Ntacyo tutakora nk’ababyeyi ngo mubeho neza ariko tugomba gufatanya-Madamu Jeannette Kagame

Yanditswe na Ishimwe Israel
Kuya 13 Ukuboza 2019 saa 07:24
Yasuwe :
0 0

Madamu Jeannette Kagame yagaragaje ko ababyeyi bafite inshingano zo kurera no kwita ku rubyiruko ariko rukaba ari rwo rugomba guhitamo ibirubereye.

Ni ubutumwa yatanze kuri uyu wa 13 Ukuboza 2019, mu Ihuriro ry’Urubyiruko rusaga 600 n’ababyeyi bateraniye mu Intare Conference Arena i Rusororo.

Iri huriro ryiga ku mibereho y’urubyiruko no kubaho neza k’umuryango, ryibanze ku biganiro bijyanye no ‘‘Kurera urubyiruko rufite ubuzima bwiza, buzira ibiyobyabwenge n’inda ziterwa abangavu.’’

Madamu Jeannette Kagame yagarutse ku kibazo gikomeye cy’ikoreshwa rikabije ry’ibiyobyabwenge n’inda ziterwa abangavu kibangamiye Umuryango Nyarwanda.

Ati “Iki kibazo gikwiye kureberwa mu buryo bwagutse bw’iterambere rirambye. Icyerekezo cya Afurika mu 2063, Intego z’Iterambere rirambye, SDGs na Gahunda y’Igihugu y’Iterambere, NST1 yo kuzamura ubukungu no kubaka umuryango ushoboye kandi utekanye.’’

Yavuze ko ikibazo cy’ibiyobyabwenge gihangayikishije Isi ariko hari abashoboye guhangana nacyo bubaka imitekerereze n’inzego birinda abanyagihugu.

Ati “Hari abagira gahunda zigisha, basuzuma inzego zitanga izo serivisi harebwa niba zubahiriza amategeko nko kureba niba abantu bujuje imyaka igenwa n’amategeko. Iyo batabyubahirije bakamburwa uburenganzira bwo gucuruza. Birababaje kubona umuntu akomeza guha inzoga umuntu wasinze, hari aho usanga abantu babona umwana yinjiye mu kabari bagatabaza.’’

Mu mpanuro ze yavuze ko iterambere rizana amahirwe menshi ariko ashobora kugira imbogamizi mu gihe umuntu atiteguye neza.

Ati “Ese Abanyarwanda basobanukiwe icyerekezo cyacu nk’igihugu, abantu bategurwa bate? Iterambere ryose rikwiye kubaka umuntu wuzuye kandi usobanutse.’’

Madamu Jeannette Kagame yeretse urubyiruko ko rufite amahitamo yo kugena ubuzima bwarwo.

Ati “Ntacyo tutakora nk’ababyeyi ngo mubeho neza ariko tugomba gufatanya twese ngo tubone ibisubizo ku bibazo byakwangiza ubuzima. Turabakunda, ntacyo tutabakorera ariko ntabwo twabasimbura. Amahitamo ni ayanyu.’’

Madamu Jeannette Kagame yabwiye urubyiruko ko arirwo rufite amahitamo yo kugena ubuzima bwarwo bw'ahazaza

Iri huriro ryibanze ku kuganira ku ngamba zo guhangana n’ibiyobyabwenge n’inda ziterwa abangavu. Mu mpamvu zagaragajwe nk’izitiza umurindi inda ziterwa abangavu harimo ubumenyi buke, amakuru make ku buzima bw’imyororokere, uburyo bwo kuboneza urubyaro bugifatwa nka kirazira no gushyingira abana.

Mu batanze ibiganiro muri iri huriro harimo urubyiruko rwiteje imbere n’abaretse ibiyobyabwenge. Mu butumwa bwabo bagarutse ku myitwarire ikwiye irimo kwirinda ikigare no kwiha intego mu buzima.

Raporo y’Ikigo cy’Igihugu cy’Ibarurishamibare ku Miturire n’Ubuzima (RDHS) yerekanye ko abangavu baterwa inda bavuye kuri 6.1% mu 2010 bagera kuri 7.3% mu 2015. Nibura umwe mu bakobwa batanu abyara atarageza imyaka 19 y’amavuko. Abana b’abakobwa batewe inda bangana na 49.6% basamye bafite imyaka iri hagati ya 12 na 17.

Imibare yo mu 2016 ya Minisiteri y’Uburinganire n’Iterambere ry’Umuryango igaragaza ko abangavu 17,500 bari hagati y’imyaka 15-17 batewe inda, bivuze ko nibura abana 47 bavukaga buri munsi.

Ku kibazo cy’ibiyobyabwenge, imibare yerekana ko kuva muri Mutarama abarenga 2000 babifatiwemo, muri bo 758 bava mu turere duhana imbibi n’ibihugu by’abaturanyi.

Umuhuzabikorwa wa One UN mu Rwanda, Fodé Ndiaye, yashimye igitekerezo cyo gushyigikira imishinga igamije guha umwanya urubyiruko mu guhangana n’ibibazo bihari.

Ati “Kongerera ubushobozi abakiri bato, ni ingenzi kuri bo, ni n’uburyo bwo kubaka Isi nziza. Loni ntiyagera ku ntego yayo idakoranye n’urubyiruko.’’

Yavuze ko urubyiruko rw’u Rwanda rwahiriwe no kugira igihugu kiruha agaciro kikanarwizera.

Ati “Mugomba guharanira uburenganzira bwanyu ariko mukagira uruhare mu kubaka igihugu. Muri abayobozi ba none, ntimuri abahazaza. Mukore ibikenewe mu miryango mukomokamo. Nimukora ibyo ni yo nyiturano ikwiye ku bitangiye igihugu mu myaka 25 ishize. Mufite amahirwe, muyabyaze umusaruro.’’

Imishinga y’indashyikirwa yahembwe

Mu Ihuriro ry’Urubyiruko hahembwe imishinga itatu yagaragaje ibisubizo bizafasha mu gukumira no kurwanya inda ziterwa abangavu mu irushanwa rya Innovation Accelerator.

Uyu mushinga watangijwe mu 2016 hagamijwe gushishikariza urubyiruko gutekereza byagutse ku bibazo by’ubuzima bw’imyororokere no kwihangira imirimo.

Muri uyu mwaka, iAccelerator yabaga ku nshuro ya kabiri mu 2019 yahaye umwihariko imishinga igaragaza uburyo bwo guhangana n’ikibazo cy’inda ziterwa abangavu.

Imishinga yatsinze ni “Flavours of Family Planning TV show”, ikiganiro cya televiziyo gikangurira abagabo muri gahunda yo kuboneza urubyaro, ibi bigakorwa hifashishijwe ibikoresho byo mu gikoni; “Urukundo Board Game”, umukino utanga ibibazo ku buzima bw’imyororokere hagasuzumwa ko abana babyumvise, utsinze akaba ari uwagaragaje ko azi ayo makuru na “Keza game application’’, porogaramu y’umukino ukubiyemo ubutumwa ku kwirinda inda ziterwa abangavu.

Uwimana Jean Berchmans uri mu bakora ikiganiro cya Flavours of Family Planning TV show yavuze ko umushinga wabo wigisha kuboneza urubyaro hifashishijwe ibirungo n’imbuto zirimo intoryi, imineke n’ibindi.

Ati “Iki gihembo twahawe kizadufasha gukomeza kunoza ibikorwa byacu byo kwigisha abagabo ko bafite uruhare mu kuboneza urubyaro, gukumira no kwirinda inda ziterwa abangavu.’’

Buri mushinga wahawe ishimwe ringana na $10,000 yo gukomeza gukora no guhugurwa uko yanozwa.

Umunyamabanga wa Leta muri Minisiteri y’Urubyiruko n’Umuco, Bamporiki Edouard, yavuze ko impamba urubyiruko rwahawe ari inkomezi mu kubaka u Rwanda.

Ati “Urubyiruko rurarangaye ndetse benshi barengwa n’ibyo ababyeyi bavunikiye, amateka yacu yatumye hari ibyo tutageraho. Ni igihe cyacu cyo guhunika ngo abazaza bazasange koko twari duhari.’’

iAccelerator yateguwe ku bufatanye bwa Imbuto Foundation, Ikigega cya Loni cyita ku baturage (UNFPA), Ikigo cya Koreya y’Epfo gitsura Amajyambere (KOICA) na Minisiteri y’Urubyiruko n’Umuco.

Umuhuzabikorwa wa One UN mu Rwanda, Fodé Ndiaye, yavuze ko imishinga y'urubyiruko ari ingenzi mu guhangana n’ikibazo cy’inda ziterwa abangavu. Yabwiye abatabonye amahirwe yo gutsinda ko na bo ari abatsinzi kuko uruto ruto arirwo rugendo
Madamu Jeannette Kagame yahanuye urubyiruko rusaga 600 rwateraniye mu Intare Conference Arena
Umuyobozi ushinzwe Itangazamakuru muri I&M Bank Rwanda, Fiona Kamikazi, yasangije urubyiruko ubuzima yanyuzemo. Yarusabye kugira amakenga mu byo rugiye gukora no kwiyemeza aho rwifuza kugana
Kamikazi Fiona yashimye icyizere yagiriwe cyo gusangiza urubyiruko ubuzima yanyuzemo
Rwiyemezamirimo Kwizera Christelle w'imyaka 25 yabwiye urubyiruko kwitwararika ntirwemere gushukwa n'utuntu tworoheje. Ati "Ibyo mushaka muzabigeraho. Muri twe twifitemo imbaraga. Njya mbona abana b'abakobwa bashukishwa shenete zihita zicuya."
Umunyarwenya Hervé Kimenyi yavuze ko muri byose umuntu agomba kwitegura ngo agere kuri gahunda yiyemeje. Yagaragaje ko umuntu afite icyo kwitaho atakwishora mu biyobyabwenge
Umunyamakuru wa Kiss FM, yavuze ko ababyeyi bakwiye kuvugurura uburyo bwo kwita ku burere bw'abana babo kuko imibereho yahindutse bijyanye n'ikoranabuhanga Isi ifite
Uhereye ibumoso: Umunyamabanga Mukuru w'Urwego rw'Igihugu rushinzwe Ubugenzacyaha 'Rwanda Investigation Bureau' (RIB), Ruhunga Jeannot; Umuyobozi wa Imbuto Foundation, Umutoni Sandrine n'Umujyanama wa Perezida wa Repubulika mu by’Umutekano, Gen. James Kabarebe, mu bayobozi bitabiriye iri huriro
Umuhanzi Hitayezu Janvier yatanze ubuhamya bw'uburyo ibiyobyabwenge byari byaramugize imbata, akaza kujyanwa Iwawa akahava yarasubiye ku murongo. Yasabye urubyiruko kugendera kure ibiyobyabwenge kuko byangiza ubuzima bwarwo
Urubyiruko rwaturutse mu bice bitandukanye rwitabiriye iri huriro ryize ku kurandura ibiyobyabwenge no kurwanya inda ziterwa abangavu
Ndacyayisenga Dynamo wo mu Kigo cy'Igihugu cy'Ubuzima yasobanuye ingaruka zo gukoresha ibiyobyabwenge ku buzima bw'umuntu
Umuyobozi w'Ishami ry'Umuryango w'Abibumbye ryita ku bikorwa by'Abaturage (UNFPA) mu Rwanda, Mark Bryan Schreiner, yitabiriye iri huriro
Umuyobozi w’Ishami rya Polisi rishinzwe Imikoranire n’izindi nzego (Community Policing), CP Bruce Munyambo, yavuze ko gukumira no kurwanya ibiyobyabwenge bisaba ko ababyeyi, ibigo bigororerwano n'amatsinda afasha mu gukumira ibyaha, bahuriza hamwe imbaraga muri urwo rugamba
Umuyobozi wa Rwanda Leaders Fellowship, Eric Munyemana, yasangije abitabiriye iki gikorwa uko umuryango ukwiye kuba ishingiro ry’ibikorwa bigamije kubaka umuryango muzima
Abitabiriye iri huriro batanze ibitekerezo, banabaza ibibazo bitandukanye
Umuyobozi Mukuru wa Polisi y'u Rwanda, IGP Dan Munyuza, yavuze ko ku kibazo cy'ibiyobyabwenge hakenewe kongerwa imbaraga ku nkiko z'u Rwanda kuko imibare igaragaza ko uturere duturiye imipaka aritwo tuza ku isonga mu kunyuzwamo ibiyobyabwenge
Minisitiri w'Uburinganire n'Iterambere ry'Umuryango, Nyirahabimana Soline, yavuze ko hakenewe ingamba zo guhangana n'ikibazo cy'ibiyobyabwenge cyugarije umuryango
Abayoboye imishinga icumi babanje gusobanura imiterere yayo n'icyo itegerejweho mu guhangana n'ikibazo cy'inda ziterwa abangavu
Iri huriro ryabereye muri Intare Conference Arena i Rusororo
Uwimana Jean Berchmans asobanura imiterere y'umushinga wa Flavours of Family Planning TV show wigisha kuboneza urubyaro hifashishijwe ibirungo n’imbuto zirimo intoryi, imineke n’ibindi
Keza game application iri mu mishinga itanga icyizere yahembwe
Umukino wiswe 'Urukundo Board Game' na wo watsindiye igihembo cy'ibihumbi $10
Madamu Jeannette Kagame yashyikirije igihembo abatangije umushinga wa Flavours of Family Planning TV show
Umuyobozi w'Umuryango Mpuzamahanga w’Abanya-Koreya y’Epfo, Korea International Cooperation Agency (KOICA) mu Rwanda, Lee Byung Hwa, yashimye ubuyobozi bwa Imbuto Foundation bwafashe iya mbere mu kurwanya inda ziterwa abangavu no guharanira imibereho myiza y'Abanyarwanda
Umunyamabanga wa Leta muri Minisiteri y’Urubyiruko n’Umuco, Bamporiki Edouard, yabwiye urubyiruko ko uwihanganira ikigeragezo arimo uyu munsi ariwe uzatsinda urugamba rw’ahazaza
Madamu Jeannette Kagame yafashe ifoto y'urwibutso n'urubyiruko rwatsinze nyuma yo kumurika imishinga itatu itanga icyizere cy'igisubizo kirambye mu kwita ku kibazo cy’inda ziterwa abangavu yahawe ishimwe rya $10 000 mu irushanwa rya iAccelerator. Iki gikorwa cyabereye mu Ihuriro ry'Urubyiruko ryabereye mu Intare Conference Arena ku wa 13 Ukuboza 2019
Abahanzi banyuze muri ArtRwanda- Ubuhanzi bahacanye umucyo. uhereye ibumoso: Paci Rutabingwa; Bisangwabagabo Sankara Salomon wize Ubugeni ku Nyundo na Ngabo Evode [Evy] uyobora Umurage Live Band
Abahanzi banyuze mu Irushanwa ArtRwanda- Ubuhanzi bataramiye abitabiriye iri huriro ry'urubyiruko mu bihangano birimo ibivuga ku buzima bwiza

Amafoto: Himbaza Pacifique

Video: Mugwiza Olivier na Hakizimana Alain


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .