00:00:00 IGIHE NETWORK KN KINYARWANDA EN ENGLISH FR FRANCAIS

Amaso yaheze mu kirere! Umuhanda Nzove- Ruli-Gakenke wabaye agatereranzamba

Yanditswe na Cyprien Niyomwungeri
Kuya 29 July 2022 saa 12:43
Yasuwe :

Ni saa moya za mugitondo ku Giticyinyoni ku muhanda werekeza mu Nzove, abantu bose bafite ibitambaro barihungura ivumbi abandi barahanagura moto n’imodoka ngo barebe ko bakwinjira muri Kigali bafite agasura.

Abari mu modoka zitwara abagenzi za Jali Transport bitwikiriye ibitenge n’ibitambaro. Imodoka imbere n’inyuma ikirango ni ivumbi ndetse abayivuyemo bose babanje kwikubita ivumbi mu ruhame i Nyabugogo. Ngubwo ubuzima bw’abakoresha umuhanda Nzove-Ruli- Gakenke.

Iyo witegereje uyu muhanda uri mu Karere ka Nyarugenge, Rulindo na Gakenke, usanga ari umwe mu yikoreshwa cyane ariko nanone ukaba umwe mu mibi u Rwanda rushobora kuba rufite. Ni wo muhanda ukoreshwa n’imodoka ziva n’izijya ku bubiko bw’igihugu bw’imyaka mu Nzove.

Ni wo muhanda ukoreshwa n’amakamyo y’uruganda rwenga ibinyobwa rwa Skol Brewery Ltd, yaba ayajyanye ibikorwamo ibinyobwa n’ayabigemura hirya no hino mu gihugu, imodoka zitwara ibisheke, iz’uruganda rwa pulasiti n’imisumari.

Ni na wo kandi ukoreshwa n’ikipe ikunzwe cyane mu gihugu ya Rayon Sports igiye cyangwa ivuye mu myitozo.

Ukiri mu gace ka Nzove, hari ububiko bwinshi ndetse n’abaturage bahatuye. Iyo ukomeje gake wegera aho Nyarugenge ihana imbibi na Rulindo, ni bwo utangira kwikanga n’imiturire ihari kuko hari n’abatebya bakavuga ko atari Nyabyondo ari Nyarutarama.

Aka ni agace gatuwe cyane n’abantu bakorera i Kigali, ni umwe mu mijyi ikomeye y’akarere ka Rulindo, ifite abaturage benshi bafite ibinyabiziga, utibagiwe n’ibya Jali Transport biwunyuramo bitwaye abagenzi.

Abaturage bategereje uyu muhanda ko washyirwamo kaburimbo amaso ahera mu kirere
Urugendo rw'iminota 30 muri uyu muhanda ruba isaha

Amarira n’agahinda by’abaturage

Iyo witegereje uyu muhanda, ntibikugora kubona imvano y’amarira n’agahinda by’abawukoresha. Hari bamwe bawubatije igisoro, abandi bawita nyavumbi. Niba ushaka kujyayo n’imodoka, irinde kugendera ku muvuduko wa kilometero 20 ku isaha kandi witegure kugenda uhagarara ushakisha uko waca mu binogo.

Niba ushaka kugendera ku muvuduko wa kilometero 40 ku isaha, ba uhamagara umukanishi kandi witwaze ikofi ibyimbye kuko imodoka uzayigezayo ari ubushwange. Ngako agahinda ka Jali Transport n’abafite imodoka zabo bwite bakoresha uyu muhanda.

Umwe mu bashoferi ba Jali Transport waduhaye amakuru, yavuze ko imodoka ziri hagati y’eshanu n’umunani bashyiramo ku munsi, nibura ebyiri cyangwa eshatu zitagaruka iyo bukeye kuko ziba zapfuye.

Ati “Uyu munsi turimo gukoreshamo imodoka enye kuko izindi zarapfuye, duhora mu magaraje ni yo mpamvu abagenzi babura imodoka”.

Niba ushaka gukoresha imodoka rusange muri uyu muhanda, itegure amasaha abiri kuzamura yo gutonda umurongo kubera imodoka nkeya zirimo ugereranyije n’ubwinshi bw’abagenzi.

Uwitwa Mukamana Jeanne utuye muri Nyabyondo yabwiye IGIHE ko bidatangaje kubona umuntu ugera ku murongo saa kumi n’ebyiri akagera mu kazi saa mbili n’igice. Mu gutaha byo ngo birashoboka ko wagera ku murongo izuba riva ukawuvaho saa tatu z’ijoro.

Ati “Abantu dutonda umurongo amaguru akaturya akazamo ibinya. Abafite intege nke banikubita hasi. Imodoka ni nkeya bitewe nuko zicwa n’umuhanda”.

Mu gihe cy’impeshyi, ibyo kurimba ntabwo bibarizwa ku bakoresha umuhanda Nzove-Ruli. Ivumbi riba ari ryinshi ku rwego rw’uko iyo uhagaze hakurya ushobora gukeka ko habaye amasiganwa y’imodoka [Rallye] kandi ari imodoka zisanzwe.

Iri vumbi ni ikibazo gikomeye kuko uretse guhindanya abaturage rinabatera indwara. Muri iyi minsi biragoye gusanga umuntu ukoresha uyu muhanda utarwaye inkorora iryana mu muhogo n’ibicurane. Ibi biteye impungenge cyane abaturage.

Mukamana ati “Twese turwaye inkorora n’ibicurane by’ivumbi. Dufite ubwoba ko iri vumbi rizadutera igituntu cyangwa izindi ndwara.”

Butaha Jean Damascène utuye mu mudugudu wa Bwiza mu Kagari ka Nzove, avuga ko ikibazo bafite cy’ivumbi kibarembeje, agasaba ko babashyiriramo umuhanda wa kaburimbo.

Ati “Turajya kwa muganga buri munsi abana bashize barwara ibicurane. Ugeze kwa muganga wasanga abenshi ari ibicurane by’iri vumbi barwaye. Dukeneye ubufasha. Ikindi dusaba ni uko baduha imodoka ikatumeneramo amazi naho ubundi iri vumbi riratumerera nabi cyane”.

Bitewe n’iterambere riri mu bice bikikije uyu muhanda, ku nkengero zawo hari ibikorwa by’ubucuruzi. Ibicuruzwa byo muri za boutique, intebe zo mu tubari usanga zuzuye ivumbi.

Gutega moto muri uyu muhanda ni ukwiyemeza kugera aho ugiye wahindutse ivumbi gusa
Iyo hanyuzeho imodoka ni gutya buri wese asahaka aho akinga umunwa

Amaso yaheze mu kirere

Iyo ugeze mu modoka yo muri uyu muhanda, biragoye kurenga metero 100 ntawukomoje kuri uyu muhanda. Hari abo usanga bavuga ko abana babyaye babwirwa ko ugiye kubakwa ubu biga mu mwaka wa Gatatu w’amashuri abanza.

Muri Werurwe umwaka ushize wabonaga buri wese afite agatwenge, ni nyuma y’uko Minisiteri y’Ibikorwaremezo, Mininfra, yari yatangaje ko uyu muhanda wa kilomotero 68,7 gushyiramo kaburimbo biteganyijwe gutangira muri Kamena 2021.

Icyo gihe Mininfra yanditse kuri Twitter iti “Guhera muri iki cyumweru imirimo yo gusana umuhanda Nzove-Ruli-Gakenke izatangira, irangire mu mpera za Werurwe. Hazibandwa ku gusiba ibinogo, gukemura ikibazo cy’amazi areka no gushyiramo laterite. Gushyiramo kaburimbo bizatangira muri Kamena uyu mwaka”.

Kuva ibi bitangajwe hashize amezi 16 nta gikozwe. Ibi byatumye muri Mata uyu mwaka abaturage bongera kubaza aho ikorwa ry’uyu muhanda rigeze.

Umuyobozi Mukuru Ushinzwe Imyubakire mu Mujyi wa Kigali, Asaba Katabarwa Emmanuel, yatangaje ko mu ngengo y’imari y’umwaka utaha [watangiye muri uku kwezi] ari bwo uzashyirwamo kaburimbo.

Ati “Ni umuhanda koko uzenguruka mu Mujyi wa Kigali kandi ubona ufite ikibazo ukwiye gukorwa bitewe n’uko kariya gace kagenda gatera imbere. Ubu rero turimo turavugana n’ Ikigo cy’Igihugu gishinzwe gutunganya Imihanda, RTDA, ngo turebe ko mu ngengo y’imari itaha bazawushyiramo, ubu turimo turakorana kugira ngo turebe uburyo ki wakorwa.”

Imodoka zitwara abagenzi iyo uyinjiyemo bigusaba kwitwaza icyo kwitwikira kubera ivumbi
Amakoma yahinduye isura kubera ivumbi
Uyu muturage avuga ko abana barwaye inkorora n'ibicurane bidakira kubera ivumbi

Uyu mwaka ushobora…

Mu kiganiro IGIHE yagiranye na Meya w’Akarere ka Gakenke, Nizeyimana Jean Marie Vianney, yavuze ko uyu muhanda hari icyizere ko watangira gukorwa muri uyu mwaka w’ingengo y’imari.

Ati “Washyizwe mu ngengo y’imari y’uyu mwaka turimo dutangira, twizeye ko hari igihe uyu mwaka watangira gukorwa. Amakuru dufite kandi twizeye ni uko wari washyizwe mu ngengo y’imari y’uyu mwaka”.

Hari amakuru avuga ko uyu muhanda waba warimuriwe ahazwi nko ku Kirenge. Meya Nizeyimana, yabihakanye avuga ko ibitekerezo bihari ari uko uzanyuzwa ku Munindi ugakomeza Muhondo aho kujya i Ruli.

Ati “Amakuru duheruka ubwo twatahaga urugomero kuri Nyabarongo, uzanyura ku Munindi, ariko wagera ku rugomero byagaragaye ko utanyura mu rugomero hagati, uzazamuka uce Muhondo, ujye Rushashi ukomeze i Ruli ikindi gice kive Rushashi kijye mu Gakenke”.

Kuri ubu umuhanda uva ku Munindi ujya i Muhondo watangiye gukorwa n’ikigo gikora urugomero ariko uzashyirwamo kaburimbo mu gihe n’ikindi gice gituruka mu Nzove kizaba kirimo gukorwa.

Minisitiri w’ubutegetsi bw’Igihugu, Gatabazi Jean Marie Vianney, mu mpera z’icyumweru gishize ubwo yari kuri Paruwasi ya Rutonde, yijeje ko uyu muhanda ushobora gukorwa.

Ati “Ibyo mwavuze by’umuhanda natwe twabibonye twawunyuzemo, ubwo twumvise, banambwiraga ko na bisi zigarukira i Rutonde ntizigere Kijabagwe…ibyo byose twabibonye kandi ntabwo twaje tureba hasi gusa twarebye no mu mpande”.

Yakomeje agira ati “Nyakubahwa Perezida wa Repubulika ibyo yabijeje bigomba kugerwaho kandi mu byo yabijeje harimo n’uyu muhanda, ugomba gukorwa. Reka twizere ko mu gihe cy’ubupadiri bw’umwaka utaha tuzaba tutakigenda mu muhanda usa nk’uriya”.

Uyu muhanda uturuka ahazwi nko ku Giticyinyoni ukanyura mu Murenge wa Kanyinya mu Karere ka Nyarugenge werekeza i Shyorongi muri Rulindo ugakomeza mu Mirenge itandukanye y’Akarere ka Gakenke, irimo uwa Ruli.

Imodoka nini nazo zikoresha uyu muhanda
Abagenda n'amaguru ni ukurya ivumbi ubundi inkorora n'ibicurane bikabataha
Uko biba bimeze iyo imodoka inyuzeho, aha ni ku ivuriro igeze
Abaturage bakomeje gutegereza ko uyu muhanda washyirwamo kaburimbo
Imodoka zigenda zitumura ivumbi ridasanzwe
Ni umuhanda ukoreshwa n'imodoka z'ubwoko bwose

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .