RSSB yakebuye abakoresha bibwira ko ubwiteganyirize butareba ba nyakabyizi

Yanditswe na Ferdinand Maniraguha
Kuya 16 Ukwakira 2020 saa 12:27
Yasuwe :
0 0

Ikigo cy’Igihugu gishinzwe ubwiteganyirize (RSSB) cyahwituye abakoresha bakunze kwibwira ko ubwiteganyirize bw’abakozi bureba abakozi bafite amasezerano, bakirengagiza abadafite amasezerano cyangwa ba nyakabyizi.

Byatangajwe kuri uyu wa Gatatu mu mahugurwa y’iminsi ibiri yabereye mu Karere ka Nyagatare agamije kumenyekanisha zimwe mu nshingano za RSSB, nk’ikigo gishinzwe ubwiteganyirize mu Rwanda.

Aya mahugurwa yari agamije kwibutsa abakozi n’abakoresha uburenganzira, inshingano ndetse n’ibyo bagenerwa bijyanye n’ubwiteganyirize.

Nzamurambaho Sylvain uhagarariye RSSB muri Nyagatare, yavuze ko ubwiteganyirize bw’abakozi ari itegeko ku muntu wese ukora cyangwa ukoresha abandi mu Rwanda.

Yavuze ko hari bamwe mu bakoresha bakunze kubirengaho cyangwa batabisobanukiwe, bakumva ko abo bagomba gutangira ubwiteganyirize ari abo bafitanye amasezerano gusa.

Ati “Hari aho bajya bibeshya bakavuga ngo ni umukozi ufite amasezerano ahoraho, abakoresha bamwe na bamwe bajya bibeshya ko bene abo badatangirwa imisanzu. Uwitwa umukozi uwo ari we wese yaba afite amasezerano yanditse cyangwa atanditse, yaba uhoraho cyangwa nyakabyizi bagomba kumenya ko niba yakoze agahembwa, agomba no gutangirwa ubwiteganyirize bw’abakozi.”

Nzamurambaho yavuze ko mu gihe bidakozwe, umukozi na we afite inshingano zo kubimenyekanisha kugira ngo bikorwe, bitaba ibyo umukoreshwa agahanwa.

Yavuze ko nubwo abantu benshi badakunze kubiha agaciro, nyamara ari bimwe mu bigira ingaruka ku bakozi igihe bagiye kwivuza cyangwa bageze mu zabukuru, bikanagira ingaruka ku gihugu.

Igika cya mbere n’icya kabiri cy’ingingo ya kane mu itegeko rigenga imitunganyirize y’ubwiteganyirize bwa pansiyo ryo mu 2015, ivuga ko abarebwa no gutanga pansiyo ari abakozi bose bagengwa n’itegeko rigenga umurimo mu Rwanda igihe bakora mu Rwanda hatitawe ku bwenegihugu, imiterere y’amasezerano, igihe azamara cyangwa se ingano y’umushahara; n’abakozi bagengwa na sitati rusange igenga Abakozi ba Leta n’abakozi ba Leta bagengwa na sitati zihariye.

Ingingo ya 12 y’iryo tegeko ivuga ko umukoresha utamenyekanisha cyangwa udatanga umusanzu mu gihe gitegetswe acibwa ibihano byo mu rwego rw’ubutegetsi by’ubukererwe nta gukomatanya, bingana na (1,5% buri kwezi k’ubukererwe ku misanzu yose itaramenyekanishijwe cyangwa itaratanzwe ku gihe.

Umuyobozi w’Intara y’Ivugabutumwa ya Kabarore mu itorero ry’abadeventiste b’umunsi wa karindwi mu Rwanda, Rurangirwa Alphonse yavuze ko usanga abakozi benshi cyangwa n’abaturage muri rusange, bakunze kudaha agaciro ibijyanye no kwiteganyiriza, nyamara bikabagiraho ingaruka bashaje batagishoboye kubikora.

Ati “Akenshi hari igihe usanga batabiha agaciro, ugasanga abantu barabisuzugura tugatangira kubitekereza tumaze gutakaza imbaraga zo kubikora. Kwiteganyiriza ni byiza ku munyarwanda wese kandi igihe n’imyaka waba ufite iyo ariyo yose ugomba kwiteganyiriza.”

Umuyobozi w’icyiciro cy’abagore n’abakobwa mu itorero ry’abadiventsite mu gice cy’Iburasirazuba bw’amajyaruguru, Kayitesi Velene yavuze ko nyuma yo kumenya ibyiza byo kwiteganyiriza, agiye no kubitangiza ku bana be abicishije muri gahunda ya ‘Ejo Heza’.

Ati “Ndizera ko abana banjye nkwiriye gutangira kubateganyiriza kuko bizabagirira akamaro. Muri iki gihe kubika si ibintu byoroshye cyane cyane ko uko umuntu aba yakira amafaranga, niko n’ibiyatwara biba ari byinshi ariko iyo washyizheo iyl gahunda yo kwiteganyiriza ni ingenzi. Ngiye gutangirana n’uyu mwaka ugiye gutangira, mu bushobozi mfite nzateganyiriza abana kuko nati narabihaye agaciro.”

Ubwizigame bw’abanyarwanda ku kigereranyo cy’umusaruro mbumbe w’ubukungu bw’igihugu (GDP) buracyari hasi ku kigero cya 10.6%. Abanyarwanda bafite ubwiteganyirize bw’izabukuru bagera ku 8%.

Ni mu gihe kwiteganyiriza ni kimwe mu bizafasha u Rwanda kugera ku ntego yo kuzamura ubukungu bwarwo bukava ku rwego rw’ibihugu bikennye rukagera mu biyingayinga ibikize mu 2035 no kugera mu bikize mu cyerekezo cya 2050.

Bamwe mu bakozi n'abakoresha muri Nyagatare bahuguwe ku nyungu z'ubwiteganyirize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .