Padiri Pierre Simons warokoye abahungiye mu kigo cy’imfubyi i Cyotamakara, yitabye Imana

Yanditswe na Cyprien Niyomwungeri
Kuya 25 Kanama 2020 saa 10:14
Yasuwe :
0 0

Padiri Pierre Simons ukomoka mu Bubiligi ariko wakoreraga ubutumwa bwe mu Rwanda, yitabye Imana mu gitondo cyo kuri uyu wa Mbere tariki 24 Kanama 2020, azize uburwayi.

Padiri Simons wabaga muri Paruwasi ya Save muri Diyosezi ya Butare, azwi cyane ku rukundo ruhebuje rwamuranze mu gihe cya Jenoside yakorewe Abatutsi mu 1994, ubwo yitangiraga abana bo mu kigo cy’imfubyi cy’i Cyotamakara muri Ntyazo [mu Karere ka Nyanza], n’abandi babahungiye akabarokora.

Bangangira Félicien, umwe mu barokokeye i Cyotamakara, yabwiye IGIHE ko kuwa Kane w’icyumweru gishize Padiri Simons yabanje kumva atameze neza ariko n’ubundi yari asanzwe arwara umutima, afite n’ikibazo cya diabetes.

Bigeze kuwa Gatandatu nibwo yarembye bamujyana mu bitaro i Butare baramusuzuma basanga ngo hari umutsi ujyana amaraso mu mutima ushobora kuba warazibye, bahita bamwohereza i Kigali mu bitaro byitiriwe Umwami Faisal. Yahageze ku cyumweru nimugoroba birananirana bigeze mu rukerera rwo kuwa mbere saa kumi n’imwe yitaba Imana.

Bangangira ati “Yari umupadiri w’urukundo ushyira mu bikorwa ivanjiri yatojwe. Nabijyanisha n’urukundo yagaragaje mu gihe cya jenoside. Yakunze abana b’imfubyi, twe tuvuga ko yanabitangiye”.

Mu 1994 Padiri Simons yari mu kigo cy’imfubyi cy’i Cyotamakara. Icyo kigo cyarimo abana bagera kuri 30 cyangwa 40, ariko jenoside ibaye abana benshi ndetse n’abantu bakuru batuye hafi ahongaho bahungiye muri icyo kigo.

Bangangira ati “Uko baje bose yarabakiriye, arabahisha, arabatunga, abarwaye, abo batemaguye akabavura. Abo abashije kuba yarokora akoresheje amafaranga akabikora, hagira abaza kurokoka babimukesheje”.

Abarokokeye i Cyotamakara bafashijwe na Padiri Simons ndetse n’imiryango yabo bari baratangiye igikorwa cyo gukusanya ubuhamya bw’ubutwari bwamuranze kugira ngo bwigweho ahabwe umudali w’ishimwe.

Jean Marie Rutambuka ukuriye komite yakusanyaga ubuhamya kuri Padiri Simons, yabwiye IGIHE ko yahishe abana barenga 100, akagerageza gukoresha bamwe mu bo yareraga batahigwaga ngo barinde abahigwaga.

Padiri Simons kandi yatangaga amafaranga n’ibindi akabiha interahamwe ngo zitinjira mu kigo zigatwara abana b’abatutsi ngo zibice.

Bivugwa kandi ko ubwo abasirikare b’Ababiligi bicirwaga mu Rwanda kuwa 7 Mata 1994, Ambassade y’u Bubiligi i Kigali yamusabye ko yatahana n’abandi Banyaburayi akanga gusiga abahigagwa i Cyotamakara.

Padiri Simons yari afite imyaka 79 harimo 51 yari amaze ari Umusaserdoti.

Padiri Pierre Simons aruhukire mu mahoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .