00:00:00 IGIHE NETWORK KN KINYARWANDA EN ENGLISH FR FRANCAIS

Senateri Bob Menendez yashatse gutokora u Rwanda yirengagije umugogo uri mu jisho rye

Yanditswe na Iradukunda Serge
Kuya 24 July 2022 saa 11:47
Yasuwe :

Bob Menendez uhagarariye Leta ya New Jersey muri Sena ya Leta Zunze Ubumwe za Amerika aherutse kwandika ibaruwa asaba igihugu cye gukura amaboko ku Rwanda no guhagarika ubufasha bwose cyarugeneraga ngo kuko ‘abayobozi barwo bafite ibyaha byinshi bakoze bishimangirwa n’itabwa muri yombi rinyuranyije n’amategeko rya Paul Rusesabagina’.

Mu ibaruwa uyu mugabo na bagenzi be bahuriye muri komisiyo ishinzwe ububanyi n’amahanga muri Sena baherutse koherereza Umunyamabanga wa Leta ushinzwe Ububanyi n’Amahanga muri Leta Zunze Ubumwe za Amerika, Antony Blinken, bagaragaje u Rwanda n’abayobozi barwo nk’abantu badashobotse iki gihugu gikwiye kwitandukanya nabo.

Muri iyi baruwa Bob Menendez na bagenzi be bavuga ko bafashe umwanzuro wo kwandikira Antony Blinken kubera “impungege batewe no kuba Guverinoma y’u Rwanda ikomeje guhonyora amahame ya Demokarasi n’uburenganzira bwa muntu, bityo ko Amerika ikwiye kuvugurura politike yayo mu bijyanye n’ububanyi n’amahanga”.

Uyu mugabo winjiye muri Sena ya Leta Zunze Ubumwe za Amerika mu 2006 akomeza avuga ko “Perezida Kagame ari umuntu ukandamiza itangazamakuru, impirimbanyi z’uburenganzira bwa muntu ndetse n’abatavuga rumwe na Leta bari imbere mu gihugu kandi ko ari ibintu bimaze kumenyekana ahantu hose.”

Mu buryo busa nko guharabikana, aba basenateri bakomeza bavuga ko abanyamakuru n’abandi bantu bagerageje kurwanya ‘icyemezo’ cyo kuvugurura ingingo y’Itegeko Nshinga kugira ngo Perezida Kagame yongere kwiyamamaza bafunzwe, abandi baburirwa irengero, ibintu batagaragariza ibimenyetso.

Ibyatangajwe na Bob Menendez bihabanye n’ukuri kuko icyemezo cyo kuvugurura Itegeko Nshinga ry’u Rwanda mu ngingo ya 101 cyaturutse ku busabe bw’abaturage binyuze mu Nteko Ishinga Amategeko, gusa ibi byose arabyirengagiza akagaragaza ko ari icyemezo cyari kinyuranye n’ugushaka kw’abaturage.

Ikindi kirego Bob Menendez azamura muri iyi baruwa ngo ni uko ubuyobozi bw’u Rwanda bucura kandi bugashyira mu bikorwa imigambi yo kugirira nabi abatavuga rumwe nabwo bahungiye mu bihugu nka Afurika y’Epfo, Mozambique, Uganda na Kenya ndetse bukaba bwaratangiye kototera ababa mu bihugu by’i Burayi na Leta Zunze Ubumwe za Amerika. Kimwe n’ibindi birego, iki nacyo nta bimenyetso simusiga cyatangiwe.

Mu gukomeza kugaragaza ko igihugu cye kijenjeka ku byemezo gifatira u Rwanda, Senateri Bob Menendez yakomeje avuga ko cyirengagije uruhare u Rwanda ruri kugira mu bibazo by’umutekano muke uri muri RDC.

Uyu mugabo avuga ko u Rwanda rukomeje gushyigikira M23 kandi ko gahunda yarwo yo guhungabanya RDC rwayitangiye ubwo rwoherezagayo abasirikare mu myaka ya 1990.

Ibi bigaragaza uku bogama kwa Bob Menendez kuko nta na hamwe agaragaza impamvu u Rwanda rwafashe iki cyemezo n’imyaka rwamaze rugaragariza amahanga ko rubangamiwe n’abasize bakoze Jenoside mu 1994 bagahungira muri RDC ndetse bagatuzwa hafi n’imbibi bafite intwaro.

Yashyigikiye amabi yakozwe na Rusesabagina

Kimwe n’abandi benshi bakomeje gusaba ko Rusesabagina arekurwa, Bob Menendez nawe yirengangije ibibi byakozwe n’uyu mugabo ufungiye mu Rwanda kubera uruhare yagize mu bitero by’iterabwoba byibasiye abaturage barimo abo muri Nyabimata, bashimangira ko ari umuturage wa Leta Zunze Ubumwe za Amerika urengana ukwiriye kurekurwa.

Avuga ko Rusesabagina yatawe muri yombi mu buryo bunyuranyije n’amategeko. Nta na kimwe avuga ku magambo Rusesabagina ubwe yivugiye avuga ko agiye gushoza intambara ku Rwanda.

Muri iyi baruwa avuga ko “u Rwanda ari cyo gihugu cyo nyine gifunze umuturage (Rusesabagina) wa Leta Zunze Ubumwe za Amerika mu buryo bunyuranyije n’amategeko, bityo ko bifuza kumenya icyo Minisiteri y’Ububanyi n’Amahanga iri gukora ngo icyemure icyo kibazo.”

Iyi baruwa ikomeza ivuga ko iyo Amerika iza kuba izirikana ibi byaha byakozwe n’u Rwanda “Ambasade ya Amerika i Kigali itari gushyira hanze ifoto igaragaza umuyobozi ushinzwe ibikorwa by’ingabo za Amerika muri Afurika, Chargé d’Affaires bari kumwe na Perezida w’u Rwanda n’abandi basirikare bakuru muri RDF”.

Aha yagarukaga ku ifoto yafashwe kuwa 19 Gicurasi 2022, ubwo Perezida Kagame yakiraga umuyobozi ushinzwe ibikorwa by’ingabo za Amerika muri Afurika, Lt Gen Stephen Townsend. Icyo gihe yari aherekejwe na Chargé d’Affaires wa Ambasade ya Amerika mu Rwanda Deb MacLean ndetse n’Umugaba Mukuru w’Ingabo z’u Rwanda, Gen Jean Bosco Kazura.

Ibi Senateri Bob Menendez abiheraho avuga ko imyitwarire y’igihugu cye ku Rwanda idakwiriye kuko cyakabaye kirufatira ibyemezo bikomeye birimo.

Mu byemezo yasabwe ko bifatwa harimo guhagarikira u Rwanda inkunga n’ubundi butwererane bwose Amerika ifitanye narwo ndetse no gukuriraho Visa abayobozi barwo nk’uko byagiye bigenda ku bihugu nk’u Bushinwa na Belarus.

Yirengagije umugogo uri mu jisho rye

Ibyakozwe na Senateri Bob Menendez bifatwa nko gushaka gushinja amakosa n’ibyaha u Rwanda kandi yirengagije ibibazo bikomeye afite mu gihugu cye biturutse ku byaha bya ruswa, iyezandonke, itonesha no gufata ku ngufu umwangavu yashinjwe.

Mu 2015 nibwo uyu mugabo yashinjwe n’urukiko ibyaha bya ruswa no gukoresha ububasha ahabwa n’amategeko mu nyungu ze bwite.

Bivugwa ko Bob Menendez mu gihe yiyamazaga yafashijwe cyane n’umuganga w’amaso wo muri Florida witwa Salomon Melgen wamuteye inkunga y’arenga ibihumbi 750$. Uyu mugabo kandi yagiye aha Menendez impano zihenze n’amatike y’indege yo kujya kuruhukira ahantu hatandukanye harimo muri Repubulika y’Aba-Dominican n’i Paris mu Bufaransa.

Mu kumwitura, Bob Menendez yakoresheje umwanya afite mu gushyira igitutu kuri Leta Amerika ngo ifate ibyemezo biri mu nyungu z’iyi nshuti ye.

Bob Menendez yashinjwe kandi kuba yaragiye agira uruhare mu guhesha Visa abakobwa b’amahabara ya Dr Melgen kugira ngo bamusange muri Leta Zunze Ubumwe za Amerika nawe akamwitura kumutiza indege ye bwite igihe afite urugendo.

Aya makosa yose yaje gutuma hafatwa icyemezo cy’uko uyu mugabo aba ahagaritswe by’agateganyo muri komite ishinzwe ububanyi n’amahanga cyane ko hari hatangiye igitutu cy’abamusaba kwegura.

Dr Melgen yaje guhamywa ibyaha byo kunyereza ibikoresho by’ubuvuzi bifite agaciro ka miliyoni 73$ akatirwa gufungwa imyaka 16, gusa iki kirego byaje kwanzurwa ko cyo ntaho gihuriye na Bob Menendez.

Mbere y’ibi birego mu 2012, hari abandi bantu bajyanye Bob Menendez mu nkiko bamushinja kuba yararyamanye n’abana bane bataruzuza imyaka y’ubukure ubwo yari mu biruhuko muri Repubulika y’Aba-Dominican. Ibi birego byongeye kubyuka mu 2018 gusa FBI iza gutangaza ko iri kubikoraho iperereza.

Nubwo Bob Menendez yaje kugirwa umwere n’inkiko, Komite ishinzwe imyitwarire muri Sena ya Amerika yamushyizeho ubusembwa ndetse imusaba kwishyura impano zose yagiye ahabwa mu buryo bunyuranyije n’amategeko kuko zifatwa nka ruswa.

Hashingiwe ku birego Bob Menendez yagiye aregwa, umuntu ashobora kwibaza ku bunyangamugayo bwe muri ibi birego agereka ku Rwanda dore ko bikekwa ko nabyo byaba bifite aho bihuriye n’imyitwarire ye idahwitse, akaba abikoreshwa.

Senateri Bob Menendez yashatse gutokora u Rwanda yirengagije umugogo uri mujisho rye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .