00:00:00 IGIHE NETWORK KN KINYARWANDA EN ENGLISH FR FRANCAIS

Inzira y’inzitane Abanye-Congo banyuramo bakwepa Leta ngo bahungire mu Rwanda

Yanditswe na Ferdinand Maniraguha
Kuya 19 Mutarama 2023 saa 07:21
Yasuwe :

Uko bukeye n’uko bwije, Abanye-Congo bo mu Burasirazuba mu Ntara za Kivu y’Amajyaruguru n’iy’Amajyepfo bakomeje guhungira mu Rwanda nyuma y’imirwano imaze iminsi no kwibasirwa cyane cyane ku bakomoka mu miryango ivuga Ikinyarwanda.

Kuva mu Ugushyingo umwaka ushize, abagera ku 3010 bamaze guhungira mu Rwanda aho bacumbikiwe mu nkambi za Mahama, iy’agateganyo ya Kijote muri Nyabihu na Nkamira i Rubavu.

Abahunga bavuga ko mu duce baturukamo nta mutekano urimo by’umwihariko ku bavuga Ikinyarwanda cyane cyane Abatutsi. Byabaye bibi cyane ubwo imirwano hagati ya M23 n’Ingabo za Leta yuburaga muri Werurwe umwaka ushize.

Aba baturage bavuga ko batangiye guhigwa n’abo mu moko y’Abahutu bari basanzwe baturanye bafatanyije n’imitwe nka Mai Mai na FDLR irwana ku ruhande rwa Leta.

Kanyamashari Masuhuke IGIHE yamusanze mu nkambi ya Nkamira aho amaze iminsi ine nyuma yo guhungira mu Rwanda.

Uyu musaza w’imyaka 70 wahunganye n’umwuzukuru we, yavuze ko iwabo ku ivuko ari ahitwa mu Bwiza i Masisi.

Ati “Tubibonye gutyo turavuga ngo batatwica ahubwo reka duhunge wenda nitugira amahirwe M23 izarwana itsinde dutahe.”

Yavuze ko yemeye gusiga inka ze agahunga kuko nta mutekano uhari.

Ati "Bimeze nabi, ni byo biri gutuma turi guhunga. Nyatura ni abantu twavukanye, ni bene wacu bitwa Abahutu. N’abo Bahunde nabo turabazi, twese turi ba kavukire baho ariko bafatanya n’abasirikare ba Leta kutwica. "

Kanyamashari avuga ko iyo mitwe yitwaje intwaro, ihabwa ibiraka na Leta ya Congo ngo igirire nabi Abatutsi.

Ati "Leta ya Congo se ntifatanyije nabo sibo babahaye akazi? Urumva FDLR bafatanyije nabo kandi ari impunzi zavuye mu Rwanda, urumva byoroheje, nabo babaye abasirikare ba Congo. Bafatanyije n’abasirikare ba Congo, Nyatura na Mai Mai."

Uyu musaza mbere yo guhunga, yavuze ko hari unusore w’umuturanyi bishe bamuca umutwe, bawusiga mu kibuga aho abantu bose banyura ahitwa Rukinanyana.

Inzira zo guhunga nazo si shyashya kuko Leta ya Congo idashaka ko abaturage bahunga.

Ati "Muri za Sake na Walungu bagiye bafunga bariyeri abantu bakajya biyahura. Urumva ni Abanye-Congo, hari uhagera afite udufaranga akadutanga kugira ngo abone uko atambuka, bakatumunyaga. Abenshi twagiye tuza imbokoboko."

Mutoni Claudine na we uri mu nkambi ya Nkamira, yavuze ko kugira ngo bagere mu Rwanda, baciye mu mashyamba kuko mu nzira zisanzwe Leta idashaka ko bahunga.

Ati "Congo yagiye itangira abantu benshi tugaca mu mashyamba. Twaciye mu mashyamba hariya mu makoro mu Bwiza. Mu nzira nziza haba hari umutekano mubi. Hari abo basubiza inyuma ngo nibasubire inyuma nta ntambara, kandi tubizi ko abantu babamereye nabi."

Yakomeje agira ati "Hari abantu twatanye basigayeyo. Nabo babuze inzira , amahirwe wabonaga aho upfumurira ukaba wagiye abandi batatanye bagiye."

Mu minsi ishize Leta ya Congo ibinyujije ku buyobozi bwa Kivu y’Amajyaruguru, yatangaje ko hari abaturage bayo bo mu bwoko bw’Abatutsi bari guhungira mu Rwanda ku bwinshi.

Icyo gihe bavuze ko nta bibazo bidasanzwe bihari, ko abahunga ari abashukwa n’u Rwanda kugira ngo Congo irebwe nabi.

Icyakora, abaturage bahunga bo bavuga ko ibyo Congo ivuga atari ukuri.

Mahoro twasanze mu nkambi ya Nkamira yagize ati "Badushuka se tutabazi, ni bande badushuka? Nibwo bwa mbere tugeze mu Rwanda, none se baraduhamagaye ngo duhunge tugira nimero za telefone zabo? Nkanjye nibwo bwa mbere mpungiye mu Rwanda."

Uyu mugore yahunganye n’umuryango we ariko kubera gutangirwa mu nzira, yageze mu Rwanda ari kumwe n’abana gusa.

Ati "Mu guhunga wazaga uko uri, wahura na Guverinoma bagutangira kugira ngo bakureke bakakubwira ngo duhereze ‘unites’. Hari abasigaye bagize umwaku batari bavayo."

"Naje n’abana. Ababyeyi banjye barasigaye ntabwo ndi kumwe nabo, baracyihishe mu mashyamba ntibarabasha kwambuka. Ntabwo tuzi amakuru yabo."

Aba baturage bavuga ko ari Abanye-Congo banafite ibyangombwa by’icyo gihugu, bakaba barasanze abasekuruza babo batuye kuri ubwo butaka ku buryo batumva impamvu bitwa abanyamahanga.

Basabye ko umutekano ugaruka bagasubira iwabo kuko badashaka gukomeza kwitwa impunzi.

Mu Banye-Congo bamaze guhungira mu Rwanda mu mezi atatu ashize, 1760 bajyanywe mu nkambi ya Mahama mu Karere ka Kirehe, 445 bari mu nkambi y’agateganyo ya Kijote mu gihe 670 bari mu nkambi y’agateganyo ya Nkamira.

Hari 131 bageze mu Rwanda kandi, basubiye iwabo.

Mu nkambi y’agateganyo ya Nkamira, hari kubakwa andi macumbi ashobora kwakirirwamo izindi mpunzi, dore ko nibura ku munsi hakirwa abagera ku ijana.

Bose bahunze ubwicanyi bumaze igihe bukorerwa abavuga Ikinyarwanda
Impunzi z'Abanye-Congo zirenga 100 zihungira mu Rwanda buri munsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .