RBC yahawe igihembo mpuzamahanga kubera umuhate wayo mu kurwanya COVID-19

Yanditswe na Iradukunda Serge
Kuya 15 Ukwakira 2020 saa 08:14
Yasuwe :
0 0

Ikigo cya Kaminuza ya Colombia yo muri Leta Zunze Ubumwe za Amerika cyita ku Buzima, ICAP cyahaye Ikigo cy’Igihugu cy’Ubuzima (RBC) igihembo kubera umuhate n’ibikorwa by’indashyikirwa cyagaragaje mu guhangana n’icyorezo cya COVID-19.

RBC ihawe iki gihembo kizwi nka ‘Courage to Care’ nyuma yo gutoranywa mu bindi byinshi byo ku mugabane wa Afurika. Ni ibihembo bishobora guhabwa abantu ku giti cyabo cyangwa ibigo bitandukanye.

Ni igihembo RBC yashyikirijwe kuri uyu wa 14 Ukwakira 2020, mu muhango wabaye hifashishijwe uburyo bw’ikoranabuhanga.

Umuyobozi wa RBC, Dr Nsanzimana Sabin, yavuze ko iki gihembo kitagenewe RBC gusa ko ahubwo ari icy’u Rwanda rwose.

Ati “Iki gihembo ni icyo kuzirikana imbaraga n’ubushake bitari iby’ikigo kimwe gusa ahubwo bya guverinoma yose n’umusanzu ndetse no gushyira hamwe kw’abaturage n’ubufatanye mpuzamahanga bwiza.”

Yakomeje ashimira ICAP kuba yaratoranyije RBC ikayigenera iki gihembo. Ati “Uyu mwanya ni uw’ibyishimo ariko nanone ukaba uwo guca bugufi kuri twe nk’abantu baza imbere muri uru rugamba […] hari abantu bamara amajoro menshi bataryamye turashima ko mwafashe uyu mwanya no kuba mwaratoranyije RBC n’abakozi bayo, abantu bari gukora mu bitaro mu nshingano zitandukanye ni iby’agaciro n’umwanya wo kuvuga ngo murakoze.”

Mu byatumye RBC ihabwa iki gihembo hari kuba ubwo umuntu wa mbere urwaye COVID-19 yagaragaraga mu Rwanda yarihutiye gutangira gupima abantu ku bwinshi no kwita ku basanganwaga iki cyorezo ndetse u Rwanda ruri mu bihugu bya mbere byafunze imipaka binashyiraho gahunda ya guma mu rugo.

Indi mpamvu yatumye RBC ihabwa igihembo ni ubukangurambaga butandukanye yakoze igamije ko Abanyarwanda bose bagira amakuru kuri iki cyorezo kandi bakamenya uko bacyirinda. Kuba yarashyizeho amabwiriza yo kwirinda COVID-19 kandi igashyira imbaraga nyinshi mu gukurikirana uko yubahirizwa.

Mu bindi ICAP yashimiye RBC harimo kuba ubwo icyorezo cyageraga mu gihugu yarihutiye kubaka ubushobozi mu bijyanye no gufata ibipimo n’uburyo yagiye yimakaza ikoranabuhanga ririmo n’irya robot mu bikorwa bitandukanye bigamije kurwanya iki cyorezo.

Kugeza ubu mu bihugu bikiri mu nzira y’amajyambere u Rwanda ruza mubifata ibipimo byinshi bya COVID-19, aho ubu rugeze ku bushobozi bwo kuba rwafata ibipimo biri hagati y’ibihumbi birindwi n’ibihumbi 10.

Umuyobozi wa RBC, Dr Nsanzimana Sabin, yashimye ICAP yabageneye iki gihembo avuga ko ari icy'igihugu cyose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .