U Rwanda rwahize ibindi bihugu bya Afurika mu gutanga serivisi nziza

Yanditswe na Uwishyaka Jean Louis
Kuya 24 Kamena 2017 saa 11:30
Yasuwe :
0 0

Mu imurikabikorwa ryakozwe n’ibigo bya leta byo mu bihugu bitandukanye by’umugabane wa Afurika mu rwego rwo gutanga serivisi, u Rwanda rwaje imbere rwiharira ibihembo byatanzwe mu byiciro bijyanye no gutanga serivisi zinoze.

Ibyo bihembo byatangiwe mu musangiro waraye uhuje abari bitabiriye Inama Nyafurika y’iminsi itatu ku kunoza serivisi yateraniye mu Rwanda kuva ku wa 21 Kamena isozwa ku wa 23 Kamena, itariki yanahuriranye n’ibirori byo kwizihiza Umunsi w’abakozi ba leta ku mugabane wa Afurika.

Abitabiriye iyi nama, bagize umwanya wo kumurika ibikorwa bitandukanye ndetse bimwe binagenerwa ibihembo.

Ibihembo byatanzwe mu byiciro bine birimo ibigo byahize ibindi mu gukorera mu mucyo no korohereza ababigana, ibyahize ibindi mu kugaragaza gahunda zifatika ziteza imbere urubyiruko, ibyayoboye ibindi mu kumurika ibikorwa byiza n’ibyagaragaje akarusho mu guhanga udushya mu mitangire ya serivisi. Muri ibi byiciro byose, u Rwanda rwagiye rubonamo ibihembo byahawe ibigo bitandukanye bya leta.

Mu cyiciro cy’abamuritse ibikorwa byiza, Urwego rw’Abinjira n’Abasohoka rwaje ku mwanya wa gatatu, Ikigo cy’Igihugu cy’imirimo imwe n’imwe ifitiye igihugu akamaro (RURA) cyabaye icya kabiri mu gihe Urwego rw’Igihugu rushinzwe abakozi ba leta muri Zimbabwe ari rwo rwabaye urwa mbere.

Mu cyiciro cy’abashyizeho gahunda ziteza imbere urubyiruko, umwanya wa gatatu wegukanywe n’ikigo cy’abanya-Kenya, umwanya wa kabiri ufatwa n’Umujyi wa Kigali mu gihe iki cyiciro nabwo cyayobowe n’Abanya-Kenya.

Mu cyiciro cy’abagaragaje udushya mu mitangire ya serivisi, Ikigo gifite mu nshingano guhanga udushya muri Afurika y’Epfo nicyo cyafashe umwanya wa gatatu, Urwego rw’Abinjira n’abasohoka mu Rwanda rwegukanye umwanya wa kabiri mu gihe Ikigo cyo muri Namibia ari cyo cyahize ibindi.

Mu cyiciro cy’ikigo gikorera mu mucyo no korohereza abakigana ari nacyo cyari gikomeye, umwanya wa mbere wegukanywe Urwego rw’Abinjira n’abasohoka mu Rwanda, rukurikirwa n’Ikigo cyo muri Namibia naho RwandAir iza ku mwanya wa gatatu.

Mu bihembo 12 byatanzwe, ibigo binyuranye byo mu Rwanda byihariye ibihembo bitandatu, Kenya itwaramo bibiri, Namibia bibiri, Afurika y’Epfo na Zimbabwe zitwaramo kimwe kimwe.

Urwego rw’Abinjira n’abasohoka mu Rwanda rwihariye ibihembo bitatu muri 12 byatanzwe, rwatangaje ko rubikesha imiyoborere myiza , gahunda rwashyizeho zorohereza abarugana no gukora ibyifuzwa na bo.

Umuyobozi ushinzwe ikoranabuhanga muri uru rwego, Umugwaneza Pascale, yagize ati “Mu imurika bikorwa twari twateguye ku buryo tugaragaza uburyo ikigo cyakoze ngo cyegere abaturage, tugaragaza uburyo ibyo dukora byose tubanza kubaza abaturage, ibitekerezo baduhaye tukaba ari byo dushyira muri gahunda zacu z’ibikorwa.”

Umugwaneza asobanura ko uru rwego rwashyizeho gahunda yo kugaragaza serivisi rutanga n’ababishinzwe ahanini rwifashishije imbunga nkoranyambaga ku buryo n’ugize icyo abasobanuza bahita bamusubiza n’uhageze agahita ahabwa serivisi mu buryo bwihuse.

Yavuze kandi ko kwimakaza ikoranabuhanga mu byo bakora ndetse no ku mipaka aho uru rwego rukorera, na byo biri mu byabahesheje ibihembo kuko ryorohereje abayinyuraho baba abanyarwanda n’abanyamahanga bagenderera u Rwanda.

Minisitiri w’Abakozi ba leta n’umurimo, Uwizeye Judith, yavuze ko ari ibyishimo ndetse bikaba n’iby’agaciro k’u Rwanda kuba rubashije kwegukana ibihembo byinshi mu byahatanirwaga, ashimangira ko bishingiye ku miyoborere myiza ihora yimakaza gutanga serivisi inoze.

Ati “U Rwanda nirwo rwatwaye ibikombe byinshi kurusha ibindi bihugu ariko ibanga nta rindi ni ubuyobozi bwiza bugerageza kugenda bukagera no ku nzego zacu ku buryo usanga mu gihugu cyacu ibintu bimeze neza haba mu buryo bwo gutanga serivisi zinoze kandi zifite ireme, kwakira neza abatugana, rwagaragaje ko ruri mu bihugu bya mbere muri Afurika.”

Minisitiri Uwizeye yavuze ko kuba abatangaga amanota ari abanyamahanga ariko ibihembo bigahabwa u Rwanda ari byinshi bigaragaza ko nabo hari ibyo babonye rumaze guteraho intambwe igaragara.

Muri iyi nama yari iteraniye i Kigali, abayitabiriye bafashe imyanzuro irimo guha rugari urubyiruko kugira ngo rwinjire mu rwego rw’imirimo ya leta kugira ngo rufashe mu guhanga udushya no gutanga serivisi zinoze kandi zihuse ku mugabane wa Afurika.

Muri miliyari imwe na miliyoni 200 zituye uyu mugabane, urubyiruko rwihariyemo 65%. Abitabiriye iyi nama kandi biyemeje gushyira imbere ikoreshwa ry’ikoranabuhanga mu kazi kabo ka buri munsi hagamijwe kuzana impinduka nziza kuri uyu mugabane.

Minisitiri w'Abakozi ba Leta n'Umurimo, Uwizeye Judith n'abandi bayobozi batandukanye bari bitabiriye ibi birori
Ibi birori byari byitabiriwe n'abantu baturutse mu bihugu bitandukanye
Itorero ribyina imbyino Nyarwanda basusurukije abari bitabiriye Umunsi Nyafurika w'Abakozi ba leta
Abakaraza nabo bari babukereye mu gushimisha abari bitabiriye ibyo birori
Minisitiri ushinzwe imirimo y'Inama y'Abaminisitiri, Stella Ford Mugabo n'uw'Abakozi ba leta n'umurimo, Judith Uwizeye, nibo batanze ibihembo ku bigo byitwaye neza
RURA yegukanye umwanya wa kabiri mu bigo byamuritse ibikorwa byiza
Urwego rushinzwe abinjira n'abasohoka mu Rwanda rwihariye ibihembo bitatu muri 12 byatanzwe
Abanya-Kenya nabo batwaye ibihembo bibiri muri 12 byatanzwe
Abanya-Afurika y'Epfo babashije gutahukana igihembo mu cyiciro cy'abagaragaje udushya mu mitangire ya serivisi
Minisitiri Uwizeye Judith yashimangiye ko ibihembo u Rwanda rwahawe byerekana ko hari intambwe igaragarira abandi rumaze gutera mu gutanga serivisi
Minisitiri Mugabo yasabye ko ikoreshwa ry'ikoranabuhanga ryashyirwamo ingufu mu rwego rwo guteza imbere Afurika
Abanyamahanga bitabiriye Inama Nyafurika ku itangwa rya serivisi bahawe impano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza