Isoko rya kijyambere rya Nyamagabe ryuzuye nyuma y’imyaka itandatu ryaradindiye

Yanditswe na Habimana James
Kuya 8 Kamena 2020 saa 04:35
Yasuwe :
0 0

Ubuyobozi bw’Akarere ka Nyamagabe bwatangaje ko bwiteguye kubyaza umusaruro isoko rya kijyambere ryamaze kuzura, nyuma yo kumara imyaka itandatu ryaradindiye.

Mu 2014 nibwo iri soko ryatangiye kubakwa, ariko rigenda ridindira bitewe n’impamvu zitandukanye, zirimo ubwumvikane bucye hagati y’Ubuyobozi bw’Akarere, urugaga rw’abikorera n’abandi.

Byaje kugera mu 2019 imirimo yo kubaka iri soko yarahagaze burundu bitewe n’ibyo bibazo.

Idindirira ry’iri soko ryateye ingaruka zikomeye kuko aho abacuruzi bacururizaga iyo imvura yagwaga baranyagirwa, mu gihe cy’izuba bagatumukirwa n’ivumbi ndetse ibicuruzwa byabo bikangirika.

Muri Gashyantare 2019 ubwo Perezida Paul yasuraga abatuye aka karere, yari yasabye ko ibibazo bindindiza imyubakire y’iryo soko bikemurwa bwangu rikubakwa rikuzura.

Yagize ati “Ntabwo nigeze numva ikibazo cy’isoko cyajyaho kikamara imyaka kikabura ugikemura; ntabwo ari uko habuze uburyo bugikemura, habuze abantu barimo abayobozi batabikurikiranye neza.”

“Ntabwo isoko ryajyaho ngo rihagarare ari igice rijyeho amafaranga nibirangiza rikwamire ahongaho. Iryo soko na ryo riraza kurangira cyangwa rifungwe; nta kiri hagati aho kuri njyewe. Turarirangiza cyangwa turarivaho turyihorere tumenye ko ryatunaniye tujye mu bindi bikorwa. Ariko ndibwira ko gukemura ibibazo bijyanye naryo bishoboka”

Kuri ubu, ubuyobozi bw’aka karere buratangaza ko ryamaze kuzura, bukavuga ko impamvu nyamukuru yatumye ryari ryaradindiye ari uburyo hari amafaranga bari bijejwe na Banki y’u Rwanda Itsura Amajyambere, BRD, ariko ntatangwe, gusa ibi byose bikaba byarakemutse.

Uhagarariye abikorera mu karere ka Nyamagabe, Uwitije Bernard, yagize ati “Icyo gihe umushinga utangira abikorera bari kumwe n’akarere begereye BRD, ibemerera inguzanyo ariko igeze igihe cyo kurekura amafaranga ntiyarekurwa, igice cyari cyarubatswe mbere cyari icy’abikorera, banki aho kurekura amafaranga nibwo hajemo ikibazo mu buryo butunguranye.”

Umuyobozi w’Akarere ka Nyamagabe wungirije ushinzwe ubukungu, Kabayiza Lambert, yavuze ko iri soko rigiye kubagirira akamaro, kuko rigiye gufasha abaturage ndetse rinabafashe kwinjiriza akarere amafaranga.

Yagize ati “Mu gukomeza kwinjiza imisoro tuzakomeza gushyiramo abacuruzi bagaragara mu mujyi ndetse n’abandi bazavuka, kuko buriya kuva ubu isoko rimaze kuboneka hari n’abandi bazaza.”

Nyuma y’uruzinduko rwa Perezida Kagame muri aka karere, imirimo yo kubaka iri soko yahise isubukurwa.

Umuyobozi w’Akarere ka Nyamagabe, Uwamahoro Bonaventure, aheruka kuvuga ko nyuma yo gusurwa n’Umukuru w’Igihugu, bicaye bacoca ibibazo bitera iryo soko kudindira barabikemura.

Yagize ati “Nyuma yaho dusuriwe na Nyakubahwa Perezida wa Repubulika umwaka ushize yatanze umurongo twese twagendeyeho, bwaba ubuyobozi bw’Akarere, Intara n’Abikorera ku giti cyabo turicara tureba impamvu ituma isoko ridindira.”

Uwamahoro yavuze ko bimwe mu bibazo bakemuye byaridindizaga harimo icy’amikoro ashingiye ku kubona inguzanyo muri banki, ubwumvikane buke hagati y’abashinzwe ibijyanye n’iryo soko n’ibindi.

Amakuru agaragaza ko iri soko ryagombaga kuzura ritwaye Miliyari imwe na Miliyoni 500 Frw.

Iri soko ryari rimaze imyaka itandatu ryaradindiye
Iri soko rizafasha abacuruzi bagorwaga n'ibikorwa byabo kubera izuba cyangwa imvura
Iri soko ryagombaga kuzura ritwaye Miliyari imwe na Miliyoni 500 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .