Ikiyaga cya Kivu kigiye gushyirwamo ubwato bunini, abatuye Nkombo nabo bahabwe ubugezweho

Yanditswe na Rabbi Malo Umucunguzi
Kuya 18 Nzeri 2020 saa 10:23
Yasuwe :
0 0

Ikigo cy’Igihugu gishinzwe Ubwikorezi, RTDA, cyatangaje ko gitegereje ubwato bunini bugomba gushyirwa mu Kiyaga cya Kivu, buzunganirwa n’ubundi buto bwo buzaba buhuza abantu batuye ku Nkombo n’ikindi gice cy’Akarere ka Rusizi.

Umuyobozi Mukuru wa RTDA, Imena Munyampenda, yabivuze kuri uyu wa Gatanu ubwo ikigo ayoboye cyitabaga Komisiyo y’Inteko Ishinga Amategeko ishinzwe gukurikirana Ikoreshwa ry’Umutungo w’Igihugu, PAC.

Abadepite bagaragarije RTDA ko uyu mushinga wabakabaye wararangiye kuko warenzeho iminsi irenga 500, ku buryo abaturage ba Nkombo bagombaga kuba bafite ubwato bushya bugezweho.

Munyampenda yabwiye abadepite ko mu Kiyaga cya Kivu habagamo ubwato bukozwe mu buryo gakondo, ku buryo hagombaga gukorwa ubwato bukomeye bushobora no kwinjiza amafaranga muri ba nyirabwo. Ngo baje kwiyambaza Minisiteri y’Ingabo kuko ibifitemo ubunararibonye, kugira ngo haboneke ubwato bukomeye. Bwagombaga gukorerwa mu Bushinwa.

Gusa ngo mu gihe umushinga wari utangiye gukorwaho mu mpera za 2018 no hagati mu 2019, habaye impanuka ebyiri mu Kiyaga cya Victoria no mu Kiyaga cya Kivu zihitana abantu benshi, bituma umushinga uvugururwa, hahindurwa ingano y’abantu ubwato bushobora gutwara n’imiterere yabwo.

Ati “Ubwato bwari bufite ubushobozi bwo gutwara abantu bake, tubwongerera ubushobozi, tunahindura imiterere yabwo. Ntabwo byahinduye igiciro cyabwo, twavuguruye amasezerano twongeramo ubundi bwato butoya, ubwo nibwo bwongereye igiciro. Ubwato bunini bwagombaga kuba butwara abantu 150 n’imodoka icumi, buvana abantu ku Nkombo bugera Rusizi. Dusanga rero kuzana ubwato bumeze kuriya, mu kuvana abantu ku Nkombo cyangwa Rusizi, mu bijyanye n’ubucuruzi ntabwo bari gushobora kubucunga neza.”

“Tubafasha kubikoraho turavuga ngo dushake ubwato butoya bushobora gutwara abantu 30, ubwo bwato rero nibwo buzajya butwara abantu bubavana ku Nkombo bubajyana Rusizi, noneho bwa bwato bunini bufite ubushobozi bwo gutwara abantu 150 akaba ari bwo bukora ubucuruzi bwo kuvana abantu kuva Rusizi bubajyana Karongi na Rubavu. Byari ukugira ngo dukore umushinga umeze neza.”

Ngo ibyo byatumye umushinga utinda, ariko ngo kwari ukugira ngo umushinga urusheho kunoga. Ubwato buto ngo ubu bwageze mu Rwanda, hategerejwe ko bushyirwa mu maboko y’Akarere ka Rusizi kazabucunga.

Munyampenda yakomeje ati “Rwose guhera mu mpera z’ukwezi kwa cumi buratangira gutwara abantu hagati ya Nkombo na Rusizi, noneho bwa bwato bunini, kubera ibibazo bya Coronavirus byabaye, duteganya ko ibikoresho byose bizagera hano mu mpera z’ukwezi kwa cumi kuko harimo no kubaka ubushobozi, ubwo bwato buzaza hano ibice byabwo, noneho tubuteranyirize hano mu Rwanda.”

Yavuze ko icyo gikorwa kizanagirwamo uruhare n’ibigo byigisha birimo IPRC kuko bizagira uruhare mu guteranya ubwo bwato, ku buyo mu kwezi kwa gatandatu buzaba bwatangiye gukoreshwa.

Biteganywa ko kubuteranya bizafata hagati y’amezi ane cyangwa atanu, hakiyongeraho igihe cyo guhugura abazajya babutwara no gushaka ibyangombwa bindi bikenewe, ku buryo buzatangira gukoreshwa kandi bwujuje ibyangombwa byose.

Ubwato bunini butwara abantu 150 bugiye kujya buvana abantu i Rusizi bubageze i Karongi. Ni umushinga mugari uri gushyirwa mu bikorwa na RTDA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .