibyumba 153 birimo 134 by’abashyitsi na 19 byo guturamo.

Abari bitabiriye cyamunara yo kugura Ubumwe Grande Hotel bari kuri iyi nyubako
Bamwe bunguranaga mu matsinda ibitekerezo kuri iyi cyamunara
Gasana Hassan wari uhagarariye Umubano Industries yatsindiye Ubumwe Grande Hotel
Umunyamategeko agaragaza sheki yishyuriweho amafaranga yaguzwe Ubumwe Grande Hotel
Umunyamategeko wari uyoboye Cyamunara, Ngabonziza Joseph, atangaza ibyavuye muri cyamunara
Ubumwe Grande Hotel yatejwe cyamunara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza