Storykast yatangije irushanwa rigamije kuzamura abafite impano mu gufotora

Yanditswe na Iradukunda Serge
Kuya 17 Nzeri 2020 saa 07:55
Yasuwe :
0 0

Ikigo kizobereye mu gufata amafoto, gutunganya amashusho ndetse no gushushanya bya gihanga (graphics), StoryKast, cyatangije irushanwa rizafasha urubyiruko ruri hagati y’imyaka 16 na 29 kwerekana ubuhanga bwarwo mu gufotora; abazatsinda bakazahabwa ibihembo bitandukanye ari nako bimurikira isoko.

Ni irushanwa ryiswe “Capture Rwanda”, aho abafite inzozi zo kuba abantu bafata amafoto b’umwuga, bazahatana mu gufata amafoto meza.

Muri iri rushanwa, abahatana bazafata amafoto y’ikintu runaka bashaka, inyamaswa, ahantu, igikorwa n’ibindi bashobora kubona mu buhanga bwabo, ubundi babishyire ku rubuga rwa StoryKast rugenewe iri rushanwa, (https://www.storykast.rw/capturerwanda/?-TERMS-) kugira ngo asuzumwe n’inzobere zizaba zishinzwe gutorana abazatsinda muri aya marushanwa.

Kugira ngo ifoto igire amahirwe yo gutsinda, igomba kuba ifite igisobanuro cyihariye kivuga ku Rwanda, icyo gisobanuro kikazagaragazwa n’uwayifotoye mu nyandiko nto azayiherekesha.

Ikindi cy’umwihariko ni uko amafoto yose azafatwa agomba kuba ari umwimerere kandi afite umwihariko.

Abafotozi kandi ntibagomba kwigora bashaka ibikoresho bihenze, kuko iri rushanwa ritazibanda ku bushobozi bw’ibikoresho byakoreshejwe, ahubwo rizita cyane ku buhanga mu kubara inkuru binyuze mu mafoto, umwimerere ndetse n’ibisobanuro bw’igitekerezo kiri mu ifoto, n’ubwo yaba yafashwe na telefoni cyangwa ikindi gikoresho kidahambaye.

Birumvikana ariko na none ko hakenewe ifoto nziza igaragara, kugira ngo abacamanza b’irushanwa bazabone aho bahera batanga amanota.

Ku bazatsinda iri rushanwa, uwa mbere azegukana ibihumbi 300 Frw, umukurikiye ahabwe ibihumbi 200 Frw, naho uwa gatatu ahabwe ibihumbi 100 Frw.

Umuyobozi wa StoryKast, Olga Ines, yabwiye IGIHE ko iri rushanwa ryatekerejwe mu rwego rwo gufasha abana bari mu biruhuko ndetse n’abandi batakaje imirimo muri ibi bihe bikomeye bya Coronavirus, kugira ngo bakomeze kwihugura, ari nako bagira amahirwe yo gutsindira amafaranga.

Yavuze ko iri rushanwa ari irya mbere rigenewe gusa abafata amafoto bo mu Rwanda, ku buryo rizafasha abari muri uyu mwuga kurushaho kumenyekana ndetse no kwinjiza amafaranga.

Ati “Umwuga wo gufotora ntabwo uratera imbere mu Rwanda kandi ukunzwe na benshi, twazanye iri rushanwa rero kugira ngo abantu bari mu mwuga wo gufotora bamenyekane, noneho babone ubufasha, ubwa mbere bukazaba kubona aho berekanira ubuhanga bwabo”.

Yongeyeho ko atari ibyo gusa, ahubwo “bazafashwa mu buryo bw’amafaranga kandi barusheho gukorerwa ubuvugizi kugira ngo ibihangano byabo birusheho kubyazwa umusaruro”.

Olga yamaze impungenge abazitabira iri rushanwa badafite ubushobozi, ko bazashingira ku buhanga bw’umuntu aho kuba igikoresho runaka.

Ati “Umuntu ashobora gukoresha igikoresho gihambaye [nka camera], agafata ifoto isa neza ariko idafite umwihariko, idafite ikintu kidasanzwe. Nyamara hari n’undi ushobora gukoresha telefoni ye, ariko agafata ifoto ifite umwihariko wayo, ifite ubutumwa, ifite imiterere yihariye itandukanye n’iy’andi mafoto, rero tuzareba ubuhanga bw’umuntu, aho kuba igikoresho.”

Yongeyeho ko “tuzibanda ku kureba umwihariko n’umwimerere w’ifoto kurusha ibindi byose. Icyakora, turashishikariza abazitabira iri rushanwa kuzakoresha ibikoresho bizatuma umwihariko uri mu mafoto yabo ugaragara neza”.

Irushanwa rya “Capture Rwanda” ribaye ku nshuro ya mbere, ariko StoryKast ikaba ivuga ko ifite intego yo kuzarikomeza no mu myaka iri imbere, mu rwego rwo kubahisha umwuga w’ubufotozi.

Gutanga amafoto bizakorwa guhera ku wa 16 Nzeri 2020 kugera ku wa 16 Ugushyingo 2020.

Iri rishanwa rizaterwa inkunga na IGIHE Ltd.

Abahanga basobanura ko ifoto itanga igisobanuro kiruta amagambo. Muri iri rushanwa, amafoto afite icyo asobanuye niyo azahembwa
Abazitabira barashishikarizwa gufotora buri kintu cyose babona mu Rwanda, ariko ifoto ikaba itanga ubutumwa runaka
Iri rushanwa rigamije guteza imbere impano z'abashobora kubara inkuru bifashishije amafoto

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .