00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yakiriye Robert Pires na Ray Parlour muri Village Urugwiro (Amafoto)

Yanditswe na Israel Ishimwe
Kuya 9 Gashyantare 2022 saa 08:51
Yasuwe :

Perezida Kagame yakiriye muri Village Urugwiro, Robert Pires na Ray Parlour bamenyekanye cyane muri Arsenal FC, bagirana ibiganiro byihariye.

Umukuru w’Igihugu yakiriye aba banyabigwi kuri uyu wa Gatatu, tariki ya 9 Gashyantare 2022.

Bari baherekejwe n’imiryango yabo ndetse n’abayobozi batandukanye barimo Umuyobozi Mukuru w’Urwego rw’Iterambere, RDB, Akamanzi Clare n’Umunyamabanga Uhoraho muri Minisiteri ya Siporo, Shema Maboko Didier.

Perezida Kagame asanzwe ari umufana ukomeye w’Ikipe ya Arsenal yo mu Cyiciro cya Mbere mu Bwongereza kuva mu 1996. Avuga ko ayikundira umukino mwiza ikina yatsinda cyangwa igatsindwa.

Village Urugwiro yatangaje ko Umukuru w’Igihugu yakiriye Robert Pires na Ray Parlour banditse izina muri Arsenal FC kuri uyu munsi basojeho urugendo rwabo mu Rwanda.

Aba bombi bamaze iminsi itanu mu Rwanda mu bikorwa bifitanye isano n’amasezerano Ikipe ya Arsenal yasinyanye na RDB yo kwamamaza igihugu binyuze muri gahunda ya Visit Rwanda.

Basuye uduce dutandukanye mu gihugu berekwa ibyiza nyaburanga bigitatse. Batemberejwe muri Pariki y’Igihugu ya Nyungwe n’iy’Ibirunga.

Mbere yo guhura na Perezida Kagame mu gitondo cyo kuri uyu wa Gatatu Robert Pires na Ray Parlour bahuriye na bamwe mu bafana ba Arsenal mu Rwanda muri Kigali Serena Hotel.

Nyuma yo kwakiranwa ibyishimo n’abafana ba Arsenal muri Kigali Serena Hotel, Pires na Parlour babajijwe uko babonye ibice by’u Rwanda bagezemo, bavuga ko byari bitangaje.

Robert Pires yagize ati “Byari ibihe bidasanzwe kubona ingagi, kurira imisozi no kugera mu bice bitandukanye ndi kumwe n’inshuti n’umuryango wanjye.”

Kuri Parlour ngo ni ibihe byiza atazibagirwa kandi agomba gusangiza n’abandi kuko nta handi yabibonye.

Arsenal ifitanye umubano n’u Rwanda kuko kuva muri Gicurasi 2018, RDB yinjiye mu bufatanye bw’imyaka itatu n’iyi kipe, u Rwanda ruyibera umuterankunga wa mbere ku maboko y’imipira, aho yambara ‘Visit Rwanda’ ku kuboko kw’ibumoso ku ikipe nkuru, iy’abatarengeje imyaka 23 no mu y’abagore.

Icyo gihe ntihatangajwe amafaranga u Rwanda rwishyuye Arsenal ariko bivugwa ko amasezerano yasinywe afite agaciro ka miliyoni 30$.

Aya masezerano yatangiye kubahirizwa mu mwaka w’imikino wa 2018/19 watangiye muri Kanama 2018, bivuga ko yagombaga kurangirana n’uwa 2020/21 washyizweho akadomo muri Gicurasi 2021.

RDB yatangaje ko imyaka itatu y’imikoranire yatanze umusaruro, mu 2019, impande zombi zanzuye kongera igihe amasezerano yari kumara.

Mu mwaka wa mbere w’imikoranire, umusaruro w’ubukerarugendo bw’u Rwanda wiyongereyeho 17% ugera kuri miliyoni 498$ mu 2019 uvuye kuri miliyoni 425$ mu 2018. Ba mukerarugendo baturutse mu Burayi biyongereyeho 22% na 17% by’umwihariko abaturutse mu Bwongereza.

Ubukerarugendo ni rumwe mu nzego zifatiye runini u Rwanda kuko mu 2019 mu musaruro mbumbe wose w’igihugu, bwari bufitemo 10%. Muri uwo mwaka bwarwinjirije miliyoni 498$, mu gihe intego ya 2024 ni uko ruzabusaruramo miliyoni 800$.

Izindi nkuru wasoma:

  Robert Pires na Ray Parlour bari mu Rwanda

  Robert Pires na Parlour bishimiye u Rwanda, baganira n’abafana ba Arsenal (Amafoto)

Perezida Kagame yakiriye Robert Pires na Ray Parlour ku wa 9 Gashyantare 2022
Bagiranye ibiganiro byihariye byibanze ku ngingo zitandukanye
Perezida Kagame yari afite akanyamuneza ko kuganira n'abanyabigwi ba Arsenal FC yihebeye
Raymond Parlour w’imyaka 48 wamamaye muri Arsenal FC aganira na Perezida Paul Kagame

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .