Iby’ingenzi muri raporo u Rwanda rugiye gutanga ku burenganzira bwa muntu

Yanditswe na Rabbi Malo Umucunguzi
Kuya 19 Ukwakira 2020 saa 12:11
Yasuwe :
0 0

Guverinoma y’u Rwanda igiye gutanga raporo ya gatatu ku isuzuma mu bijyanye n’iyubahirizwa ry’uburenganzira bwa muntu, yakozwe hagendewe ku myanzuro rwahawe n’Akanama k’Umuryango w’Abibumbye ku burenganzira bwa muntu.

Iyi raporo yemejwe n’Inama y’Abaminisitiri yo ku wa 12 Ukwakira 2020, igaruka ku myanzuro 50 u Rwanda rwahawe mu 2015. Iyi raporo izatangwa muri iki cyumweru, u Rwanda rukazajya kuyisobanura i Genève mu Busuwisi muri Mutarama 2021.

Umuyobozi muri Minisiteri y’Ubutabera ukuriye ishami ry’ubutabera mpuzamhanga, Umurungi Providence, yavuze ko imyanzuro yose u Rwanda rwahawe hari ibyayikozweho, ku buryo yubahirijwe nibura kuri 95%, hagasigara igice cy’ibikorwa bitarangira, bihora bikeneye amikoro y’igihugu.

Yakomeje ati “Hari imyanzuro yari ijyanye no kuvugurura amategeko, hari amwe yarimo ingingo zibangamiye uburenganzira bwa muntu, nk’itegeko rishya rihana ibyaha ryavanywemo ingingo zo gusebanya, hari n’amategeko twavuguruye nk’itegeko ry’umuryango rigena izungura, havanywemo ingingo zarimo ivangura nko ku bagore, duha umugore uburenganzira bungana n’ubw’umugabo.”

Mu byakozwe harimo n’ibijyanye n’ivurugurwa ry’inzego cyangwa gushyiraho inshya, aho hashyizweho Urwego rw’Ubugenzacyaha, RIB, hagamijwe guteza imbere ubunyamwuga mu bugenzacyaha. Ni urwego rwigenga, mu gihe mbere ryari ishami ryo muri Polisi ryamenyekanye nka CID.

Mu butabera kandi hashyizweho Urukiko rw’Ubujurire mu kurushaho kugabanya imanza zatindaga, ndetse hashyirwaho ikoranabuhanga rihuza inzego z’ubutabera zirimo inkiko, abacamanza, abashinjacyaha na za gereza, rizwi nka IECMS.

Mu myanzuro u Rwanda rwari rwahawe kandi harimo n’ujyanye no kurwanya iyicarubozo, aho mbere n’ubwo hariho Komisiyo y’Uburenganzira bwa muntu, ubu yongerewe ububasha bwo gukurikirana ibijyanye n’iyicarubozo.

Umurungi yakomeje ati “Mu itegeko ryo mu 2018 ryavuguruwe hashyizweho itsinda ry’abantu umunani bafite ububasha bwo kujya muri gereza igihe cyose, bakaganira n’imfungwa bashaka mu buryo bifuza, bakabikoraho raporo.”

Uretse ibyo, harimo n’umwanzuro wavugaga ku burenganzira bw’imfungwa, aho hubatswe gereza nshya ya Mageragere ndetse hari na kasho zagiye zivugururwa, nubwo ikibazo cy’ubucucike kitarakemuka.

Umurungi yavuze ko ubu hari imfungwa hafi ibihumbi 75, ariko mu myaka mike ishize hafunguwe abagera ku 9440 by’agateganyo, ndetse hari abantu 110 bahawe imbabazi.

Yakomeje ati “Muri raporo twanashyizemo ko hariho ingamba zo kugabanya uwo mubare, aho mu itegeko rishya rihana ibyaha mu Rwanda hashyizwemo uburyo bushya – ubu harimo kwigwa ku buryo bwo kubukoresha – hari ibyaha bimwe kubera ko tudafite ubundi bushobozi bwo kubigenzura, usanga abantu bajya muri gereza kandi badakwiye kuba bafungwa.”

“Ariko mu itegeko rishya harimo igihano nsimburagifungo n’uburyo bwo kwambika umuntu igikomo cy’ikoranabuhanga, cyatuma umukurikirana utiriwe umushyira mu munyururu.”

Yavuze ko hari ubushake mu gukomeza gukemura ikibazo cy’ubucucike, ku buryo ubutaha iyi mibare izaba yamanutse kurushaho.

Mu bindi byatanzweho raporo harimo ubwisanzure bw’itangazamakuru, aho harebwe nk’ibinyamakuru bihari uyu munsi ugereranyije na 2015, n’ibindi.

Harimo n’ibyakozwe mu gukurikirana igihe hari umuntu bitangajwe ko yabuze, aho muri RIB hashyizweho ishami rishinzwe icyo cyiciro, nubwo hari igihe mu Rwanda ngo umuntu bitangazwa ko yabuze, rimwe bakavuga ko leta ibifitemo uruhare, ariko nyuma bakazafatwa baragiye mu mitwe igamije guhungabanya umutekano.

Umurungi yakomeje ati “Muri raporo tuvugamo ko kuva iryo shami ryajyaho, RIB yakiriye ibibazo bigera mu 1300. Muri abo bantu 1300, abantu 1010 barabonetse, abandi bagera ku ijana na mirongo nibo tutazi iherezo ryabo. Abo ngabo ubwo bakomeza kubashakisha.”

“Ukuri guhari ni uko usanga benshi baranambukiranyije n’imipaka yacu, yaragiye Congo, yaragiye Uganda, yaragiye i Burundi, nibyo twanabwiye abadiplomate bigeze kubitubazaho cyane, kuko hari imiryango imwe yagiye ivuga ngo barabuze, umuntu akagenda ngo agiye Uganda, yarangiza akagata akajya mu mashyamba muri Congo.”

Hari inzego imibare itari hejuru

Umurungi yavuze ko imyanzuro ijyanye no gushyiraho amategeko cyangwa ingamba, yashyizwe mu bikorwa ku rwego rukomeye, gusa ngo hari ijyanye n’imibereho y’abaturage inasaba amikoro menshi, ikeneye gukomeza gushyirwa mu bikorwa.

Muri iyo myanzuro harimo nk’intera igenwa ku buryo umuntu atagakwiriye kurenza igihe ajya gushaka serivisi z’ubuzima ku ivuriro rimwegereye, cyangwa ibipimo by’abantu bakwiye kuba bafite amazi meza.

Yakomeje ati “Muri rusange duhagaze kuri 95%, ibisigaye ni imyanzuro twanakozeho ariko bisaba guhora wongeramo ingufu, wongeramo amafaranga bitewe n’ubushobozi igihugu gifite. Ubushake bwa leta burahari, kandi tubikora kubera ko ari Umunyarwanda ubyungukiramo mbere.”

Iri suzumwa riba nibura myaka ine hagamijwe gusuzuma uko uburenganzira bwa muntu bwubahirizwa mu bihugu 193 bigize ako kanama k’Umuryango w’Abibumbye ku burenganzira bwa muntu, aho ibihugu bisuzumana hagati yabyo.

Buri gihugu kigira umwanya wo kujya imbere y’ibindi kigasobanura uko uburenganzira bwa muntu bwubahirizwa, ibindi bihugu bigatanga imyanzuro y’ibintu byanozwa, ari naho hava imyanzuro ihabwa ibihugu.

Isuzuma u Rwanda rwitabiriye bwa mbere mu 2011 rirangira rwemeye imyanzuro 67, rusubirayo mu 2015 rugaragaza uko rwashyize mu bikorwa iya mbere, runahabwa imyanzuro 50 yindi rumaze imyaka ine n’igice rushyira mu bikorwa.

Ni isuzuma ryashyizweho mu 2006.

Umuyobozi muri Minisiteri y’Ubutabera ukuriye ishami ry’ubutabera mpuzamhanga, Umurungi Providence, aganira n'abanyamakuru kuri uyu wa Mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .