00:00:00 IGIHE NETWORK KN KINYARWANDA EN ENGLISH FR FRANCAIS

RTDA yaremye agatima abategereje kaburimbo mu muhanda wa Nzove-Ruli-Gakenke

Yanditswe na Akayezu Jean de Dieu
Kuya 28 Ukwakira 2022 saa 07:24
Yasuwe :

Umuyobozi Mukuru w’Ikigo gishizwe guteza imbere ubwikorezi mu Rwanda, RTDA, Imena Munyampenda, yavuze ko inyigo ya kaburimbo igomba gushyirwa mu muhanda Nzove-Ruli-Rushashi-Gakenke yarangiye ndetse ibiganiro biganisha ku itangira ry’iyo mirimo bigeze kure.

Uyu muhanda wa kilomotero 68, 7 uturuka ahazwi nko ku Giti cy’Inyoni ukanyura mu Murenge wa Kanyinya mu Karere ka Nyarugenge, Shyorongi muri Rulindo ugakomeza mu Mirenge itandukanye y’Akarere ka Gakenke, irimo uwa Ruli mu Ntara y’Amajyaruguru.

Ni umuhanda abaturage bemerewe na Perezida Kagame. Ibice uyu muhanda unyuramo bikomeje guturwamo n’abantu benshi cyane ko ari hafi y’Umujyi.

Kuba utarashyirwamo kaburimbo, ni ibintu abaturage bavuga ko bibahangayikishije cyane ko mu gihe cy’impeshyi usanga urimo ivumbi ryinshi ku buryo bahorana impungenge zo kurwara indwara nk’igituntu. Hari abavuga ko bahorana inkorora n’ibicurane kubera ivumbi. Ni mu gihe kandi mu mvura nabwo haba hari ibyondo bishobora guteza impanuka.

Mu kiganiro yahaye IGIHE, Umuyobozi wa RTDA, Imena Munyampenda yavuze ko kugeza ubu imirimo ya mbere yari iteganyijwe mu kubaka uyu muhanda harimo gukora inzira z’amazi no gushyiramo latérite yarangiye.

Ku rundi ruhande ariko avuga ko imirimo yo gushyiramo kaburimbo yagombaga kuba yaratangiye muri Kamena uyu mwaka ariko kugeza ubu ntiratangira ku mpamvu asobanura ko zatewe no kuba inyigo yaratinze kurangira gukorwa ariko kuri ubu ikaba yararangiye.

Ati “Mu gihe hatangazwaga ko imirimo yo gushyiramo kaburimbo izatangira muri Kamena 2022, hari hari gukorwa inyigo kandi ubu iyo nyigo yararangiye.”

Munyampenda avuga ko kuri ubu ikigezweho ari ibiganiro hagati ya RTDA n’inzego zirimo Minisiteri y’Imari n’Igenamigambi ndetse na Minisiteri y’Ibikorwaremezo kugira ngo ingengo y’imari iteganyijwe gukoreshwa ibe yaboneka noneho imirimo ihite itangira.

Ati “Bitewe n’ikibazo cy’ingengo y’imari ikenewe, iyo mirimo ntiyabashije gutangirira igihe. Ubu hari gukorwa ibiganiro n’inzego zitandukanye zirimo MINECOFIN, na MININFRA kugira ngo haboneke ingengo y’imari ikenewe mbere y’uko imirimo yo kubaka itangira.”

Munyampenda ntabwo atangaza igihe imirimo izatangirira ariko yizeza abakoresha uyu muhanda n’Abanyarwanda muri rusange ko ibyo biganiro bizarangira n’imirimo yo gushyiramo kaburimbo igahita yanzika.

Abaturage bamaze imyaka bawutegereje

Iyo witegereje uyu muhanda uri mu Karere ka Nyarugenge, Rulindo na Gakenke, usanga ari umwe mu ikoreshwa cyane ariko nanone ukaba umwe mu mibi u Rwanda rushobora kuba rufite. Ni wo muhanda ukoreshwa n’imodoka ziva n’izijya ku bubiko bw’igihugu bw’imyaka mu Nzove.

Ni wo muhanda ukoreshwa n’amakamyo y’uruganda rwenga ibinyobwa rwa Skol Brewery Ltd, yaba ayajyanye ibikorwamo ibinyobwa n’ayabigemura hirya no hino mu gihugu, imodoka zitwara ibisheke, iz’uruganda rwa pulasitiki n’imisumari.

Ni na wo kandi ukoreshwa n’ikipe ikunzwe cyane mu gihugu ya Rayon Sports igiye cyangwa ivuye mu myitozo.

Ukiri mu gace ka Nzove, hari ububiko bwinshi ndetse n’abaturage bahatuye. Iyo ukomeje gake wegera aho Nyarugenge ihana imbibi na Rulindo, ni bwo utangira kwikanga bitewe n’imiturire ihari kuko hari n’abatebya bakavuga ko atari Nyabyondo ari Nyarutarama.

Bamwe mu baturage baherutse kuganira na IGIHE bagaragaje ko kuba uyu muhanda utarakorwa bibabangamiye bikomeye cyane ko nko mu gihe cy’ivumbi usanga bahora barwaye indwara ziterwa naryo.

Mukamana Jeanne yagize ati “Twese turwaye inkorora n’ibicurane by’ivumbi. Dufite ubwoba ko iri vumbi rizadutera igituntu cyangwa izindi ndwara.”

Butaha Jean Damascène ati “ Turajya kwa muganga buri munsi abana bashize barwara ibicurane. Ugeze kwa muganga wasanga abenshi ari ibicurane by’iri vumbi barwaye. Dukeneye ubufasha. Ikindi dusaba ni uko baduha imodoka ikatumeneramo amazi naho ubundi iri vumbi riratumerera nabi cyane.”

Inkuru bifitanye isano

Abaturiye uyu muhanda bavuga ko babangamirwa n'ivumbi ryinshi riba rihari mu gihe cy'izuba ryinshi
Mu gihe cy'impeshyi uyu muhanda uba urimo ivumbi ryinshi
Mu 2019 Minisitiri w'Intebe, Dr Ngirente Edouard yasuye uyu muhanda harebwa imirimo yo kuwubaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .