Nyaruguru: Hafashwe magendu y’ibiro 363 by’amabuye y’agaciro yakuwe mu gihugu cy’abaturanyi

Yanditswe na IGIHE
Kuya 24 Kamena 2020 saa 08:17
Yasuwe :
0 0

Polisi ikorera mu karere ka Nyaruguru, kuwa Mbere tariki 22 Kamena 2020, yafashe abagabo babiri bafite magendu ibiro 363 by’amabuye y’agaciro. Abo ni Bizimana Celestin w’imyaka 32 na Bagayuwitunze w’imyaka 64.

Umuvugizi wa Polisi y’u Rwanda mu ntara y’Amajyepfo, Chief Inspector of Police (CIP) Sylvestre Twajamahoro yavuze ko aba bagabo bafatiwe mu bikorwa bya Polisi bibiri bitandukanye.

Yagize ati “Bizimana na Bagayuwitunze bakoranaga mu bucuruzi bw’amabuye y’agaciro bunyuranyije n’amategeko. Nyuma yo kumenya ayo makuru twateguye igikorwa cyo kubafata nibwo twabafatanye ibiro 363.”

CIP Twajamahoro akomeza avuga ko ariya mabuye yari abitse mu nzu za bariya bagabo mu murenge wa Busanze mu kagari ka Nteko. Bakaba barayakuye mu gihugu cy’abaturanyi banyuze mu nzira za magendu.

Umuvugizi wa Polisi mu ntara y’Amajyepfo yaburiye abaturage bijandika mu bikorwa by’ubucuruzi bwa magendu ndetse n’ubucuruzi bw’amabuye y’agaciro bunyuranyijwe n’amategeko.

Ati “Buriya ni ubucurizi bwa magendu bugamije kunyereza imisoro y’igihugu, amabuye y’agaciro agomba kuba afite ibirango bigaragaza aho yaturutse ndetse n’abayacuruza mbere y’uko ajya ku isoko. Abadakoze ibyo baba banyuranyije n’amategeko kandi birahanirwa.”

Yakomeje avuga ko abantu barimo kwambuka imipaka muri ibi bihe by’icyorezo cya COVID-19 barimo kunyuranya n’amabwiriza y’igihugu mu kwirinda iki cyorezo.

Amabwiriza ya minisitiri no001/minifom/2011 yo kuwa 10 werurwe 2011 yo kurwanya forode mu bucuruzi bw’amabuye y’agaciro mu ngingo ya mbere bavuga ko Nta muntu wemerewe kugura cyangwa gucuruza amabuye y’agaciro atanditse mu bitabo by’ubucuruzi.

Ingingo ya Gatatu igira iti ”Birabujijwe kwinjiza mu Gihugu amabuye y’agaciro adafite impapuro zerekana aho akomoka yacukuwe, zerekana ko yapimiwe aho aturutse kandi ko byemejwe na serivisi zibifitiye ububasha kandi akaba afunze (ariho ubujeni) nk’uko bisabwe kandi afite impapuro ziyinjiza mu gihugu.

Ingingo ya Kane ivuga ko amabuye y’agaciro yemerewe gutwarwa hanze y’imbago yacukuwemo ni agaragaza ibirombe yacukuwemo, apimwe kandi afunze n’ubujeni (tagged), kandi afite impapuro ziyaherekeza.

Itegeko N° 58/2018 ryo ku wa 13/08/2018 ingingo ya 54 ivuga ko Umuntu wese ushakashaka, ucukura, utunganya, ucuruza amabuye y’agaciro cyangwa kariyeri nta ruhushya, aba akoze icyaha. Iyo abihamijwe n’urukiko, ahanishwa igifungo kitari munsi y’amezi abiri (2) ariko kitarenze amezi atandatu (6) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni eshanu (5.000.000 FRW) cyangwa kimwe gusa muri ibyo bihano.

Urukiko rutegeka kandi ubunyagwe bw’amabuye y’agaciro cyangwa kariyeri byafatiriwe biri mu bubiko, bicuruzwa cyangwa bitunganywa nta ruhushya.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .