Icyemezo cya Perezida Tshisekedi, irindi korosi mu bibazo by’Abanyamulenge

Yanditswe na Rabbi Malo Umucunguzi
Kuya 16 Ukwakira 2020 saa 05:29
Yasuwe :
0 0

Umuryango mugari w’Abanyamulenge muri Repubulika ya Demokarasi ya Congo ukomeje kwibaza ku iherezo ry’ibibazo umazemo imyaka myinshi, yaranzwe n’ubwicanyi bakomeje gukorerwa, bamwe bakabushyira mu isura ya Jenoside.

Mu minsi ishize nibwo bamwe baketse ko amateka arimo guhinduka, ubwo Umuyobozi wa Komini Minemwe, Gad Mukiza, yashyikirizwaga inshingano ku mugaragaro, ariko Perezida Félix Tshisekedi aheruka gutesha agaciro iki gikorwa, mu buryo bukomeje kuzamura umwuka ushyushye wa politiki muri RDC.

Benshi bari batangiye kugira icyizere

Ku wa 28 Nzeri 2020 itsinda ry’abayobozi bakuru barimo Minisitiri w’Ingabo, Aimé Ngoy Mukena; Minisitiri Ushinzwe kwegereza Abaturage ubuyobozi n’Ivugururwa ry’Inzego, Azarias Ruberwa; Umugaba Mukuru wa FARDC, Général Célestin Mbala; Guverineri w’Intara ya Kivu y’Epfo, Théo Ngwabidje n’abandi, bagiriye uruzinduko i Minembwe bavuye no mu bindi bice birimo Bunia, mu ruzinduko rw’amahoro.

Umwarimu muri Kaminuza y’u Rwanda akaba n’Impuguke mu gukemura amakimbirane mu Biyaga Bigari, Dr Shyaka Mugabe Aggée, yabwiye IGIHE ko umuturage yabajije inama y’umutekano, impamvu abayobozi ba Minembwe batarashyikirizwa inshingano kandi mu zindi komini byagiriyeho rimwe byarakozwe.

Ati “Minisitiri w’Ubutegetsi bw’Igihugu wa Kivu y’Amajyepfo aravuga ati ‘ese ni ko bimeze ntabwo bahawe inshingano ku mugaragaro? Bati oya! Ati ‘ejo mu gitondo mwitegure duhurire mu cyumba cy’inama tubikore’.”

Minisitiri wo ku rwego rw’Intara, Lwabandji Lwasa Ngabo, ni we wayoboye icyo gikorwa nk’uko byateganywaga, nubwo hari abayobozi baturutse i Kinshasa ku zindi mpamvu zabagenzaga.

Byakirijwe yombi n’Abanyamulenge bari bamaze igihe bagorwa no kubona serivisi za leta, nyamara hari abanyapolitiki byariye cyane, kugeza ubwo Depite wo ku rwego rw’Igihugu, Muhindo Nzangi, avuga ko byateguwe na Azarias Ruberwa w’Umunyamulenge, amusaba "gutanga ibisobanuro kuri icyo gikorwa gishingiye ku nyungu ze bwite.”

Ati “Ni igikorwa cya politiki kandi gisobanuye byinshi, gishobora kuzambya imibanire hagati y’Abanye-Congo bo muri ako gace ku ruhande rumwe, bikanazamuka amakenga ku kwigarurira igice kimwe cy’igihugu cyacu.” Ni igikorwa yise balkanization.

Abanyamulenge batuye i Kinshasa bamaganye abakomeje guhembera urwango

Kuki kugira Minembwe komini byongeye kuzamura ibibazo?

Igice cya Minembwe gituwe n’Abanyamulenge benshi, bakunze kwitwa Abanyarwanda bityo badakwiye kuba bari muri RDC, ku buryo guha iki gice ubwigenge benshi babifata nk’ikizira, kuko abahatuye ku bwabo batakabaye bahari.

Komini Minembwe yemejwe n’iteka rya Minisitiri w’Intebe ryo ku wa 13 Kamena 2013 nk’imwe mu zigize Teritwari ya Fizi, mu Ntara ya Kivu y’Amajyepfo.

Ku wa 28 Ugushyingo 2018 iyi komini yahawe abayobozi binyuze mu iteka rya Visi Minisitiri w’Intebe akaba na Minisitiri w’ubutegetsi bw’igihugu ku rwego rw’igihugu, maze ku wa 28 Nzeri 2020 bahabwa inshingano ku mugaragaro na Minisitiri w’Ubutegetsi bw’igihugu w’Intara ya Kivu y’Amajyepfo.

Ibyo bigaragaza ko iyi komini atari nshya, ku buryo itakabaye izamura umwuka mubi wa politiki, cyane ko yanajyanyeho n’izindi kandi yari ikenewe.

Dr Shyaka ati “Komini yari ije gukemura ibibazo bya serivisi leta iha abaturage. Nk’urugero, mbere kugira ngo umuntu abone urupapuro nk’icyemezo cy’amavuko cy’umwana, byasabaga kuva mu Minembwe akajya i Fizi, hari ibilometero ngira ngo birenga 145, noneho leta irabireba iravuga iti aba baturage bararengana, nta muntu wajya gushaka icyemezo cyishyurwa nka 500 Frw noneho ngo akore urugendo rw’umunsi umwe n’igice.”

Mbere yo guhabwa inshingano ku mugaragaro ku bayobozi ba Komini Minembwe, mu zindi zagiriyeho rimwe na Minembwe byari byaramaze gukorwa, nko mu Mijyi ya Baraka, Uvira na Kamituga muri Kivu y’Amajyepfo, kandi nta kibazo byarateje.

Gusa kuri Minembwe havutse ibibazo byinshi, abanyapolitiki bamwe batangira kuzamura imvugo zikomeye ku ngano ya komini, kugeza ku kuvuga ko yahawe ubuso burenze ubuzwi, bwagabiwe abanyamahanga (Abanyamulenge).

Mu itangazo ryashyizwe ahagaragara n’Abanyamulenge batuye i Kinshasa kuri uyu wa Kane, bavuze ko batumva uburyo gushyikiriza inshingano ku mugaragaro abayobozi ba komini, byahindurwa ikibazo cy’amoko mu Minembwe no ku Banyamulenge kandi byakozwe n’inzego zibifitiye ububasha.

Bari barangajwe imbere na Perezida w’iri huriro, Mukiza M. Charles, n’abagize komite barimo Gisaro M. Alexis, Mutware B. Thaddée na Nzeyimana S. Joseph.

Bakomeje bati “Ahubwo ku batabizi, abatuye Komini ya Minembwe ntabwo ari ubwoko bumwe. Igizwe n’Ababembe, Abashi, Abafulero, Abanyindu, Abarega n’Abanyamulenge nubwo wenda aribo benshi.“

Hari abanyapolitiki benshi bamaganye ukugirwa Komini kwa Minembwe, barimo Martin Fayulu wiyamamarije kuyobora RDC agatsindwa na Tshisekedi, uheruka kuvuga ko ibi ari isohora ry’umugambi wa ‘Balkanization’, ku buryo bikwiye kwamaganwa.

Uwitwa Mubake Valentin we yigeze kuvuga ati “Bamwe mu Banye-Congo basa n’abatunguwe no kubona ivuka rya komini y’icyaro ya Minembwe, bimeze nk’igaragara mu mubiri ry’umugera wa kanseri winjiye mu gihe cya AFDL, ugiye kwanduza vuba RDC yose.”

Ni imvugo zisesereza cyane zitanasize Musenyeri Muyengo uyobora Diyosezi ya Uvira.

Uyu we yagize ati “Nubwo hashobora gutangwa ubwenegihugu ku muntu ubusabye kandi ubukwiye, ntabwo umuntu apfa gutanga ubutaka uko yiboneye. Kandi iyo uvuze komini y’icyaro, abaturage bacu babona ko “ubutaka cyangwa teritwari yigaruriwe”. Ni ikintu kibateye ipfunwe.”

Bitakwira Justin we ngo aheruka kuvuga ko ubwe yiboneye Abanyamulenge bajya gutura muri Congo bavuye mu Rwanda, nubwo yavutse mu 1960. Ni amagambo Abanyamulenge bavuze ko agamije kubiba amacakubiri hagati y’Abanyamulenge n’andi moko, nk’uko byabayeho mu myaka ya 1980 na 1990.

Perezida Tshisekedi yahagaritse komini n’abayobozi bayo

Mu ruzinduko yagiriye i Goma ku wa 9 Ukwakira 2020, Perezida Félix Tshisekedi, yasubitse icyemezo cyari kimaze iminsi kivugwaho cyane cyo kwemeza abayobozi ba komini Minembwe.

Ni icyemezo Abanyamulenge batuye i Kinshasa bavuze ko cyagizwemo uruhare n’abanyepolitiki batareba ryiza Abanyamulenge, ku buryo bagaragaje ibyabereye mu Minembwe nk’ibiteye inkeke.

Mu ibaruwa banditse bakomeza bati “Byanatumye ubwo Perezida Tshisekedi mu minsi ishize yagiriraga uruzinduko i Goma, ashingiye ku makuru yahawe n’abarimo abadepite b’Intara za Kivu y’Epfo n’iya Ruguru, bakunze kurangwa n’imvugo zirwanya aba baturage, ahagarika igikorwa cyo kwemeza ku mugaragaro abayobozi ba komini, igikorwa cyababaye abaturage baho.”

Bene abo bantu ngo bakomeje ngo gukoresha amagambo mabi ku Banyamulenge babagaragaza nk’abanyamahanga bateye ikibazo, bakanafata icyemezo bya Tshisekedi cyo ku wa 9 Ukwakira 2020 nk’intsinzi yabo, mu gihe byatangajwe ko icyo cyafashwe hagamijwe gusigasira amahoro n’ituze.

Bakomeje bati “Dutewe ubwoba n’uko intambwe ikurikira ishobora kuba, nk’uko byakunze kumera, gushaka uburyo bwose bushoboka bwo guta hanze “abo banyamahanga” cyangwa hakaba ubwicanyi.”

Mu gushaka umuti urambye, aba Banyamulenge basabye ko abakomeje kubagirira nabi bagezwa imbere y’inkiko ndetse ikibazo cya Komini Minembwe kigasuzumanwa ubushishozi kandi mu buryo rusange kimwe n’uturere byagiriyeho rimwe, hirindwa impamvu zatuma bifatwa nk’ivangura.

Banasabye kandi ko habaho gukumira imbwirwaruhame zihembera urwango zikomeJe kwigaragaza, hakanafatwa ingamba zatuma zihagarikwa burundu.

Perezida Tshisekedi aheruka guhagarika kwimika abayobozi ba Minembwe

Guhagarika abayobozi bemejwe n’itegeko bivuze iki?

Dr Shyaka yabwiye IGIHE ko gushyiraho aba bayobozi ba komini cyari ikintu gitoya cyane kitagombaga gutuma abantu basa n’abasimbagurika, kuko icy’ingenzi ari uko komini yagombaga kubaho ngo yorohereze abaturage kubona serivisi.

Gusa ngo mu rugendo rw’i Goma, Perezida Tshisekedi yahuye n’abanyapolitiki bamugaragariza uko ibibazo bya Minembwe biteye, babisobanura nk’ikibazo gikomeye.

Ati “Agomba kuba azi ukuri we, ariko yahisemo gushimisha abadepite bahagarariye abaturage, kandi abo nta n’umwe ushobora kuvugira Abanyamulenge, ni abahezanguni bose nta Munyamulenge n’umwe ubamo.”

“Yabanje kuvuga ko ahagaritse uko gushyikirizwa inshingano ku mugaragaro, ariko na komini ubwayo yatangiye kuyishidikanyaho, akavuga ati ‘abantu basakuza batya’, nubwo yavugaga ko harimo icengezamatwara ryinshi, ariko ageze aho mu rwego rwo gushimisha abo banyapolitiki, ati ‘ndetse ngiye no gushyiraho komisiyo izasubiremo, irebe niba koko imbibi z’iyo komini zingana n’uko itegeko ribigena.”

Uyu musesenguzi avuga ko kuba Tshisekedi yatesha agaciro ibintu byakozwe n’abandi bayobozi babifitiye ububasha bahabwa n’amategeko nabyo bifite imvano, ku buryo bishobora kuba bifitanye isano n’amatora yo mu 2023.

Dr Shyaka yakomeje ati “Urabona Tshisekedi kuva yatandukana na Kamerhe (Vital, wayoboraga ibiro bye,) - Kamerhe ni we wari umunyapolitiki wo ku rwego rwo hejuru ukomoka mu Burasirazuba - yanzwe cyane mu bantu bo muri Kivu y’Epfo cyane cyane Abashi, Abafulero, bavuga bati umuhungu wacu ukomoka muri aka gace, yari nk’umuntu wa kabiri ukomeye mu gihugu, none aramwikijije, amuhaye inkiko, abantu rero bakabisesengura nko kuba ashaka kongera kwigarurira abantu bo mu Burasirazuba ngo atangire yitegure amatora to mu 2023.“

“Ni abahezanguni cyane, kugeza ubwo bitiranya komini ituwe n’amoko yose bakayitirira Abanyamulenge, kubera gusa ko bitabagwa neza kubera ko bafite akantu kameze nk’ubutaka biganjemo, kabemera nk’abaturage, ni naho bahera bavuga ngo hagiye kuba Balkanisation, ngo birihuse, komini iraruta u Rwanda, ibintu bidasobanutse. “

Uretse Kinshasa, Intara ya Kivu y’Amajyepfo n’Amajyaruguru ngo nizo zituwe n’abaturage benshi, ku buryo bitekerezwa ko Tshisekedi ashobora kuba agamije kongera kwigarura abaturage, ngo bazongere kumutora.

Ikibazo kizakemurwa n’iki?

Mukiza Charles uyoboye Abanyamulenge i Kinshasa, yabwiye abanyamakuru kuri uyu wa Kane ko ibiganiro bihuza amoko yose byatanga unusanzu mu kugarura ubumwe, kandi banagiye babyitabira nubwo byahagaritswe na COVID-19. Bitegurwa na Leta ya RDC.

Muri icyo kiganiro bashimangiye ko Abanyamulenge badakeneye sitati yihariye nk’uko byavuzwe n’umunyapolitiki Justin Bitakwira, kuko ari bumwe mu moko arenga 400 agize RDC, ku buryo badakeneye gufatwa mu buryo butandukanye n’abandi.

Ati “Ni iwacu, ariko ntabwo tuhaba twenyine, ni nacyo abantu bibeshyaho. Minembwe ituwe n’amoko menshi, hari Abanyindu, Abafulero, Abashi n’Ababembe. Mwanabonye ko mu itsinda ryagombaga kuyobora komini, umukuru yari Umunyamulenge kuko nitwe benshi mu bahatuye bose, uwungirije yari Umubembe, naho umunyamabanga yari Umufulero.“

Yanakomoje ku byavuzwe ko icyemejwe nka Komini Minembwe gishobora kuba cyaragizwe komini mu nyungu z’Abanyamahanga, ndetse bagashyira u Rwanda mu majwi.

Mukiza yakomeje ati “Nta kibazo dufite ku cyemezo umukuru w’igihugu yafashe mu gushyiraho komisiyo izagenzura imbago z’izi nzego, kubera ko dukeneye igisubizo cyatuma ibi byose bihagarara. Iki cyemezo kiramutse cyatanga umuti utuma ibintu bihinduka, ntacyo bidutwaye kuko tuzi ko ukuri n’uburenganzira biri ku ruhande rwacu.“

Gusa ngo kuvuga ko byaba biri mu nyungu z’uko Komini Minembwe nijyaho izomekwa ku Rwanda, ngo nta shingiro bifite urebye aho ibice byombi bitandukanira.

Ati “Ukuri ni uko komini ya Minembwe itigeze irenga imbago za teritwari ya Fizi. Komini ya Minembwe iri muri teritwari ya Fizi, bitandukanye n’ibinyoma bikomeje kubwirwa abaturage. Komini Minembwe ntaho ihuriye n’imipaka ya Repubulika, komini ya Minembwe iri muri kilometero zirenga 150 uvuye ku Rwanda kuko abantu bavugamo u Rwanda, ni ngombwa ko umuntu abivuga neza.“

“Harimo izindi teritwari hagati ya Minembwe n’u Rwanda. Bibaye ibishoboka habanza guhuzwa za Teritwari za Uvira, iya Walungu, Umujyi wa Bukavu mbere yo kugera muri Komini ya Minembwe.“

Yasabye ko leta igira uruhare mu gutuma abanyapolitiki bazamura imvugo zisiga icyasha Abanyamulenge, kuko nk’igihe Fayulu ahamagarira abaturage kwirukana abigaruriye ubutaka bwabo, hari ushobora kubyubahiriza agahohotera Abanyamulenge.

Mukiza ati “Twavukiye muri iki gihugu, icyo dushaka kwamagana ni uguharabika aba baturage, kandi ugasanga izo mvugo zikorerwa imbere y’abayobozi ba repubulika, ntabwo abantu bacyihisha ngo bakoreshe izo mvugo.“

Hari hashize iminsi mike abayobozi ba Komini Minembwe batangiye imirimo ku mugaragaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .