00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwaje ku mwanya wa 3 muri Afurika mu kurwanya ruswa

Yanditswe na Uwishyaka Jean Louis
Kuya 25 Mutarama 2017 saa 11:11
Yasuwe :
0 0

Ubushakashatsi bw’Umuryango urwanya ruswa n’akarengane,Transparency International bwakozwe mu mwaka ushize wa 2016, bugamije kugaragaza ishusho yo kurwanya ruswa mu bihugu bitandukanye(Corruption Perception Index 2016) bwashyize u Rwanda ku mwanya wa gatatu muri Afurika mu bihugu bigaragaramo ruswa iri ku gipimo cyo hasi.

Ubu bushakashatsi bwamuritswe kuri uyu wa Gatatu, tariki ya 25 Mutarama 2017 hirya no hino ku Isi.

U Rwanda ruza ku mwanya wa gatatu muri Afurika rusangiye n’ibirwa bya Maurice, ku Isi rukaba n’urwa 50, rufite amanota 54.

Mu 2015 rwari ku mwanya wa kane muri Afurika na 44 ku Isi n’amanota 54 rukaba rwarasubiye inyuma ho imyanya itandatu. Iri subira inyuma ku u Rwanda, Transparency International Rwanda ivuga ko ritatewe n’uko igihugu cyadohotse mu guhangana na ruswa bigatuma yiyongera, ahubwo ngo byaturutse ku mubare w’ibihugu ubu bushakashatsi bwakorewemo wiyongereye ugereranyije n’ubwa 2015.

Igaragaza ko ibihugu byakorewemo ubushakashatsi byiyongereye biva ku 168 mu 2015 bigera ku 176 mu 2016.

Mu Karere ka Afurika y’Iburasirazuba, u Rwanda ruherereyemo, ruyoboye ibindi bihugu, rugakurikirwa na Tanzania iza ku mwanya wa 116 ku Isi.

Ku mugabane wa Afurika Botswana ni yo iza ku mwanya wa mbere mu bihugu bigaragaramo ruswa nke, mu gihe Somalia ari yo iza ku mwanya wa nyuma muri Afurika no ku Isi muri rusange.

Ku rwego rw’Isi, Denmark na Nouvelle-Zélande ni byo bihugu biza mu myanya y’imbere mu bigaragaramo ruswa iri hasi aho binganya amanota 90 nubwo nabyo byasubiye inyuma gato mu manota kuko umwaka ushize Denmark yari ifite amanita 91.

Ashingiye ku mwanya u Rwanda ruriho, Umuyobozi wa Transparency International Rwanda, Ingabire Marie Immaculée yatangaje ko atishimiye uwo mwanya kuko avuga ko bitumvikana uburyo Botswana iruza imbere.

Ati "Ku bwanjye uriya ni umwanya ntishimira, kuko ndibanza nti ‘ese Botswana igira amanota 60 iturusha iki? Tugomba kumenya ko hari aho imvugo itajyana n’ingiro[…] mu itorero mu byo bigishwa n’ubunyangamugayo bubamo, ariko abanyarwanda guhinduka ni ikintu kitugora. Ubunyangamugayo nibutahaba ruswa ntizacika."

Umunyamabanga wa Leta muri Minisiteri y’Ubutegetsi bw’igihugu, Vincent Munyeshyaka wari umuyobozi mukuru muri uyu muhango, yavuze ko kurwanya ruswa ari igikorwa gikomeza kandi gikwiye kugirwamo uruhare na buri muntu wese, cyane bishingiye ku gutanga amakuru ayerekeyeho. Yasabye kandi ko inzego z’ubutabera zashaka uburyo zishyiraho amategeko yihariye ashobora guha ingufu uburyo bwo gutanga amakuru ku cyaha cya ruswa.

Transparency International Rwanda ivuga ko izakomeza gufatanya n’izindi nzego zinyuranye hagamijwe guhashya icyaha cya ruswa mu gihugu.

Ubushakashatsi bugaragaza uko ruswa ihagaze mu bihugu bitandukanye ku Isi bwatangiye gukorwa mu 1995, muri uyu mwaka bukaba bwakorwaga ku nshuro ya 21.

Ibihugu 10 bya mbere birimo ruswa iri hasi ni Denmark, New Zealand, Finland, Suède, u Busuwisi, Norvege, Singapore, u Buholandi, Canada n’u Budage.

Ibirangwamo ruswa ku bwinshi birimo Somalia, Sudani y’Epfo, Korea ya Ruguru, Syria, Yemen, Sudani, Libya, Afghanistan, Guinea-Bissau na Venezuela.

Umuyobozi wa Transparency International Rwanda, Ingabire Marie Immaculée
Transparency International, ishami ry'u Rwanda ryerekana aho u Rwanda ruhagaze mu kurwanya ruswa
Inzego zitandaukanye zikurikiranira hafi kurwanya ruswa zari zitabiriye imurikwa ry'ubushakashatsi

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .