U Rwanda rwemeye ubutumire bw’u Burundi mu biganiro ku kuzahura umubano

Yanditswe na IGIHE
Kuya 20 Ukwakira 2020 saa 07:36
Yasuwe :
0 0

Minisitiri w’Ububanyi n’Amahanga w’u Rwanda, Dr Vincent Biruta, yatangaje ko yemeye ubutumire bwa mugenzi we w’u Burundi, mu biganiro bigamije gushakira umuti ibibazo bimaze igihe hagati mu mibanire y’ibihugu byombi.

Kuri uyu wa Kabiri nibwo Minisitiri Biruta yagiranye ibiganiro na mugenzi we w’u Burundi, Albert Shingiro, byabereye ku mupaka wa Nemba mu Karere ka Bugesera. Ni inama yabaye ku cyifuzo cyatanzwe n’u Burundi.

Nyuma y’inama yabereye mu muhezo, Minisitiri Dr Vincent Biruta yavuze ko baganiriye ku byatumye umubano w’ibihugu byombi wangirika cyane kuva mu 2015 ubwo mu Burundi hatangiraga imvururu za politiki, hemezwa gukora ibishoboka mu gusubiranya umubano, ari nayo mpamvu yemeye ubutumire bw’uruzinduko mu Burundi.

Yakomeje ati "Twiyemeje gukomeza gukora ibishoboka byose kugira ngo umubano hagati y’ibihugu byacu ube waba mwiza, ari nayo mpamvu nemeye n’ubutumire bwa mugenzi wanjye bwo kuzagirira uruzinduko mu gihugu cy’u Burundi, ku matariki tuzumvikanaho."

Ibi biganiro bya mbere byafashwe nk’ibiharuriye amayira izindi nama zizagenda zibaho hagati y’u Rwanda n’u Burundi, bikanahuza inzego zinyuranye.

Minisitiri Biruta yakomeje ati “Twumvikanye ko tuzakomeza kugenda duhura, za Minisiteri zishinzwe ibikorwa bitandukanye, inzego z’umutekano, ndetse igihe kikazagera byanashoboka n’abakuru b’ibihugu bakaba bahura."

U Rwanda n’u Burundi bimaranye igihe umwuka utari mwiza, kugeza aho umuvugizi wa Minisiteri y’Umutekano muri icyo gihugu, Pierre Nkurikiye, ku wa 8 Ukwakira yasabye abaturage bose kubatungira agatoki umuntu wese uvuga Ikinyarwanda ubwo yari mu Ntara ya Gitega, abihuza no kuba abagizi ba nabi barakunze guhungabanya umutekano w’u Burundi baturutse mu Rwanda, nubwo nta bimenyetso yigeze abitangira.

Yakomeje ati “Aba bantu bose b’abanyamahanga bagenda bagaragara cyane cyane muri iyi minsi mu mijyi cyangwa ahandi, ntibigoye no kubamenya kuko usanga benshi bavuga Ikinyarwanda, igihe mumwumvise avuga Ikinyarwanda mujye muhita murya akara ubuyobozi n’abashinzwe umutekano, kugira ngo bamubaze ikimugenza.”

“Muzi neza ko muri iki gihugu, umutekano wigeze kujya uhungabanywa n’abagizi ba nabi baturutse mu bindi bihugu, cyane cyane mu Rwanda. Aha rero kirazira ko umurundi w’umutima yakongera kurangara, kugira ngo hato igiti kitadukora mu jisho kabiri kandi birimo kuba tubireba.”

Ni mu gihe ubutegetsi bw’u Burundi burangajwe imbere na Perezida Evariste Ndayishimiye, bwakunze kugaragara nk’ubufite umurongo wo gukomeza kubanira nabi u Rwanda.

Mu gihe u Burundi bwizihizaga imyaka 58 y’Ubwigenge ku wa 1 Nyakanga, kimwe mu byaranze uwo munsi ni uko Perezida Nsayishimiye yahaye imidali abasirikare bagize uruhare mu gushotora u Rwanda, nyuma y’uko muri Gicurasi uyu mwaka Ingabo z’u Rwanda zarasanye n’iz’u Burundi ubwo abarobyi bo muri iki gihugu binjiraga mu mazi yo ku ruhande rw’u Rwanda.

Mu bashimiwe na Ndayishimiye barimo abasirikare Adjudent Nitunga Jonathan wapfuye - wari uhagarariwe n’umugore we na Caporal - Chef Ndizeye Fulgence bari kumwe, barwanye n’igihugu cy’abaturanyi yirinze kuvuga izina, ariko uburyo yagisobanuye yagushije ku Rwanda.

Ati “Muzi ko mu minsi ishize wa mwanzi uhora adushotora hariya ku rubibi rwo mu majyaruguru, yaje ashaka kongera kuduhekura abarobyi bo mu Kiyaga cya Rweru, hanyuma rero muzi ko ingabo z’u Burundi zitajya zigoheka, zijya gutabara abo barobyi bari bagiye kwicirwa muri icyo kiyaga, hanyuma uyu Adjudent Nitunga Jonathan kuri urwo rugamba ni we wahasize ubuzima.”

Abo basirikare bombi bahawe imidali, ndetse buri ruhande ruhabwa miliyoni y’amafaranga y’Amarundi.

Mu kiganiro n’abanyamakuru muri Nzeri, Perezida Ndayishimiye yakomeje atangaza ko mu bigaragara, u Rwanda rushobora kuba ruri gutegura abahunze igihugu ngo “batere u Burundi kuko nta cyiza babona mu Barundi”.

Kuri we ngo ntashobora kubana n’umuturanyi mushobora kujya “gusangira agacupa uziko ari bugushyiriremo ishyano”.

Ati “Kutwiyorobekaho ntibikunda, wowe wagendana n’umuntu ngo tugiye gusangira agacupa uziko aza kugushyiriramo ishyano? Ukavuga ngo ni sawa, ni inshuti tujye gutemberana, ngo ni uko we yakubwiye ngo tujye gutemberana, naho yaguteze umutego. Abiyorobetsi ni babi, umuntu mwiza aravuga ati ’dufite ikibazo twese tukigire uku n’uku’.”

Mu gihe u Burundi bwakomezaga kwikoma no kwishisha u Rwanda, Perezida Paul Kagame yakunze kuvuga ko u Rwanda rwiteguye kubana neza n’u Burundi igihe bwagaragaza ubushake mu mibanire myiza.

Nubwo u Burundi bwikoma u Rwanda bwose, bwakomeje gushyigikira imitwe igamije kuruhungabanyiriza umutekano irimo FDLR, FLN, P5 n’indi igamije guhungabanya umutekano w’u Rwanda, ibintu byashimangiwe n’ubuhamya bw’abafatiwe muri ibyo bikorwa ubu bari mu nkiko. Inshuro nyinshi bagiye bagaba ibitero bturutse mu ishyamba rya Kibira ryo mu Burundi, rifatanye n’irya Nyungwe mu Rwanda.

Igitero giheruka ni icyo ku wa 27 Kamena 2020, ubwo ahagana saa sita n’iminota makumyabiri, aho bantu babarirwa mu 100 bitwaje imbunda nini zirimo mashinigani (machine gun), imbunda zirasa za rockettes na gerenade, bateye ibirindiro by’Ingabo z’u Rwanda mu Murenge wa Ruheru mu Karere ka Nyaruguru.

Nyuma y’icyo gitero, Guverinoma y’u Rwanda yandikiye iy’u Burundi iyisaba ibisobanuro ku gitero cyagabwe n’abantu baturutse muri icyo gihugu, inayisaba gufata ingamba zose zishoboka kugira ngo abagize uruhare muri ibyo byaha bahungiye mu Burundi, bafatwe mu maguru mashya bagezwe imbere y’ubutabera, cyangwa boherezwe mu Rwanda kugira ngo babazwe ibyo bakoze. Nyamara ntibyakozwe.

Ahubwo u Rwanda rwo ku wa 29 Nzeri, rwafashe abarwanyi 19 bagize umutwe wa RED Tabara urwanya Guverinoma y’u Burundi, binjiye ku butaka bwarwo muri Nyungwe, runamenyesha ingabo z’akarere zishinzwe kurinda imipaka kugira ngo zikore iperereza kuri iki kibazo.

Dr Biruta yavuze ko ibiganiro bizakomeza kugeza igihe umubano mwiza hagati y'ibihugu byombi ubonekeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .