00:00:00 IGIHE NETWORK KN KINYARWANDA EN ENGLISH FR FRANCAIS

Impuruza kuri ba rushimusi badindiza umusaruro w’amafi mu biyaga bya Burera na Ruhondo

Yanditswe na Ndikumwenayo Thierry
Kuya 31 Ukwakira 2022 saa 11:54
Yasuwe :

Abakorera umwuga w’uburobyi mu biyaga bya Burera na Ruhondo batunga agatoki ababukora mu buryo butemewe bazwi nka ba rushimusi, kuba ba nyirabayazana ku gukendera k’umusaruro w’amafi, indagara n’indugu biva muri ibi biyaga.

Abakora uburobyi bwemewe basaba inzego z’ibanze ndetse n’iz’umutekano gufata ingamba zijyana n’ibihano, kuko abakora ubushimusi bw’amafi bazwi kandi iyo bafashwe badatinda kurekurwa kuko nta tegeko rihari ribahana. Usibye kubangamira umusaruro aba barobyi bavuga ko binabangamira imikorere yabo kuko bo bakora mu buryo buzwi kandi bwemewe n’amategeko.

Niyibizi Samuel ni umwe mu bakorera uburobyi mu kiyaga cya Ruhondo, avuga ko aba ba rushimusi bari kubarusha imbaraga.

Ati “ba rushimusi ntibita ku binyabuzima byo mu mazi, bangiza abana b’amafi bifashishije imitego itemewe. Ubu tumaze gufata inzitiramibu nyinshi bakoresha baroba kandi bangiza abana b’amafi ndetse n’aho amafi abyarira! Bafite imbaraga kuko n’iyo tubafashe tukabashyikiriza inzego z’umutekano bahita barekurwa.”

Uyiringira Odette uri muri Koperative Isugi yatangije uburobyi bukorwa n’abari n’abategarugori muri ibi biyaga, yabwiye IGIHE ko hari ubwo aba ba rushimusi bahanwa na za koperative ariko ibi bidahagije. Avuga ko ibi ashingira ku kuba bagenda ari igikundi kandi bitwaza ibikoresho bikomeretsa.

Ibi binashimangirwa na Maniragaba Gilbert ukorera uyu mwuga w’uburobyi mu kiyaga cya Burera.
Ati “Ba brushimusi baramutse bafatiwe ingamba umusaruro wakwiyongera mu buryo bugaragara! Bigeze kuduhugura mu bijyanye no kugaburira amafi ariko ntabwo byagize umusaruro mu buryo bugaragara kuko amafi yaburaga ibyo arya.”

Umuyobozi wungirije w’Akarere ka Burera ushinzwe ubukungu, Nshimiyimana Jean Baptiste yavuze ko umwe mu miti iri kuvugutirwa iki kibazo cy’ubushimusi harimo no gufasha ababukora kujya mu makoperative no guhabwa amahugurwa kugira ngo nabo batange imbaraga mu kuzamura umusaruro w’amafi.

Aya mahugurwa azatangwa n’Umuryango uteza imbere icyaro, RDI, aje asanga intego ya Leta yo kuzamura umusaruro w’amafi ukava kuri toni 65,000 zari zitegenyijwe muri 2020, ukazagera kuri toni 112,000 mu 2024.

Muri ibi biyaga haboneka umusaruro ungana n’ibiro bigera kuri 600 kuri buri kiyaga utangwa n’amakoperative 15 akorera muri ibi biyaga byombi.

Impuruza kuri ba rushimushi badindiza umusaruro w’amafi uva mu biyaga bya Burera na Ruhondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .