Mukomeze injishi z’umutekano n’ubumwe bw’Abanyarwanda- Minisitiri Shyaka

Yanditswe na IGIHE
Kuya 1 Ukwakira 2020 saa 09:11
Yasuwe :
0 0

Minisitiri w’Ubutegetsi bw’Igihugu, Prof. Shyaka Anastase, yasabye aboyobozi b’inzego z’ibanze mu Ntara y’Iburengerazuba gusigasira umutekano, ubumwe bw’Abanyarwanda n’imyumvire myiza kuko ariwo mutima w’igihugu.

Ni ubutumwa yatanze kuri uyu wa 1 Ukwakira 2020, mu ruzinduko rw’iminsi ibiri yagiriye mu Turere twa Ngororero na Nyabihu mu Burengerazuba, aho yahuye n’abayobozi b’inzego z’ibanze, abikorera, ndetse n’abavuga rikumvikana.

Utu duce tugizwe n’ibyahoze ari Komini Karago, Giciye na Nkuri turi mu twashegeshwe n’intambara y’abacengezi ariko ubu turatekanye.

Minisitiri Shyaka avuga ko n’ubwo umutekano ubu uhari atari umwanya wo kwirara ahubwo abayobozi b’inzego zegereye abaturage aribwo bakwiye kurushaho kubafasha kuwusigasira.

Yagize ati “Mukomeze injishi z’umutekano, ubumwe bw’Abanyarwanda n’imyumvire myiza, ni wo musingi w’ubuzima bw’igihugu, izo nkingi uko ari eshatu nizo zituma igihugu kibaho neza.
Turashima ko hano hashyizwe imbaraga mu mutekano kuko wigeze kuhabura, ariko ubu urahari. Ubu rero abayobozi basabwa gukomeza kwegera abaturage kugira ngo ukomeze gusigasirwa.”

Muri utu turere, Minisitiri Shyaka yahuye n’abayobozi bahagarariye abandi mu nzego z’ibanze kuva ku rwego rw’Isibo n’imidugudu, ndetse n’abavuga rikumvikana.

Minisitiri Shyaka yasabye aba bayobozi guharanira guha serivisi nziza abaturage mu nzego zose bayobora, bibanda cyane ku gukemura ibibazo by’abaturage hakiri kare, gukemura amakimbirane yo mu ngo, kwibutsa abaturage guhingira igihe, n’ibindi biza byiyongera kuri serivise zo guha ibyangombwa abaturage.

-  Abayobozi basabwe kwirinda mu kunyereza ibya rubanda

Ku rundi ruhande ariko Minisitiri Shyaka Anastase yavuze ko abayobozi badakwiye kwijandika mu bucukuzi butemewe no kunyereza ibya rubanda.

Yagize ati “Mwirinde kurya akatagabuye no gukora mu bya rubanda. Iyo umuyobozi agize akaboko karekare gakora mu bigenewe rubanda agatwara iyo sima, ibyo bikoresho byo kubaka amashuri, mu mafaranga agenewe abatishoboye,… uwo muyobozi ntaba agifite urumuri (rumurikira abo ayobora), mubireke n’uwumvaga yashyugumbwaga afashe hasi.”

Ku bibazo byihariye, Minisitiri Shyaka yihanangirije abayobozi b’inzego z’ibanze mu Karere ka Ngororero kwirinda kwijandika mu bucukuzi bw’amabuye y’agaciro butemewe, ubucuruzi bw’ibiyobyabwenge n’ibindi bituma bahugira ku nyungu zabo ntibite ku bibazo by’abaturage.

Mu bindi yasabye abayobozi mu turere twombi gushyiramo imbaraga harimo ibibazo by’imirire mibi n’isuku nke, guhangana n’ingaruka z’ibiza bageza amaterasi y’indinganire n’imirwanyasuri hose, gutera ibiti ndetse no gukomeza gushyira imbaraga mu iyubahirizwa ry’amabwiriza yo kwirinda COVID-19.

Minisitiri w’Ubutegetsi bw’Igihugu, Prof. Shyaka Anastase, yasabye aboyobozi b’inzego z’ibanze mu Ntara y’Iburengerazuba gusigasira umutekano w'abaturage
Iki gikorwa cyitabiriwe n'abayobozi mu nzego zitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .