00:00:00 IGIHE NETWORK KN KINYARWANDA EN ENGLISH FR FRANCAIS

RDC yongeye gushinja u Rwanda kuyiba amabuye y’agaciro, ibeshya ku iherezo rya Aldango

Yanditswe na Iradukunda Serge
Kuya 7 Ukuboza 2022 saa 07:08
Yasuwe :

Ibirego bya Repubulika Iharanira Demokarasi ya Congo ku Rwanda ntibigisiba mu minwa y’abayobozi bayo, aho kuri iyi nshuro bongeye kuzamura imvugo z’uko u Rwanda ruri muri icyo gihugu rushakayo amabuye y’agaciro, ko ari na yo ntandaro y’umutekano muke mu burasirazuba bw’icyo gihugu.

Kuri iyi nshuro hazamuwe ijwi rya Minisitiri w’inganda muri RDC, Julien Paluku, wanamaze igihe kinini ari Guverineri w’Intara ya Kivu y’Amajyaruguru, ikora ku Rwanda.

Ni umwanya wagakwiye gutuma asobanukirwa neza imiterere y’u Rwanda n’ubushobozi rufite mu bijyanye n’amabuye y’agaciro, kurusha abandi bayobozi bakorera i Kinshasa gusa.

Ubwo yaganiraga n’abanyamakuru, Minisitiri Paluku yavuze ko u Rwanda rwageze i Kishishe, agace gaheruka kwigarurirwa na M23 nyuma yo gukubita inshuro inyeshyamba zirimo na FDLR.

Ni agace ubu Leta irimo kuvuga ko kishwemo abasivili 272, ubwicanyi burimo gushinjwa M23, nubwo iyo mibare ishidikanywaho.

Paluku yavuze ko ubwo u Rwanda rwinjiraga muri Congo mu 2009 rukurikiye umutwe wa FDLR, rwahavuye ari cyo gihugu cya mbere cyohereza mu mahanga coltan nyinshi na gasegereti.

Yakomeje ati “Iyo mubonye Ingabo z’u Rwanda uyu munsi zigenda zikagera muri Kishishe, ni uko zikurikiye ikirombe cya Somikivu kirimo Pyrochlore, amabuye y’agaciro akoreshwa mu gukora ibyogajuru. Ni ibuye rishakishwa hirya no hino ku isi. Ni ikirombe cya Somikivu bakurikiye hariya.”

“Bakagenda bagana i Masisi kugira ngo bigarurire coltan, kubera ko dufite 60% bya coltan yose y’isi muri Masisi. Ni ukubera Pyrochlore na coltan muri Masisi biri inyuma y’iyi ntambara.”

Yavuze ko mu gucukura ayo mabuye muri Congo, ari byo byatumye “i Kigali bafungura uruganda rushongesha zahabu”, ariko ibintu byasubiwemo “uruganda rutunganya zahabu rw’i Kigali rwarafunze kubera ko rutari rukiyibona.”

Umuvugizi wa Guverinoma ya RDC, Patrick Muyaya, yahise yungamo ko n’uwashinze urwo ruganda yahise afatirwa ibihano.

Paluku yahise akomeza ati “Abantu bakwiye kumva ko intambara idahari kubera ko hari FDLR cyangwa urwango, ihari kubera ko hari coltan, zahabu, gasegereti, wolfram, ibyo byose.”

Ku bwe, ngo mu burasirazuba bwa Congo harimo kurwanirwa ububasha bwa politiki, igisirikare n’ubukungu.

Ni ibintu Perezida Kagame aheruka kwamagana, avuga ko mu burasirazuba bwa Congo hari imitwe yitwaje intwaro isaga 130, ko iyo iba ifashwa n’u Rwanda, wenda iba ishyira hamwe.

Ibya Aldango byagenze bite?

Muri Kamena 2019 mu cyanya cyahariwe inganda i Masoro hafunguwe Aldango, uruganda rwatunganyaga zahabu.

Nyuma y’imyaka ine ibyari ishoramari rishya byajemo cyamunara kubera imisoro, birangira uru ruganda rwegukanywe n’abashoramari bashya.

Aldango Ltd ni sosiyete yashinzwe mu 2017 na Alain Goetz na sosiyete nyarwanda ya Ngali Holdings, buri umwe afitemo 50%, itangira icuruza zahabu bisanzwe.

Ku busabe bwa Guverinoma y’u Rwanda iyo sosiyete yaje kubaka uruganda, rukakira zahabu yaturutse mu bihugu birimo Afurika y’Epfo, RDC n’ahandi, igatunganywa, ikoherezwa mu mahanga nka zahabu ivuye mu Rwanda nubwo atari ho yacukuwe.

Nyuma y’igihe gito uru ruganda rutangiye gukora, rwahuye n’ikibazo cy’ibirarane by’imisoro bituruka ahanini ku bikorwa iyi sosiyete ya Aldango yari isanganywe. Byageze mu mpera za 2019 ibi birarane bimaze kugera kuri miliyari 113 Frw.

Ikigo cy’Imisoro n’Amahoro (RRA) cyagerageje kwegera ubuyobozi bw’uruganda ngo bwishyure, ariko umushoramari Goetz akavuga ko adashobora kwishyura imisoro kuko ubwo yemererwaga gukorera mu Rwanda, yasonewe.

Uwo mushoramari yasabwe kwerekana inyandiko n’ibyangombwa ashingiraho avuga ko yasonewe imisoro arabibura, biba ngombwa ko ikibazo kizamurwa kigezwa mu nkiko.

Ibi byaje gutuma muri Mutarama 2021, Guverinoma y’u Rwanda ifata icyemezo cyo guhagarika burundu icyangombwa cya Aldango kiyemerera kohereza hanze zahabu yatunganyirijwe mu Rwanda.

Nyuma y’iki cyemezo, bitewe n’akayabo k’imyenda uru ruganda rwari rumaze kugira, hafashwe icyemezo cyo kurushyira mu cyamunara.

Umwe mu bahaye amakuru IGIHE bazi neza iby’iki kibazo, yavuze ko iki cyemezo cyafashwe kuko uru ruganda ari wo mutungo wonyine aba bashoramari bari bafite.

Ati “Leta y’u Rwanda yaje gufata icyemezo irarugurisha iriyishyura, ariko nta nubwo Leta yanabashije kwiyishyura nibura 20% by’umwenda yari iberewemo kuko ruriya ruganda nta nubwo rufite agaciro k’arenze miliyoni 80$.”

Uru ruganda rwashyizwe mu cyamunara muri Mata 2022. Nyuma y’amezi abiri, muri Kamena 2022 Aldango yegukanywe n’Ikigo nyarwanda cya Gasabo Gold Refinery.

Uwatanze amakuru yakomeje ati “Uru ruganda rwamaze kugurwa, ntabwo rucyitwa Aldango rwitwa ‘Gasabo Gold Refinery’, ubu rugiye kumara nk’amezi umunani ruguzwe. Rurakora hamwe n’uwo mushoramari mushya.”

Gasabo Gold Refinery yakomezanyije inshingano zo kongerera agaciro zahabu iva mu Rwanda, ku buryo igera ku isoko mpuzamahanga itunganye.

Umwe mu bayobozi ba Gasabo Gold Refinery yabwiye IGIHE ko bataratangira ubucuruzi bwa zahabu, ahubwo bafasha abakiliya bari mu bucuruzi bwayo kuyibatunganyiriza ku buryo bayijyana ku isoko mpuzamahanga bayitandukanyije na silver.

Uru ruganda rufite ubushobozi bwo gutunganya ibilo 480 bya zahabu mu masaha 30. Bivuze ko nibura mu kwezi rwatunganya toni ziri hejuru y’umunani. Zahabu rushyira ku isoko ibari ari umwimerere ku kigero cya 99,99%.

Ibi byose byatumye ingano ya zahabu u Rwanda rwohereza mu mahanga yiyongera, aho mu 2020 yazamutse ku kigero cya 754,6%.

Raporo yakozwe n’ikigo IMPACT gikora mu bucuruzi bwa zahabu mu karere, iheruka kugaragaza ko u Rwanda mu 2014 rwatangaje ko rwavanye miliyoni 8,1$ mu "y’andi mabuye y’agaciro" yoherejwe mu mahanga arimo na zahabu, yaje kugera kuri miliyoni 80,06$ mu 2016.

Igenzura ryakozwe n’Ikigo cy’Abanyamerika ku musaruro wa zahabu mu Rwanda ryagaragaje ko wari 160 kg mu 2014 na 319 kg mu 2015.

Itsinda ry’impuguke z’Umuryango w’Abibumbye ziheruka kuvuga ko u Rwanda rwohereje mu mahanga 2163 kg bya zahabu mu 2018.

Uku kwiyongera kwa zahabu u Rwanda rwohereza mu mahanga ni nako kwari kwatumye mu 2019 hafatwa umwanzuro wo gushinga uruganda ruyitunganya.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .