Mu gitondo cyo kuri uyu wa Gatatu ni bwo Robert Pires na Ray Parlour bahuriye na bamwe mu bafana ba Arsenal mu Rwanda muri Kigali Serena Hotel.

Aba bagabo bombi bakiniye Arsenal, bari mu Rwanda guhera ku wa Gatandatu, mu bikorwa bifitanye isano n’amasezerano Ikipe ya Arsenal yasinyanye n’Urwego rw’Igihugu rw’Iterambere, RDB, yo kwamamaza igihugu binyuze muri gahunda ya Visit Rwanda.

Muri iyi minsi bamaze mu rw’imisozi 1000, basuye ibice bitandukanye birimo Pariki y’Igihugu ya Nyungwe, iy’Ibirunga n’ahandi hantu hatandukanye.

Nyuma yo kwakiranwa ibyishimo n’abafana ba Arsenal muri Kigali Serena Hotel, Pires na Parlour babajijwe uko babonye ibice by’u Rwanda bagezemo, bavuga ko byari bitangaje.

Robert Pires yagize ati “Byari ibihe bidasanzwe kubona ingagi, kurira imisozi no kugera mu bice bitandukanye ndi kumwe n’inshuti n’umuryango wanjye.”

Kuri Parlour, ngo ni ibihe byiza atazibagirwa kandi agomba gusangiza n’abandi kuko nta handi yabibonye.

Umuyobozi Mukuru w’Ishami ry’Ubukerarugendo no kubungabunga za Pariki muri RDB, Ariella Kageruka, yavuze ko bishimishije kuba aba bagabo bombi bishimiye ibyo babonye mu minsi bamaze mu Rwanda.

Ati “Birashimishije kumva muvuga uburyo mwanyuzwe kandi mukishimira ibyo mwabonye hano mu gihugu. Ni byiza kuba muri hano. Ni ikimenyetso ko ubukerarugendo bwacu bukomeje kuzamuka.”

Agaruka kuri aya masezerano ya Arsenal na Visit Rwanda, Robert Pires yavuze ko “u Rwanda rwarebye kure kuko Arsenal ni ikipe nkuru atari mu Bwami bw’u Bwongereza gusa ahubwo no hirya no hino ku Isi.”

Abafana ba Arsenal bahawe umwanya wo kuganira n’aba banyabigwi, bibukiranya ibihe byiza bagize bagikina n’uko babona ikipe yabo uyu munsi.

Abanyamahirwe babiri muri aba bafana, ni bo bahawe ibipupe by’ingagi byari bifitwe n’aba banyabigwi mu rwego rwo gushishikariza abasura u Rwanda gusura ingagi no kuzitaho.

Muri Gicurasi 2018 ni bwo u Rwanda rwinjiye mu bufatanye bw’imyaka itatu na Arsenal FC, bugamije kurumenyekanisha u Rwanda nk’icyerekezo gikomeye cy’ubukerarugendo n’ishoramari, binyuze mu gushyira ikirango ‘Visit Rwanda’ ku kuboko kw’imyenda yayo.

Ubukerarugendo ni rumwe mu nzego zifatiye runini u Rwanda kuko mu 2019 mu musaruro mbumbe wose w’igihugu, bwari bufitemo 10% mu gihe na mbere yaho umusaruro w’ibyo igihugu cyinjiza biturutse mu bukerarugendo wagiye wiyongera ku kigero cya 11% na 9% kuva mu 2008 kugera mu 2019.

Muri uwo mwaka wa 2019, ubukerarugendo bwinjirije u Rwanda miliyoni 498$, mu gihe intego ya 2024 ni uko ruzabusaruramo miliyoni 800$.

Robert Pires na Ray Parlour bahuye n'abafana ba Arsenal kuri uyu wa Gatatu

Bamwe mu bafana ba Arsenal mu Rwanda bari bakereye kuganira n'abanyabigwi b'ikipe yabo

Ariella Kageruka ushinzwe ubukerarugendo muri RDB, yavuze ko bishimishije kuba Pires na Parlour baranyuzwe n'ibyo babonye

Robert Pires ubwo yaganiraga n'abafana ba Arsenal mu Rwanda

Abafana ba Arsenal bari bishimiye kuganira n'abanyabigwi b'ikipe yabo

Clare Akamanzi uyobora RDB na we yageze ahabereye iki kiganiro

Ray Parlour yavuze ko ibyo yabonye mu Rwanda azabisangiza abandi

Emmanuel Ruhumuriza ni we wari uyoboye ikiganiro cy'abafana ba Arsenal n'abanyabigwi bayo

Robert Pires na Ray Parlour bageze mu Rwanda ku wa Gatandatu

Pires na Parlour bari kuri hoteli Kivu Marina Bay, hoteli y'inyenyeri enye iri mu Karere ka Rusizi

Bombi bavuze ko bishimiye ibyo babonye mu bice bitandukanye by'u Rwanda bagezemo

Bombi baboneyeho kureba ikiyaga cya Kivu bakitegeye amaso ku maso

Ray Parlour na Pires bagendera ku kiraro cyo mu bushorishori bwa Pariki ya Nyungwe

Ku wa Mbere ni bwo Parlour (ibumoso) na Pires (iburyo) basuye Pariki y'Igihugu ya Nyungwe

Abanyabigwi Robert Pires (iburyo) na Ray Parlour bamenyekanye cyane muri Arsenal FC yo mu Bwongereza, muri Gashyantare basuye u Rwanda. Aha basoromaga Icyayi mu Gisakura, hafi ya Pariki y'Igihugu ya Nyungwe

Robert Pires wari muri Arsenal yatwaye Premier League ya 2003/04 idatsinzwe, yishimiye ibyo yabonye mu Rwanda

Ubwo Ray Parlour na Robert Pires bari bavuye gusoroma icyayi

Amafoto: Visit Rwanda