Igisubizo cya Minisitiri Hakuziyaremye ku ifungurwa ry’imipaka yo ku butaka, utubari n’imikino y’amahirwe

Yanditswe na Iradukunda Serge
Kuya 14 Ukwakira 2020 saa 02:51
Yasuwe :
0 0

Kuva icyorezo cya COVID-19 cyagera mu Rwanda muri Werurwe, Guverinoma yafashe icyemezo cyo gufunga ibikorwa bimwe na bimwe byiganjemo ibyahurizaga abantu benshi ahantu hamwe. Uko ubukuna bw’iki cyorezo bwagiye bugabanuka, bimwe byatangiye kongera gufungurirwa ibindi bikomeza gufunga.

Mu bikorwa bimaze amezi asaga atandatu bifunze harimo ibijyanye n’imipaka yo ku butaka, imikino y’amahirwe n’utubari.

Mu kiganiro Minisitiri w’Ubucuruzi n’Inganda, Hakuziyaremye Soraya, yagiranye n’itangazamakuru kuri uyu wa Gatatu yagarutse ku mpamvu ibi bikorwa byo bitarakomorerwa.

Minisitiri Hakuziyaremye avuga ku ifungurwa ry’imipaka, yagaragaje ko kugeza ubu leta itarabifataho icyemezo cyane ko ari ibintu bigomba kugenzurwana ubushishozi ari nako hanarebwa uko icyorezo cya Covid-19 gihagaze mu bihugu bihana imbibi n’u Rwanda.

Ati “Ni ibintu bigomba gutekerezwaho tumaze kumenya uko icyorezo cyifashe mu gihugu nk’uko bigenda bikurikiranwa na Minisiteri y’Ubuzima ariko no kumenya icyorezo no mu bihugu duturanye uko cyifashe.”

“Bigomba kubanza kuganirwaho no kwemezwa n’inzego zitandukanye ziri mu itsinda rishinzwe kugenzura covid-19 hanyuma bikagezwa ku Nama y’Abaminisitiri nk’uko bisanzwe ariko muri iki gihe nk’uko mwabibonye mu myanzuro y’Iama y’Abaminisitiri yabaye ku wa Mbere nta giteganyijwe mu gufungura imipaka.”

Ku bijyanye n’imikino y’amahirwe ndetse n’utubari, Minisitiri Hakuziyeremye yavuze ko ubwo Covid-19 yongeraga gukaza umurego muri Kanama, hari haratangiye igenzura rigamije kureba uko ibyo bikorwa byafungurwa ariko biza kuba bisubitswe kubera ko ahabera iyi mikino n’utubari ari hamwe mu hakwandurira abantu benshi.

Ati “Ku bijyanye n’imikino y’amahirwe, icya mbere hari indi mikino itarafungurirwa cyangwa se n’ibindi bikorwa by’ubucuruzi nk’utubari nabyo bitarafungurirwa. Mu nama y’Abaminisitiri yabaye ku wa Mbere ntabwo byemerewe gufungura kubera ko twabonye ko ya mikino y’amahirwe cyangwa se n’utubari, ari ahantu abantu bajya bakaba baba benshi bari ahantu hamwe.”

“Hari ingamba zishyirwa mu bikorwa kugira ngo n’ibisabwa byaba ari ku bari mu rwego rw’imikino y’amahirwe kugira ngo bemererwe. Hari ingamba twari twaganiriye nabo ndetse dukora n’ingenzura aho bakorera cyane cyane tugira ngo tunirinde abajyaga bafungura aho bakinira iyo mikino y’amahirwe mu buryo butemewe.”

Hakuziyaremye yavuze ko Minisiteri ayoboye iteganya gukora irindi genzura ifatanyije n’inzego z’ubuzima kugira ngo harebwe uko abari muri uru rwego rw’imikino y’amahirwe bafungurirwa.

Ati “Ubu rero mbere y’uko uku kwezi kurangira, turashaka kongera irindi genzura cyane cyane duhereye mu Mujyi wa Kigali hanyuma tukemeranya n’abari muri urwo rwego rw’imikino y’amahirwe ku mabwiriza y’ibyo bagomba gukurikiza mbere y’uko twongera gusuzuma dufatanyije na Minisiteri y’Ubuzima kugira ngo nayo irebe uko biteguye na gahunda dufite y’uko twabafungurira tuyemeranyaho.”

Ifungwa ry’ibikorwa bitandukanye mu gukumira icyorezo cya Coronavirus, ryateye ibibazo byinshi by’ubukungu, ndetse uyu mwaka byitezwe ko ubukungu bw’u Rwanda buzazamuka ku gipimo cya 2%, byitezwe ko bigenze neza nibura mu 2021 cyangwa na 2022 aribwo umuvuduko w’ubukungu uzaba wasubiye ku kigero wariho mbere y’icyorezo.

Minisitiri w'Ubucuruzi n'Inganda, Hakuziyaremye Soraya, yavuze ko icyemezo cyo gufungura imipika, utubari n'imikino y'amahirwe kizafatanwa ubushishozi mu kwirinda ikwirakwira ry'icyorezo cya Coronaviru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .