Kayonza: Ubucucike mu mashuri bwatumaga amwe adatsindisha n’umunyeshuri umwe

Yanditswe na Hakizimana Jean Paul
Kuya 17 Ukwakira 2020 saa 08:59
Yasuwe :
0 0

Abayobozi b’ibigo by’amashuri, abarimu n’ababyeyi batangaje ko zimwe mu mpamvu zatumaga ku bigo by’amashuri bimwe na bimwe hadatsinda umwana n’umwe mu bizamini bya leta, byaturukaga ku bucucike bwagaragaraga mu mashuri, aho ubu batanga icyizere ko ubwo iki kibazo gikemuwe bagiye kwisubiraho.

Ibi babitangaje kuri uyu wa Gatanu tariki ya 16 Ukwakira 2020 ubwo hatahwagwa ibyumba by’amashuri bishya 143 byuzuye mu gice cya mbere cyo kubaka ibyumba by’amashuri mu gihe ibindi 840 bicyubakwa.

Murekeyisoni Jeannine utuye mu Mudugudu Ngarama Akagari ka Ryamanyoni mu Murenge wa Murundi urerera ku kigo cy’amashuri abanza cya Gacaca, yavuze ko kuri iki kigo barereraho hari hasanzwe ubucukike bukabije bwanatumaga nta mwana n’umwe uhiga utsinda ariko ngo ubwo bongewe ibyumba by’amashuri bishya amateka agiye guhinduka.

Ati “Nk’umwarimu umwe wasangaga afite abanyeshuri 100 kuzamura, kugira ngo azabigishe bumve neza bikagorana ariko ubu ubwo batwongereye amashuri kugira ngo abana bacu babashe kwiga neza ndabona bizatanga impinduka, nibura mu ishuri rimwe nihigamo nk’abana 30 cyangwa 40 bazajya bumva banagire nibyo batahana.”

Umwarimu wigisha ku ishuri ribanza rya Mukarange Protestant, Ngeruza Munyawera Obed, we yavuze ko iyo abana barenga 100 mu ishuri rimwe bigorana cyane kubigisha ari nabyo byatumaga badatsindisha.

Ati “Urugero nk’ishuri ryanjye ryari ririmo abanyeshuri 105, kwicara kwabo byari intambara, kubashyira ku murongo ntibyari byoroshye, urabona dusigaye twigisha ari iminota rero iminota 50 yashiraga ukibabwira ngo baceceke mbese ntibyari byoroshye, wigishaga ugataha abagukurikiye batanageze kuri 1/3 ni nayo mpamvu byatumaga umwana agera mu wa gatanu ataramenya gusoma no kwandika neza kubera kudakurikiranwa.”

Munyawera yakomeje avuga ko ubwo babonye amashuri mashya bigiye kubafasha kuzamura ireme ry’uburezi ngo kuko abana bagiye kwiga bisanzuye neza abarimu nabo bakabona umwanya wo gukurikirana buri mwana wese.

Ati “Abana kubashyira mu matsinda noneho bizoroha, abana bazajya baba bicaye neza bahumeka neza umwarimu amenye ngo uyu afite intege nke aha ndamukurikirana gutya, naho winjiraga mu ishuri ugasanga abana bararuta ubushobozi bwawe.”

Umuyobozi w’ikigo cy’amashuri abanza cya Gacaca, Nsanzumuhire Emely Patrick, yavuze ko ari ibyishimo kuba bubakiwe amashuri mashya ashimira Leta y’u Rwanda yabubakiye ibyumba birindwi bishya.

Ati “Twari dusanzwe dufite ibyumba birindwi ariko bitameze neza none ubu twubakiwe ibindi birindwi bishya bigiye kutubera ibisubizo, icya mbere biratugabanyiriza ubucukike mu ishuri, hano dufite abanyeshuri 713 bigiraga mu byumba birindwi bivuze ko buri cyumba kigiragamo abanyeshuri 100 barenga none ubu nibura buri cyumba hazajyamo abana 50 bigabanye bwa bucucike bwatumaga badatsinda neza.”

Umuyobozi w’Akarere ka Kayonza, Murenzi Jean Claude, we avuga ko kuba hatashywe ibyumba by’amashuri 143 bitanga icyizere ko nibura abanyeshuri bazajya gusubira ku ishuri n’ibindi byose byarangiye kubakwa.

Ati “Muri uyu mwaka tuzubaka ibyumba 840 bizadufasha kugira ngo turebe ko abanyeshuri babyigiramo tukagabanya ubucukike n’ingendo ndende bakoraga, twari tumaze iminsi dufite ikibazo cy’ibikoresho ariko kugeza ubu ibyinshi bimaze kuboneka ku buryo abana bazajya gufungura n’andi mashuri yararangije kubakwa.”

Meya Murenzi yakomeje avuga ko umwaka utaha bazubaka amashuri ku bigo bibarizwaho abana biga mu mashuri abanza ariko bikabafata umwanya munini bajya gukomeza amashuri yisumbuye ahandi.

Amashuri mashya azabafasha mu gutsindisha mu bizamini bya leta
Ubuyobozi bw'Akarere bwatangaje ko mu Ugushyingo n'andi mashuri azaba yuzuye
Senateri Bideri John yifatanyije n'ubuyobozi bw'Akarere mu gutaha ibyumba by'amashuri bishya 143

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .