Ibyagezweho mu bukemurampaka nyuma y’imyaka umunani KIAC itangijwe

Yanditswe na Iradukunda Serge
Kuya 10 Nzeri 2020 saa 08:29
Yasuwe :
0 0

Urugaga rw’abikorera (PSF) ku bufatanye na Guverinoma y’u Rwanda ku wa 31 Gicurasi 2012 batangije Ikigo Mpuzamahanga cy’Ubukemurampaka cya Kigali (KIAC), hagamijwe gufasha abashoramari, abacuruzi n’abandi bose kwikemurira impaka mu bwunvikane batagombye kujya mu nkiko.

Zimwe mu nshingano za KIAC harimo gukangurira abacuruzi gukoresha ubukemurampaka, guhugura no gutanga impamyabushobozi ku bakemurampaka kuko bafite uruhare runini mu irangizwa ry’imirimo y’ubukemurampaka.

Mu myaka umunani ishize ikigo KIAC gishinzwe, Umunyamabanga mukuru wacyo, Dr Fidèle Masengo avuga ko kimaze kugera kuri byinshi haba mu mubare w’imanza cyaburanishije, umubare w’abakemurampaka cyahuguye ndetse n’ibijyanye n’ibindi bikorwa bitandukanye gikora.

Yagize ati “Dutangira mu Rwanda nta mukemurampaka wari ubihuguriwe mu buryo bwa kinyamwuga wari uhari, kuva ikigo gitangiye gukora kimaze guhugura abakemurampaka barenga 500 kandi bahuguwe n’ikigo mpuzamahanga gihugura abakemurampaka cyo mu Bwongereza. Ikigo cyahuguye n’abahuza b’umwuga (Mediators)".

Yakomeje avuga ko mu myaka umunani KIAC imaze ishinzwe yaburanishije imanza zirenga 160 ziturutse mu bihugu bigera kuri 20 bitandukanye.

Ati “Twagize imanza nyinshi zirenga 160, kandi mu bindi bihugu usanga ibigo twatangiriye rimwe bitaragira imanza zirenga eshanu kandi inyinshi muri zo ari izo mu bihugu byabo gusa, kuri twebwe izi manza zirenga 160 ni izo mu bihugu byinshi.”

Muri izi manza z’ubucuruzi zirenga 160 zaburanishijwe na KIAC harimo 33 zaburanishijwe mu mwaka ushize muri Nyakanga, zirimo izaturutse mu bihugu nka Zambia, Uganda, u Burundi, Senegal, u Butaliyani, u Bushinwa, u Buhinde n’u Bufaransa. Ibi bikaba bitanga icyizere ko intego yacu yo kuba igicumbi mpuzamahanga cy’ubukemuramapaka muri aka karere irimo kugerwaho.

Dr. Masengo avuga ko KIAC yafashije abacuruzi b’Abanyarwanda kubona ubukemurampaka hafi ndetse ikaba yarakuruye n’abacuruzi bo mu bindi bihugu mbere bajyaga bitabaza ubukemurampaka bwo mu bihugu by’i Burayi no muri Aziya.

Inyungu ziri mu kwiyambaza KIAC

Iyo ugereranyije n’uko inkiko zisanzwe zikora, usanga ku bacuruzi bagana KIAC ngo ibafashe gukemura ibibazo bafitanye na bagenzi babo babifitemo inyungu cyane yaba mu bijyanye n’uko bahabwa amahirwe yo guhitamo igihe bazaburanira, guhitamo ururimi bazakoresha no kwihitiramo umukemurampaka uzakora mu rubanza rwabo.

Dr. Masengo avuga ko kugana KIAC ari uguhitamo ubutabera ababuranyi bagiramo uruhare runini.

Ati “Navuga ko ari ubutabera ariko ababuranyi bagiramo uruhare runini cyane mu gufata ibyemezo bijyanye n’uburyo umukemurampaka ayobora ubwo butabera mu gihe mu nkiko ibyinshi biba ari amategeko, ntuhitamo umucamanza, ntuhitamo amasaha akuburanisha, ntuhitamo ururimi ukoresha mu gihe mu bukemurampaka ho bikunda kandi noneho bikaba mu ibanga.”

Umunyamategeko akaba n’umwe mu bakemurampaka bakoranye na KIAC igihe kinini, Rutabingwa Athanase avuga ko uwamenya ibyiza by’iki kigo atagakwiye kuyoboka izindi nzira zimusiragiza.

Yagize ati “Iyo utangiriye urubanza mu Rukiko rw’Ubucuruzi ukagera mu rukiko wenda rw’Ubujurire cyangwa se rw’Ikirenga bigufata imyaka myinshi, nk’umucuruzi inyungu ze ni ukugira ngo ikibazo cye kirangire uwo munsi yishyurwe cyangwa se afate indi nzira”.

Yakomeje agira ati “ KIAC icyo yadufashije imanza yagiye ica binyuze mu bukemurampaka ni imanza zihuta cyane ugereranyije n’uko zakabaye zica mu nkiko, ikindi ni imanza zihenduka kuko amafaranga atangwa muri KIAC ni make ugereranyije no gufata umwunganizi mu mategeko ukishyura amagarama y’urukiko ku rwego rwa mbere, urwa kabiri n’urwa gatatu, iyo nzira ni ndende ku mucuruzi.”

Bitandukanye n’inkiko, Rutabingwa avuga ko bitewe n’ubwoko bw’urubanza mu itsinda ry’abakemurampaka haba harimo inzobere mu bijyanye n’ikiburanwa.

Ati “Mu gihe hacibwa urubanza rujyanye n’imisoro haba harimo n’inzobere mu by’imisoro, niba ari urubanza mu bijyanye n’icungamutungo haba harimo umucungamutungo niba ari urubanza rw’ubwubatsi haba hari inzobere mu bwubatsi.”

Muri izi nyungu zose hiyongeraho ko urubanza rw’ubucuruzi ruburanishirijwe muri KIAC ruba mu ibanga. Ubukemurampaka burangira Inteko y’Ubukemurampaka ifashe icyemezo kigomba kubahirizwa nk’urubanza kandi gishobora kurangizwa ku ngufu nk’uko bimeze mu manza, Umukemurampaka agendera ku mabwiriza y’ubukemurampaka kandi aba afite n’imyitwarire ituma akazi gakorwa neza nta karengane k’impande zombi.

Rutabingwa asanga uko imyaka izagenda abacuruzi bakarushaho no kuyimenya bizagabanya umubare w’imanza z’ubucuruzi zijya mu nkiko.

Ibyiza bya KIAC Rutabingwa abisangiye n’umuyobozi w’urugaga rw’abikorera Robert Bapakurera, uvuga ko iki kigo cyabafashije gukemura mu buryo bwihuse amakimbirane abikorera bashobora kugirana.

Ati “Byagabanyije igihe abikorera bashoboraga kumara mu nkiko, ndetse byatumye umuntu agira ahandi hantu yagana igihe adashaka kujya mu nkiko […] byarafashije cyane abenshi badashaka kujya mu nkiko barabagana.”

Bapfakurera akomeza avuga ko inyinshi mu ntego zatumye KIAC ijyaho zigenda zigerwaho.

Mu gihe Isi iri mu bihe bikomeye by’Icyorezo cya Covid-19 ubu KIAC ibitewemo inkunga n’Ikigo kigamije guteza imbere ubucuruzi cya Trade Mark East Africa yatangije uburyo bwo gutanga izi serivisi z’ubukemurampaka n’ubwunzi hifashishijwe iyakure.

Ni ikoranabuhanga umuyobozi wa Trade Mark East Africa mu Rwanda, Patience Mutesi avuga ko rizazana isura nshya mu bukemurampaka n’ubundi buryo bwo gukemura amakimbirane.

Umunyamabanga mukuru wa KIAC, Dr Fidèle Masengo avuga ko imyaka umunani imaze ishinzwe imaze kugera kuri byinshi
Rutabingwa Athanase wakoranye igihe kinini na KIAC avuga ko kuyigana harimo inyungu nyinshi kurusha kugana inkiko
Mu byagezweho na KIAC harimo inama mpuzamahanga ku bukemurampaka yagiye yakira
Aha hari mu nama ya SOAS Arbitration in Africa yakiwe na KIAC mu 2018
Icyicaro gikuru cya KIAC giherereye Nyarutarama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .