Ibyerekeye imishinga y’imena igamije guhangana n’inda ziterwa abangavu yahembwe $10 000 buri umwe

Yanditswe na Ishimwe Israel
Kuya 14 Ukuboza 2019 saa 07:34
Yasuwe :
0 0

Imishinga itatu y’indashyikirwa yitezweho guhangana n’ikibazo cy’inda ziterwa abangavu yahembwe ibihumbi $10 mu irushanwa rya ‘Innovation Accelerator’ (iAccelerator) rigamije kubakamo urubyiruko umuco wo guhanga ibisubizo by’ibibazo byugarije Umuryango Nyarwanda.

Ibi bihembo byatanzwe ku wa 13 Ukuboza 2019, nyuma yo gutangiza ihuriro ry’urubyiruko rusaga 600 mu Intare Conference Arena i Rusororo, higwa ku kurwanya ibiyobyabwenge n’inda ziterwa abangavu.

Iki gikorwa cyitabiriwe na Madamu Jeannette Kagame, abayobozi bo mu nzego nkuru za leta, abashinzwe umutekano, n’abahagarariye imiryango mpuzamahanga mu Rwanda.

Abafatanyabikorwa bose mu rugamba rwo kurwanya ibiyoyabwenge n’inda ziterwa abangavu bari bahagarariwe kuva ku rubyiruko, abahanzi, ababyeyi, abahoze bakoresha ibiyobyabwenge, Polisi y’Igihugu n’Ikigo cy’Igihugu cy’Ubuzima (RBC).

iAccelerator yabaga ku nshuro ya kabiri mu 2019 yahaye umwihariko imishinga igaragaza uburyo bwo guhangana n’inda ziterwa abangavu.

Ku ikubitiro hatanzwe imishinga 752 itoranywamo 40 yakuwemo icumi nyuma yo kunyura imbere y’akanama nkemurampaka ku wa 6 Ugushyingo 2019, muri yo itatu myiza aba ari yo ihembwa.

Imishinga yatsinze ni “Flavours of Family Planning TV show”, ikiganiro cya televiziyo cyinjiza abagabo muri gahunda yo kuboneza urubyaro hakoreshejwe ibikoresho byo mu gikoni; “Urukundo Board Game”, umukino utanga ibibazo hagasuzumwa ko abana babyumvise, utsinze akaba ari uwagaragaje ko azi ayo makuru na “Keza game application’’, porogaramu y’umukino ukubiyemo ubutumwa ku kwirinda inda zitateguwe.

Imishinga yose yatsinze ihuriye ku gutanga ubutumwa bugamije guhangana n’ikibazo cy’abangavu baterwa inda n’ibindi byugarije sosiyete.

- Ibyihariye ku mishinga yatsinze muri iAccelerator

‘Flavours of Family Planning’ itanga uburyo bwo kuboneza urubyaro, ni umushinga wa Uwimana Jean Berchmans, Gisaro Alice na Iradukunda Cyprien.

Uwimana usanzwe ari umuganga wize muri Kaminuza y’u Rwanda yavuze ko barebye imbaraga zashyizwe mu kurwanya inda ziterwa abangavu basanga zerekezwa ku bakobwa n’abagore gusa nyamara abahungu n’abagabo aribo bazitera, bahitamo guhanga uburyo bwo kubegera.

Ati “Icyo dukora ni ukubwira abagabo ko bafite uruhare mu kurwanya inda ziterwa abangavu. Uko bakwitwara ntibatere inda, uko bakwirinda ibyo byago. Ikiganiro cyacu gikorerwa mu gikoni ndetse ni n’uburyo bwo kugaragariza abagabo ko imirimo yo mu gikoni itagenewe abagore gusa.’’

“Flavours of Family Planning TV show” ni ikiganiro kinyuzwa kuri Youtube gitanga inyigisho zitandukanye ku buzima bw’imyororokere no kuboneza urubyaro hifashishijwe ibirungo n’imbuto zirimo intoryi, imineke n’ibindi.

Muri izi nyigisho, umuneke usimbura igitsina cy’umugabo, intoryi ni ubugabo bw’epfo ndetse hanakoreshwa amakaroni nayo afite icyayo. Berekana uko agakingirizo kambarwa n’ibindi.

Amafaranga iri tsinda ryahawe azafasha kwagura ibikorwa byaryo ndetse abakiliya bazajya bashaka iyo miti bazajya abihabwa bitabasabye kujya ahandi.

Uru rubyiruko rurifuza kugeza ubutumwa bwarwo kure kugira ngo rurusheho gukangurira abagabo kugira uruhare mu kuboneza urubyaro.

Undi mushinga washimiwe ni uw’umukino witwa “Urukundo’’, na wo utanga amakuru ku guhangana n’inda ziterwa abangavu.

Umuyobozi wa Urukundo Initiative Ltd, Ndayishimiye Mick, yabwiye IGIHE ko umushinga wabo umaze amezi abiri utangijwe.

Ati “Twaritegereje dusanga inda ziterwa abangavu zishingiye ahanini ku kutagira amakuru ariko dusanga kuyagira bidahagije. Twibajije uko twamenya uko bihagaze, dushyiraho umukino w’amakarita, ahatangwa ibibazo n’ibisubizo aho umuntu abaza ikibazo, undi agasubiza bikadufasha kumenya ko utsinze hari icyo azi ku buzima bw’imyororokere. Uko bakina, bareba mu gitabo twanditse, kandi yemejwe n’abaganga b’inzobere.’’

Gukina uyu mukino ni amafaranga 2000 Frw, ukaba ushobora guhuriramo abantu umunani.

Ati “Nyuma yo guhabwa amafaranga, twagerageje uyu mushinga ahantu hatandukanye. Ababyeyi barawishimiye bavuga ko waje ukenewe. Turateganya kuganira na Minisiteri y’Uburezi ngo umushinga ube wakwinjizwa muri gahunda y’imyigire.’’

Inkunga bahawe izabafasha kugeza umushinga mu gihugu hose no hanze yacyo.

Umushinga wa gatatu wahembwe ni uwitwa “Keza’’, ufasha abakobwa kumenya ingaruka bahura na zo mu gihe bemeye gushukwa.

Mugisha Robert washinze Dopeappsyakoze porogaramu ya “Keza” yavuze ko we na bagenzi be bafite intego yo kugeza serivisi mu gihugu hose.

Yagize ati “Ni umukino uri muri 3D y’umukobwa uba wiruka adahagarara, mu nzira ye ahura n’imbogamizi zitandukanye zirimo nko guhura n’umugabo ushaka kumukoresha imibonano mpuzabitsina, iyo bavuganye abona ingaruka ashobora kugira nko gutwita n’ibindi, iyo amuretse akomeza kwiruka.’’

Iyi application iboneka kuri Android ya Ios no kuri mudasobwa. Biteganyijwe ko izatangizwa ku mugaragaro mu mwaka utaha.

Buri mushinga muri itatu wahawe ishimwe rya $10,000 azayifasha gukomeza gukora no guhugurwa uko yanozwa.

iAccelerator yateguwe ku bufatanye bwa Imbuto Foundation, Ikigega cya Loni cyita ku baturage (UNFPA), Ikigo cya Koreya y’Epfo gitsura Amajyambere (KOICA) na Minisiteri y’Urubyiruko n’Umuco.

-  Indi nkuru wasoma: Ntacyo tutakora nk’ababyeyi ngo mubeho neza ariko tugomba gufatanya-Madamu Jeannette Kagame

Iri huriro ryabereye muri Intare Conference Arena i Rusororo
Uwimana Jean Berchmans asobanura imiterere y'umushinga wa Flavours of Family Planning TV show wigisha kuboneza urubyaro hifashishijwe ibirungo n’imbuto zirimo intoryi, imineke n’ibindi
Keza game application iri mu mishinga itanga icyizere yahembwe
Umukino wiswe 'Urukundo Board Game' na wo watsindiye igihembo cy'ibihumbi $10
Madamu Jeannette Kagame yashyikirije igihembo abatangije umushinga wa Flavours of Family Planning TV show
Madamu Jeannette Kagame yafashe ifoto y'urwibutso n'urubyiruko rwatsinze nyuma yo kumurika imishinga itatu itanga icyizere cy'igisubizo kirambye mu kwita ku kibazo cy’inda ziterwa abangavu yahawe ishimwe rya $10 000 mu irushanwa rya iAccelerator. Iki gikorwa cyabereye mu Ihuriro ry'Urubyiruko ryabereye mu Intare Conference Arena ku wa 13 Ukuboza 2019
Abahanzi banyuze muri ArtRwanda- Ubuhanzi bahacanye umucyo. uhereye ibumoso: Paci Rutabingwa; Bisangwabagabo Sankara Salomon wize Ubugeni ku Nyundo na Ngabo Evode [Evy] uyobora Umurage Live Band
Abahanzi banyuze mu Irushanwa ArtRwanda- Ubuhanzi bataramiye abitabiriye iri huriro ry'urubyiruko mu bihangano birimo ibivuga ku buzima bwiza

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza