00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Musabyimana yasabye abaturiye umupaka wa RDC kuba maso

Yanditswe na Muhire Desire
Kuya 27 Ugushyingo 2022 saa 09:20
Yasuwe :

Minisiteri w’Ubutegetsi bw’Igihugu Musabyimana Jean Claude yabwiye abaturage bo mu Murenge wa Busasamana mu Karere ka Rubavu ko bagomba kuba maso bakicungira umutekano, kuko hari byinshi bishobora kuwuhungabanya.

Yabibabwiye ubwo hakorwaga umuganda wo gutunganya umugenda unyuramo amazi ava mu kirunga cya Kalisimbi, akangiza imirima y’abaturage.

Abo yabwiraga baturiye umupaka wa Kabuhanga uhuza u Rwanda na Repubulika Iharanira Demokarasi ya Congo, ahamaze iminsi habera imirwano ishyamiranyije ingabo z’icyo gihugu na M23, hafi na teritwari ya Kibumba.

Yagize ati "Busasamana ni ku irembo ry’Igihugu, kuko hano turi nta birometero bibiri bihari ngo tugere mu baturanyi. Iyo rero umuntu ari ku irembo asabwa byinshi, cyane cyane mu gukumira ibishobora kumuhungabanya ku bo tudasangiye imyumvire."

"Twese dufite inshingano zo kwicungira umutekano, ariko cyane umuturage wa hano afite inshingano zirenze iz’abandi kuko gutura ku mupaka, icyiza kikugeraho mbere, ariko n’ikibi kikugeraho mbere y’abandi."

Minisitiri Musabyimana yashimiye abatuye mu Murenge wa Busasamana uburyo bakiriye abaturanyi babo bahungaga imirwano yari imaze iminsi i Kibumba.

Abenshi muri izi mpunzi ubwo bahungaga bahise bakirirwa mu miryango y’Abanyabusasamana, nyuma y’iminsi itatu baza kujyanwa mu nkambi y’agateganyo ya Kijote mu Karere ka Nyabihu.

Minisitiri Musabyimana yanibukije abatuye aka gace gafite ubutaka bwera, ko bafite indi ntambara yo kurwana yo kumenya kurya neza, aho kurya byinshi.

Ati "Ni byiza ko mufite ibirayi, Inka, ihene, intama, ntibikwiye ko umugabo ava kugurisha ibirayi ngo ace ku kabari afate burusheti eshatu mu gihe abana bicwa n’inzara, zirye ariko unace ahantu ugurire abana inyama."

Iyo uganiriye n’abaturiye umupaka wa Kabuhanga, bavuga ko iyo habaye imirwano hafi ya bo muri DRC by’umwihariko mu kibaya baturanye, bikomereza imirimo yabo kuko bizeye Ingabo z’u Rwanda.

Gusa ngo ntibagomba kuzitererana igihe baketse ko hari ictyabahungabanyiriza umutekano, bagatanga amakuru mu nzego zibishinzwe.

Minisitiri Musabyimana yifatanyije n'abaturage mu Muganda rusange kuri uyu wa Gatandatu
Abaturage ba Busasamana basabwe kuba maso ku bikorwa bishobora guhungabanya umutekano
Minisitiri Musabyimana aganira n'abaturage ba Busasamana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .