Miliyari 120 Frw buri mwaka mu kwita ku batishoboye: Menya politiki nshya izavana benshi mu bukene

Yanditswe na IGIHE
Kuya 22 Nzeri 2020 saa 01:20
Yasuwe :
0 0

Guverinoma y’u Rwanda iri kunoza Politiki yihariye izajya igenderwaho mu kwita ku batishoboye no kubateza imbere, aho byitezwe ko mu myaka ine iri imbere, buri mwaka hazajya hakoreshwa miliyari zigera ku 121 Frw.

U Rwanda rurifuza kuba igihugu cy’amikoro aringaniye mu 2035, no kuba igihugu cyateye imbere bitarenze 2050. Ibyo bizagerwaho mu gihe gahunda zo guteza imbere no kuvana abaturage mu bukene zigezweho uko bikwiriye.

Kimwe mu bintu byakunze kutavugwaho rumwe ni uburyo gahunda zo gufasha abatishoboye zishyirwa mu bikorwa, aho bamwe bavugaga ko zitabageraho, n’abo zigezeho bikavugwa ko zitabavana mu bukene uko bikwiriye.

Hari kandi gahunda yo kugendera ku byiciro by’ubudehe mu gutanga ubufasha mu batishoboye, aho hari abayinengaga gusa nk’itetesha abantu bagahora mu myumvire yo gufashwa, ntibatekereze ku gukora bagendeye ku nkunga bahawe ngo bivane mu bukene.

Gahunda zo gufasha abatishoboye ziriho ubu nazo ntizabageragaho neza uko bikwiriye. Nka VUP ifasha abatagera kuri kimwe cya kabiri mu bo yakabaye ifasha, naho 25 % by’imiryango ifite abana bafite imirire ibi nibo bafashwa.

Minisiteri y’Ubutegetsi bw’Igihugu yateguye Politiki y’Igihugu yo gufasha abatishoboye, igaragaza ko kimwe mu byatumaga intego zo kuvana abatishoboye mu bukene zitagerwaho, harimo n’uburyo gahunda zimwe zo gufasha abatishoboye zatangwaga mu kavuyo, zinyanyagiye ku buryo n’abashinzwe gukurikirana ishyirwa mu bikorwa ryazo bibagora.

Inyandiko isobanura iyi politiki IGIHE ifitiye kopi, ivuga ko mu biganiro n’abafatanyabikorwa, hasabwe ko ibyiciro by’ubudehe byakoreshwa mu igenamigambi, ayo makuru agaherwaho hafashwa abakeneye ubufasha kandi buri wese agafashwa mu byo akeneye aho kugendera mu kivunge nk’uko byahoze, aho uwabaga ari mu cyiciro cya mbere cyangwa icya kabiri yumvaga ko azafashwa hafi mu bintu byose.

Mu minsi ishize hatangajwe ko hagiye kujyaho ibyiciro bishya by’ubudehe. Ibyo ni A, B, C, D na E.

Abo mu cyiciro cya A hazaba hari abantu bafite ubushobozi mu buryo bugaragara, bitwa abaherwe. Icyiciro cya B hazajyamo abafite amikoro aringaniye. Ibyo byiciro byombi bizajya biba birimo abantu bashobora gufasha abari mu byiciro by’abatishoboye gutera imbere, haba mu buryo bwo gutanga imirimo cyangwa kuba hakwifashishwa ubumenyi mu kuzamura abatishoboye.

Icyiciro cya C na D hazaba harimo abakene ariko bafite ubushobozi bwo kuba baramutse bafashijwe, bazamuka bagatera imbere. Icyiciro cya E kizaba ari umwihariko w’abantu bakennye ariko banafite ubushobozi buke bw’umubiri, ku buryo bakeneye kwitabwaho byihariye. Aho ni nk’imiryango irimo abantu bashaje, abafite ubumuga n’abandi.

Mu gihe umuntu afashijwe, azajya aba afite imyaka ibiri yo kuba yiteje imbere, iyo myaka ishobora kongerwa bitewe n’impamvu zidasanzwe.

Muri Politiki nshya yo gufasha abatishoboye, havugwamo ko uburyo bwajyaga bukoreshwa abafatanyabikorwa ba Leta batera inkunga abatishoboye buzavugururwa. Aho gufata agace kamwe ka porogaramu yo gufasha abatishoboye, abafatanyabikorwa bazajya basabwa gufata porogaramu runaka yose kugira ngo hakorwe ibyihutirwa biri mu mihigo na gahunda za Leta.

Mu guharanira ko abatishoboye bagerwaho na serivisi zibafasha, hazashyirwaho uburyo bwose n’ingamba zituma ubuzererezi n’ibituma abantu babatwa n’ibiyobyabwenge zicika kandi abagizweho ingaruka bagafashwa, ingamba mu guhashya ihohotera, guca kutitabwaho no kwirengagizwa bikorerwa abageze mu zabukuru, gufatanya n’abikorera, sosiyete sivile n’imiryango ishingiye ku madini ku buryo bwo gushyiraho ibigo byita ku bageze mu zabukuru n’ibindi.

Guverinoma ivuga ko hazashyirwaho uburyo bwihariye hagafashwa abakwiriye gufashwa koko.

Ibyo bizafasha imiryango itunze abatishoboye nayo gukora ikiteza imbere kuko byagaragaye ko iyo umuryango uri guharanira kuzamuka ariko unagomba kwita wonyine ku muntu ufite ubushobozi buke nk’ufite ubumuga, umusaza n’abandi, biwugiraho ingaruka zikomeye iyo utunganiwe. Ushobora no kwisanga wose wasubiye mu bukene.

Nibura 13 % by’ingo zo mu Rwanda zibana n’umuntu urengeje imyaka 65, mu gihe amakuru ava mu budehe agaragaza ko 9 % by’ingo zo mu Rwanda zibana n’umuntu ufite ubumuga. Ibarura rya Kane ku mibereho y’ingo mu Rwanda (EICV 4) ryagaragaje ko nibura 18 % by’ingo zikennye mu Rwanda harimo umuntu ubana n’ubumuga.

Ingengo y’imari izunganirwa n’abaturage

Guverinoma igaragaza ko kwita kuri abo batishoboye bizasaba imbaraga za buri wese, aho nibura buri mwaka uhereye mu 2020, Politiki y’Igihugu yo kwita ku batishoboye izajya isaba ingengo y’imari ya Frw 121,000,000,000 buri mwaka.

Ayo mafaranga azaturuka mu ngengo y’imari bwite ya Leta, imisanzu izajya itangwa n’abakozi n’abakoresha n’inkunga zizajya zitangwa n’abikorera ndetse n’abafatanyabikorwa mu iterambere.

Mu gihe iyi gahunda yaba ishyizwe mu bikorwa nkuko bikwiriye, byitezwe ko izafasha mu kugabanya ubukene, kuzamura ubukungu bw’igihugu, kugabanya icyuho hagati y’abakire n’abakene, guteza imbere ubumwe n’ubwiyunge n’ibindi.

Abatishoboye bazajya bitabwaho kandi bakurikiranwe kugeza bavuye mu bukene. Abageze mu zabukuru bazitwabaho byihariye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .