00:00:00 IGIHE NETWORK KN KINYARWANDA EN ENGLISH FR FRANCAIS

Ntitwakomeza gucumbikira impunzi duhindukira tukaryozwa-Perezida Kagame

Yanditswe na Iradukunda Serge
Kuya 9 Mutarama 2023 saa 09:22
Yasuwe :

Perezida Paul Kagame yagaragaje ko u Rwanda rutazakomeza kwihanganira kwirengera ikibazo cy’impunzi zikomoka muri Repubulika Iharanira Demokarasi ya Congo rucumbikiye imyaka n’imyaniko kugeza n’aho rutangira kubiryozwa.

Iki kibazo Perezida Kagame yakigarutseho kuri uyu wa Mbere ubwo yakiraga indahiro ya Perezida mushya wa Sena, Dr Kalinda François Xavier.

Mu ijambo rye, Perezida Kagame yagarutse ku bibazo bitandukanye byugarije igihugu, haba iby’imbere ndetse n’ibyo mu karere birimo n’umwuka mubi umaze igihe hagati y’u Rwanda na Repubulika Iharanira Demokarasi ya Congo.

Umwuka mubi hagati y’u Rwanda na Congo ushingiye ku kuba iki gihugu gishinja u Rwanda gushyigikira umutwe wa M23, wubuye imirwano kuko wemeza ko ukwiriye guharanira uburenganzira bw’abaturage b’Abanye-Congo bavuga Ikinyarwanda.

RDC yo ivuga ko M23 ishyigikiwe n’u Rwanda kandi bamwe muri bayigize ari Abanyarwanda bakwiriye gusubira aho bakomoka.

Perezida Kagame yavuze ko aba baturage ba Congo bakomeza kwitwa Abanyarwanda ari abamaze imyaka amagana bahindutse Abanye-Congo kubera impamvu z’amateka.

Yavuze ko u Rwanda rutazakomeza kurebera iki kibazo cy’impunzi z’Abanye-Congo rucumbikiye rukomeza kuryozwa kandi mu by’ukuri bari mu gihugu kuko iwabo bimwe uburenganzira bwabo.

Ati “Ndashaka guhera ku kibazo tumaranye igihe. Twagiye twakira impunzi ziturutse mu bice bitandukanye ku bw’impamvu zitandukanye ariko hari ubwoko bumwe bw’impunzi ntekereza ko tutazakomeza kwemera.”

“Ntitwakomeza gucumbikira impunzi, duhindukira tukaryozwa, impunzi zatewe n’ivangura rishingiye ku moko riri mu kindi gihugu ariko tugahindukira tukaba ahantu ho kujugunya abo bantu bari kuvutswa uburenganzira bwabo.”

Kugeza ubu u Rwanda rucumbikiye impunzi z’Abanye-Congo zirenga ibihumbi 75 zibarizwa mu nkambi zitandukanye zo hirya no hino mu gihugu. Izi mpunzi ziganjemo izimaze mu buhungiro imyaka isaga 25.

Perezida Kagame yakomeje avuga ko ikibazo cy’izi mpunzi z’Abanye-Congo ziri mu Rwanda yakigejeje kuri Perezida Félix Antoine Tshisekedi ubwo yari amaze igihe gito ageze ku buyobozi.

Ati “Ducumbikiye izi mpunzi zavuye muri RDC mu gihe kirenga imyaka 20, ndetse Perezida wa Congo uriho ubu ubwo twari tukiganira, iki kibazo nakimugejejeho ubwo yageraga ku butegetsi ndetse mubwira inkuru ndende y’ibi byose irimo n’ibyo twagiye tugerageza gukora mu gukemura iki kibazo.”

“Namubwiye ko ndetse twanatekereje ku kuba twakwakira aba bantu tukabagira abaturage bacu kugira ngo baruhuke nk’uburyo bwo gukemura ikibazo ariko nanamubwiye ikibazo cyari kuba muri iyo gahunda.”

Perezida Kagame yavuze ko iyi gahunda yo guha ubwenegihugu impunzi z’Abanye-Congo yazitiwe n’impamvu nyinshi. Iya mbere ngo ni uko izi mpunzi ubwazo zitashakaga ubu bwenegihugu ahubwo zashakaga gutaha iwabo.

Uretse izi mpunzi zashakaga gutaha iwabo ngo hari n’irindi tsinda ryagaragaje ko ridashaka ubwenegihugu bw’u Rwanda, ahubwo zumva zajyanwa i Burayi, Amerika na Canada.

Ati “Ubwo twashakaga kubaha ubwenegihugu twababwiye ko badashobora gukomeza guteza ibibazo muri RDC kubera ko iyo baramuka bakoze ibyo, twari gushinjwa ko abantu twahaye ubwenegihugu bari kubyuririraho bagateza ibibazo mu gihugu cyabo cy’amavuko.”

Perezida Kagame yavuze ko yagejeje iki kibazo kuri mugenzi we wa RDC kugira ngo agishakire igisubizo kandi amwizeza ko azamufasha.

Ati “Mu ntangiriro yasaga nk’umuntu wabyumvise kandi ushobora kugira icyo akora, none nimurebe aho ibintu bigeze.”

Muvane aba Banye-Congo hano

Perezida Kagame yavuze ko abayobozi ba Repubulika iharanira Demokarasi ya Congo bakomeje kuvuga ko abagize M23 ari Abanyarwanda bibeshya.

Ati “Twagerageje gusobanura mu buryo buhoraho uburyo bariya bantu bari kurwana badaturuka hano, bimwe mu byo nzi ni uko abavuga ibyo bavuga ko aba ari Abatutsi bakomoka mu Rwanda nk’igihugu cy’inkomoko nubwo haba ari mu myaka ijana ishize ku bw’ibyo bagomba gusubira mu Rwanda.”

“Ibyo nibyo Guverinoma ya Congo iri kuvuga. Sinzi niba abashyigikiye icyo gitekerezo bazi ibi byose bakaba bari kubikora mu buryo bagambiriye, ariko ni uguhonyora uburenganzira bw’abantu n’icyasha dusigwa nk’igihugu. “

Perezida Kagame yakomeje avuga ko u Rwanda rutazihanganira gukomeza gutwererwa kuba nyirabayazana w’ibibazo biri muri Repubulika Iharanira Demokarasi ya Congo.

Perezida Kagame yavuze ko kimwe mu byo u Rwanda ruzakora mu rwego rwo kugaragaza ko ntaho ruhuriye n’ibibazo bya Congo ari uguha Umuryango w’Abibumbye impunzi z’iki gihugu rucumbikiye rwakomeje kwikorezwa ndetse rimwe na rimwe rukarenganywa kubera zo.

Ati “Ibi bizahera mu kubwira aba bantu batekereza ko ibibazo bya Congo ari iby’u Rwanda aho kuba ibya Congo nti “mbere na mbere muvane aba banye-Congo hano, abo baza hano buri munsi bitewe n’ibikorwa bya Guverinoma n’inzego runaka, uzambwira uti ‘Guverinoma ntabwo ikora neza, ibi cyangwa biriya ariko ibyo nabyo ntabwo bindeba’.”

“Niba ushaka ko biba ikibazo cyanjye nawe ni ikibazo cyawe ariko ndanga ko u Rwanda rukomeza kwikorezwa uyu mutwaro. Mubakure hano mubajyane ahandi mushaka cyangwa mubasubize muri Congo abe ariho mubarindira.”

Umukuru w’igihugu atangaje ibi mu gihe impunzi z’Abanye-Congo ziri mu Rwanda zimaze iminsi mu bikorwa byo kwamagana ihohoterwa rikomeje gukorerwa bagenzi babo ari nako zisaba amahanga kugira icyo akora kugira ngo zisubire iwabo kandi uburenganzira bwazo bwubahirizwe nk’uko bigenda ku bandi baturage b’igihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .