00:00:00 IGIHE NETWORK KN KINYARWANDA EN ENGLISH FR FRANCAIS

Uko u Rwanda ruri kurwanya igwingira ry’abana mu turere 13 ryibasiye cyane

Yanditswe na Hakizimana Jean Paul
Kuya 31 May 2022 saa 03:49
Yasuwe :

Kuva mu 2015 u Rwanda rwiyemeje kurandura igwingira no guca ikibazo cy’imirire mibi cyakunze kugaragara mu bana bato hirya no hino mu gihugu.

Ingamba zitandukanye zashyizweho aho abaturage babarizwa mu cyiciro cya mbere n’icya kabiri cy’ubudehe batangiye guhabwa ifu ya Shisha Kibondo. Ni ifu ihabwa abagore batwite n’abafite abana batarageza nibura imyaka ibiri mu rwego rwo kubafasha kurwanya imirire mibi.

Mu bindi bahawe harimo Ongera ihabwa abana, kongerera ubushobozi abajyanama b’ubuzima mu gupima abana, gushyiraho igikoni cy’umudugudu, amarerero rusange n’ibindi byinshi byatumye nibura iki kibazo kirwanywa cyane cyane mu turere 13 twari twabaruwe nk’udufite igwingira ku kigero kinini.

Ubushakashatsi bwakozwe ku buzima n’imibereho by’abaturage RDHS (Rwanda Demographic and Health Survey) bwakoze n’Ikigo cy’Igihugu cy’Ibarurishamibare [NISR] mu 2020, bwerekana ko 33% by’abana bari munsi y’imyaka itanu mu Rwanda bafite ikibazo cyo kugwingira.

Ubu bushakashatsi kandi bwerekanye ko mu turere 13 twari twaratoranyijwe nk’udufite igwingira ku kigero cyo hejuru kurusha utundi ndetse tukanibwaho ku nkunga ya Banki y’Isi, bwagaragaje ko utwinshi tukiri inyuma ugereranyije n’intego igihugu kihaye yo kuba cyaragabanyije igwingira ku kigero cya 19% rivuye kuri 33% ririho kuri ubu.

Akarere kaza inyuma y’utundi kuri ubu ni Ngororero 50,5%, Nyabihu 46,7%, Rutsiro 44,4%, Rubavu 40,2%, Gakenke 39,3%, Nyaruguru 39,1%, Ruhango 38,5%, Nyamagabe 33,6%, Karongi 32,4%, Rusizi 30,2%, Huye 29,2%, Kayonza 28,3% na Bugesera yari ifite 26,1%

Dusingize Clemence ushinzwe gahunda z’ubukangurambaga muri RBC bwibanda cyane mu kurwanya imirire mibi n’igwingira mu bana, avuga ko utu turere 13 twagaragaragamo imirire mibi n’igwingira twashyizwemo imbaraga nyinshi mu mushinga batewemo inkunga na Banki y’Isi aho bagiye bashyiraho amarerero mu midugudu, ababyeyi bakangurirwa uburyo bahashya imirire mibi mu ngo zabo.

Ati “ Twigishije ababyeyi gukora uturima tw’igikoni kugira ngo bihaze mu kubona imboga kuko zifite uruhare runini mu kurwanya imirire ibi, hari ukugira ibiti by’imbuto bitatu muri buri rugo, kongera isuku kuko ifite uruhare runini mu gutuma abana bagwingira, yaba ku biribwa, ku misarani n’ahandi hose.”

Dusingize yavuze ko ababyeyi bigishijwe guteka indyo yuzuye binyuze mu gikoni cy’Umudugudu, gupimisha abana no gukurikirana imikurire yabo buri kwezi ugize ikibazo akitabwaho hakiri kare.

Dusingize avuga ko igikorwa cyo kurwanya igwingira gihuriweho n’inzego z’ubuzima, inzego za Leta n’abaturage kugira ngo nibura ngo 2024 izagere hari ibimaze gukorwa kandi ngo biratanga icyizere gikomeye ngo kuko ababyeyi batangiye kubyumva.

Kongera amarerero mu Karere ka Rutsiro byitezweho kubafasha kugabanya imibare y'abana bagwingira
Mukanziza Epiphanie avuga ko Masenge mba hafi ituma bakurikirana abana bafite imirire mibi
Bimwe mu biryo bihabwa abana bafite imirire mibi bakurikiranirwa ku bigo nderabuzima
Ifu ya Shisha Kibondo ihabwa abagore babarizwa mu cyiciro cya mbere n'icya kabiri cy'ubudehe

Bimwe mu biri gukorwa mu baturage mu kurwanya imirire mibi

Hirya no hino mu turere hari gukorwa ibikorwa bitandukanye bigamije kurwanya imirire mibi inatera igwingira, bimwe mu by’ingenzi biri gukorwa hirya no hino mu gihugu harimo kubaka uturima tw’igikoni muri buri rugo.

Hari uturere twahisemo kwifashisha urubyiruko rw’abakorerabushake mu kubaka uturima tw’igikoni 100 muri buri Kagari dusanga utwagiye twiyubakirwa n’abaturage ubwabo.

Urugero nko mu Karere ka Bugesera mu Murenge wa Ngeruka mu Kagari ka Rutonde mu Mudugudu wa Kabare, umuturage witwa Hatungimana Elsa avuga ko yakoze akarima k’igikoni abana be batangiye kugaragara mu mirire mibi.

Ati “ Nagiye kwa muganga banyigisha guteka indyo yuzuye ndi kumwe n’umugore wanjye, mpava mvuga ko ngomba kukubaka kandi kangiriye umumaro ubu abana bavuye mu mirire mibi ndetse nsigaye mpa n’abaturanyi banjye.”

Nijimbere Leonidas ukuriye itsinda ry’abarobyi mu Murenge wa Ngeruka we avuga ko nibura buri wa mbere batanga isambaza ku marerero kugira ngo zitekerwe abana babashe kubona indyo yuzuye.

Ati “ Hano hari amarerero 11 bivuze ko buri cyumweru dutanga ibiro 22 bitekerwa ba bana bari kwigira mu marerero, ni ibintu bitunezeza kuko natwe tuba twumva hari icyo tumariye igihugu mu kurwanya imirire mibi.”

Kayonza bari kwifashisha gahunda ya ‘Masenge’

Ubusanzwe Masenge mba hafi ni ababebyi b’intoranywa bakurwa mu midugudu kugira ngo bafashe abakobwa bakiri bato mu kubarinda inda ziterwa abangavu, kuri ubu aba babyeyi bari no kwifashishwa mu kurwanya imirire mibi mu Murenge wa Rukara aho bafasha abafite abana bari mu mirire mibi mu kubigisha uko bakoresha bike bafite mu kubitaho.

Mukanziza Epiphanie usanzwe ari masenge mu Murenge wa Rukara mu Mudugudu wa Ruyonza yagize ati “ Tubagira inama ubundi tukabahuriza hamwe tugategura indyo yuzuye, ku wundi munsi tukajya mu rundi rugo tugashigishayo igikoma kuburyo babireberaho, nkanjye uwo narimfite amaze kuvamo ndetse ibiro bye birimo kuzamuka.”

Mukanziza yavuze ko zimwe mu mbogamizi bafite harimo ku kuba aba babyeyi abenshi ngo nta byo guteka baba bafite bigatuma masenge ariwe ubishaka kuburyo hari nabo bigora.

Ngororero bari kwifashisha gahunda ya ‘Ni uwacu nakure neza’

‘Ni uwacu nakure neza’ ni gahunda y’ababyeyi bishyize hamwe bashyiraho ikigega cyihariye cyunganira ingo mbonezamikurire kikanafasha umubyeyi uba wagaragaye ko arwaje imirire mibi aho bareba ko serivisi bagenerwa zibageraho neza.

Muri iyi gahunda yatangirijwe mu Murenge wa Gatumba igiye gukwirakwizwa mu yindi mirenge bifashishamo urubyiruko rw’abakorerabushake aho rugenzura neza niba ababyeyi bagaragaye mu mirire mibi bahabwa shisha kibondo neza ndetse bakanagenzura niba umwana wagaragaye mu mirire mibi abona ibyo kurya byujuje ubuziranenge.

Ifishi yerekana imikurire y'umwana ni imwe mu ziri gukoreshwa cyane hagamijwe kurwanya imirire mibi
Abiga mu bigo mbonezamikurire bapimirwa ku mashuri

Haracyari imbogamizi mu miryango mu kurwanya imirire mibi

Nubwo hari gukorwa udushya twinshi tugamije kurwanya imirire mibi n’igwingira, bamwe mu baturage baganiriye na IGIHE bagaragaje ko hakiri imbogamizi mu miryango zituma kurwanya imirire mibi bigoye cyane.

Zimwe mu zo abaturage bagaragaza harimo imyumvire ya bamwe bakirwaza imirire mibi bagahitamo kujya kuvuza abana mu bapfumu, amakimbirane yo mu miryango, ubumenyi buke bwa bamwe mu babyeyi mu gutegura indyo yuzuye.

Hari kandi ngo ababyeyi bahabwa Shisha Kibondo bakayigurisha, kutaboneza urubyaro mu miryango cyane cyane itishoboye n’ibindi byinshi bikibangamiye umuryango.

Niyomukiza Goreth utuye mu Mudugudu wa Kimisagara mu Kagari ka Karambo avuga ko umwana we yamutwaye mu bapfumu ubwo yabonaga agiye kumupfiraho agakeka ko bamuroze ngo kuko yasaga umutuku cyane.

Ati “ Icyo gihe nabonaga agiye gupfa, nuko turamujyana nakoze nk’ibirometero bitanu ngenda muteruye mu ntoki, nahuye n’umuvuzi ampa umuti ndetse ushaka no kumwica yantegetse kumuheka mpaka kugera mu rugo, yanciye 1000 Frw kuko yabonaga bigiye kurangira, tugeze mu nzira yararutse ngira ngo arutse ya marozi bukeye abajyanama b’ubuzima baza kundeba baramupima birangira banyohereje ku kigo nderabuzima bamwitaho.”

Abagabo batangiye kwifungisha kugira ngo baboneze urubyaro

Kuboneza urubyaro kenshi bisanzwe bikorwa n’abagore ariko kuri ubu zahinduye imirishyo kuko hari n’abagabo batangiye kwifungisha kugira ngo babashe kwita ku bana babyaye neza aho guhora babyara abo badashoboye kurera.

Nyandwi Innocent ufite imyaka 54 utuye mu Karere ka Rubavu mu Murenge wa Gisenyi, avuga ko yafashe icyemezo cyo kwifungisha nyuma yo kubyara abana atari yarateganyije akabona nakomeza kubireberera bizakomeza kumuteza ibindi bibazo.

Yavuze ko kuri ubu afite abana batanu yabyaye mu myaka icumi nyamara yari yariyemeje kubyara abana bane kandi nabo agasigamo intera y’imyaka nk’itatu.

Ati “ Ninjye wifatiye icyemezo njya kwa muganga mbasaba ko nakwifungisha, nabanje kubiganiriza umugore wanjye yemera kunsinyira bukeye umuganga araza arankorera, ntabwo byigenze bimpagarikira akazi kandi no mu rugo rwanjye ntacyo byahungabanyije ubu maze imyaka 11 mbikoze kandi ntakibazo ndagira."

Kuri ubu abanyamadini, abikorera n’inzego zose za Leta zashyize imbaraga mu kurwanya igwingira kuko byagaragaye ko umwana agwingira kuva bakimutwita kugera nibura afite imyaka ibiri, abaganga bavuga ko umwana warengeje imyaka ibiri nta garuriro ryapfa gukora aba yamaze kugwingira.

Uwizeye avuga ko kuri ubu igikoni cy'umudugudu kimaze gufasha ababyeyi kumenya guteka indyo yuzuye
Nyandwi yifungishije urubyaro kugira ngo yite ku bana be

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .