Padiri Pierre Simons yasezeweho bwa nyuma, hagarukwa ku bikorwa by’urukundo byamuranze (Amafoto)

Yanditswe na Prudence Kwizera
Kuya 31 Kanama 2020 saa 03:00
Yasuwe :
0 0

Padiri Pierre Simons uherutse kwitaba Imana yashyinguwe mu cyubahiro kuri uyu wa Mbere tariki ya 31 Kanama 2020 muri Paruwasi ya Ruyenzi i Cyotamakara, aho yakoreye umurimo w’Imana n’ibikorwa by’urukundo birimo no kurokora Abatutsi bamuhungiyeho mu gihe cya Jenoside yakorewe Abatutsi mu 1994.

Padiri Simons wabaga muri Paruwasi ya Save muri Diyosezi ya Butare, yitabye Imana ku wa Mbere tariki 24 Kanama 2020, azize uburwayi. Yari afite imyaka 79 harimo 51 yari amaze ari Umusaserdoti.

Azwi cyane ku rukundo ruhebuje rwamuranze mu gihe cya Jenoside yakorewe Abatutsi mu 1994, ubwo yitangiraga abana bo mu kigo cy’imfubyi cy’i Cyotamakara mu Murenge wa Ntyazo mu Karere ka Nyanza, n’abandi bahahungiye akabarokora.

Yavutse tariki ya 10 Gicurasi 1941 aba Umusaseridoti tariki ya 28 Kamena 1969 muri Diyoseze ya Liège mu Bubiligi; muri uwo mwaka nibwo yoherejwe mu Rwanda gukorera umurimo w’Imana muri Diyoseze ya Butare.

Yakoze imirimo itandukanye nk’aho kuva mu 1969 kugeza mu 1984 yabaye Umwarimu mu ishuri ryisumbuye ryitiriwe Kirisitu Umwami (College du Christ-Roi Nyanza).

Hagati aho mu 1981 yasubiye i Burayi muri Diyoseze ye, mu 1982 agaruka i Nyanza. Mu gihe yari umwarimu yari ashinzwe no gukurikirana umurimo w’Imana muri Gereza ya Nyanza; yabikoze mu gihe cy’imyaka 10.

Mu 1971 yashinze ikigo cyita ku bana b’imfubyi aranakiyobora kugeza mu 1986.

Kuva mu 1988 kugeza mu 1991 yari ashinzwe kwita ku bari mu nkambi y’impunzi z’Abarundi yari ahitwa Katarara mu cyahoze ari Komini Ntyazo na Kinazi no mu cyahoze ari Komini Ntongwe.

Mu 1989 yashize ikigo cya kabiri cy’imfubyi i Cyotamakara-Ruyenzi, aho yabaye kugeza mu 2018. Muri iyo myaka yose kandi yakoraga umurimo w’Imana nka Padiri wungirije wa Paruwasi ya Ruyenzi.

Kuva mu 2018 kugeza tariki ya 24 Kanama 2020 yari Padiri wungirije wa Paruwasi ya Save ayobora n’Ababikira bo mu muryango w’Abenebikira (Soeurs Visitandines) n’andi matsinda y’iyobokamana i Save.

Perezida w’Inama Nkuru y’Abepisikopi mu Rwanda akaba n’Umushumba wa Diyoseze ya Butare, Mgr Rukamba Philippe, ni we wayoboye umuhango wo kumusezeraho. Yagarutse ku bikorwa by’urukundo byamuranze birimo no kwitangira abana b’imfubyi ndetse no kurokora Abatutsi bamuhungiyeho mu gihe cya Jenoside yakorewe Abatutsi mu 1994.

Yagize ati “Yabaye Umusaseridoti w’intangarugero muri byose, yegurira ubuzima bwe Yezu Kirisitu yakurikiye, arangwa n’ineza n’urugwiro no kwicisha bugufi no kwitangira abantu, (…) Imana yari yaramuduhaye none yamusubiranye, izina ryayo risingizwe.”

Yavuze kandi ko ubwo abasirikare b’Ababiligi bicirwaga mu Rwanda kuwa 7 Mata 1994, Ambasade y’u Bubiligi i Kigali yasabye Padiri Simons ko yatahana n’abandi Banyaburayi akanga gusiga abahigagwa i Cyotamakara.

Bangangira Félicien wabanye na we igihe kirekire kigera ku myaka 46 yavuze ko yaranzwe n’ibikorwa by’urukundo birimo gufasha abana b’imfubyi aho yareze abagera kuri 600; ndetse yitaga no kugoboka abatagira kivurira.

Yavuze ko yafashije abakene kandi hari abana benshi yafashije kwiga abatangira amafaranga y’ishuri.

Ati “Yakunze imfubyi bigera aho biba umuhamagaro we kwita ku mfubyi.”

Yavuze ko yitaga cyane ku gufasha abantu aho kwinezeza kuko yagiraga amashati atarenze atatu, amapantalo atarenze atandatu kandi yari afite umuguru umwe w’inkweto.

Abarokokeye Jenoside i Cyotamakara bafashijwe na Padiri Simons ndetse n’imiryango yabo bari baratangiye igikorwa cyo gukusanya ubuhamya bw’ubutwari bwamuranze kugira ngo bwigweho ahabwe umudali w’ishimwe.

Inkuru wasoma: Padiri Pierre Simons warokoye abahungiye mu kigo cy’imfubyi i Cyotamakara, yitabye Imana

Abafashe ijambo bose bagarutse ku bikorwa by'urukundo n'ubugwaneza byamuranze
Abantu benshi baje gusezera bwa nyuma kuri Padiri Simons
Abiganjemo abo mu miryango yafashije bari baje kumusezeraho
Bamwe mu bihayimana baje gusezera kuri Padiri Simons Pierre
Bangangira wabanye cyane na Padiri Simons yavuze uko yitangiye abana b'imfubyi
Imodoka yatwaye umubiri we iwuvanye mu Biyaro bya CHUB iwujyana i Cyotamakara aho yasezereweho bwa nyuma
Kiriziya ya Paruwasi ya Ruyenzi i Cyotamakara ni ho bamusezereyeho bwa nyuma
Mbere yo kwinjira mu Kiriziya babanje gusukura intoki nk'uburyo bwo kwirinda icyorezo cya Coronavirus
Mbere yo kwinjira mu Kiriziya abamuherekeje babanje gupimwa umuriro harebwa ko hari ufite ibimenyetso ya Coronavirus
Musenyeri Rukamba Philippe ni we wayoboye umuhango wo gusezera kuri Padiri Simons no kumushyingura
Musenyeri Rukamba yagarutse ku bikorwa by'urukundo byaranze Padiri Pierre Simons
Padiri Pierre Simons uherutse kwitaba Imana yashyinguwe mu cyubahiro kuri uyu wa Mbere tariki ya 31 Kanama 2020 muri Paruwasi ya Ruyenzi i Cyotamakara
Umushumba wa Diyoseze ya Butare Mgr Rukamba Philippe yagarutse ku bikorwa by'urukundo byaranze Padiri Simons

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .