Habura iki ngo mu nzego z’abikorera hubahirizwe ihame ry’uburinganire nko mu za Leta?

Yanditswe na Iradukunda Serge
Kuya 11 Nzeri 2020 saa 07:07
Yasuwe :
0 0

Nta mwaka wirenga u Rwanda rudashyizwe ku ntonde z’ibihugu byubahiriza neza ihame ry’uburinganire ndetse bigaha amahirwe angana abagabo n’abagore yo kujya mu nzego z’igihugu zifata ibyemezo. Nubwo u Rwanda rusa n’urwamaze kwesa uyu muhigo mu nzego za leta mu z’abikorera ho birasa n’aho urugendo rukiri rurerure.

Kuba mu nzego za Leta u Rwanda rwarateye intambwe ishimishije mu guha abagore n’abagabo amahirwe angana yo guhatanira umwanya runaka ni ibintu n’imibare igaragaza.

Kugeza mu 2019 abagore nibo bari bayoboye Minisiteri nyinshi zigera kuri 12, mu gihe abagabo bari bayoboye icyenda. Utabariyemo Minisitiri w’Intebe, ba Minisitiri n’abanyamabanga bari leta ni 27, aho abagore bari 52% by’aba bose.

Uretse muri Guverinoma, u Rwanda ni rwo ruyoboye ibindi bihugu byo ku Isi mu kugira abagore benshi mu Nteko Ishinga Amategeko, aho mu Mutwe w’Abadepite ubwiganze bwabo buri kuri 61.3%.

Mu bucamanza ho abagore bangana na 49.6% mu gihe mu buyobozi bw’inama njyanama z’uturere ho bagera kuri 41%. Ibi birumvikana kuko Kuva mu 2003 Itegeko Nshinga rigena ko mu myanya yose itorerwa mu buyobozi no muri guverinoma, abagore bagomba kugiramo 30%.

Ibi byose bituma u rwanda ruza imbere mu ruhando rw’amahanga nk’igihugu gishyigikira ko umugabo n’umugore bagira amahirwe angana.

Raporo ya 2019 y’Ihuriro ry’Abagize Inteko zishinga Amategeko (IPU) yerekana ko kuva mu 2017, u Rwanda ruri mu bihugu icyenda bifite abagore nibura 50% mu myanya ya ba Minisitiri cyangwa abanyamabanga ba Leta.

Ku mwanya wa mbere hari Espagne ifite abagore 64.7% muri Guverinoma, Nicaragua ifite 55.6%, Suède ifite 54.4%, Albania ni 53.3%, Colombia ni 52.9%, Costa Rica ni 51.9%, u Rwanda ni 52% bayoboye Minisiteri n’abanyamabanga ba leta mu gihe Canada n’u Bufaransa bifite 50%.

Mu bikorera ho harabura iki?

Nubwo u Rwanda rumaze kuba ikimenyabose kuba amahirwe ruha abagabo n’abagore rutarobanuye, imibare igaragaza ko mu nzego z’abikorera ho atari ko bimeze kuko iyo ugenzuye usanga hari ahantu bakiri bake cyane ndetse n’ahandi bigoranye kubabona.

Mu bushakashatsi bwakozwe mu 2018 ku bijyanye n’abakozi mu nzego zitandukanye z’abikorera bwagaragaje ko mu bakozi bose, abagore bafite ubwiganze bugera kuri 44.8%, gusa muri aba 28% nibo bari mu myanya y’ubuyobozi mu bigo bitandukanye, abandi usanga bafite imirimo yoroheje nko gukora amasuku no gucururiza abandi.

Zimwe mu nzego z’abikorera hari aho usanga umubare w’abagore uri hasi cyane nk’aho mu bijyanye n’ubucukuzi na mine bangana na 6% mu gihe abagabo ari 94%, mu bwikorezi ho bangana na 3% mu gihe abagabo ari 97%, mu bijyanye n’amakuru n’itumanaho abagore bangana 26% abagabo 74%.

Si muri izi inzego z’abikorera gusa umubare w’abagore ukiri muto kuko n’iyo ugeze mu bijyanye n’imirimo ya siyansi n’ikoranabuhanga usanga abagore ari 31% mu gihe abagabo ari 69%.

Imibare y’abagore itangira kuzamuka iyo bigeze mu mirimo y’ubuhinzi n’iyo mu rugo isanzwe.

Iki kibazo cy’ubusumbane hagati y’abagabo n’abagore mu nzego z’abikorera kinemezwa n’Umuyobozi w’Urugaga rw’Abikorera, Robert Bafakulera uvuga koko ko gihari.

Yagize ati “Turabibona nko mu bwikorezi ni bake cyane, mu bucukuzi bw’amabuye y’agaciro ni bake cyane noneho wagenda ugasanga ahandi hataba inyungu nyinshi ni benshi cyane nko mu buhinzi n’ibindi […] nk’abikorera icyo cy’uho twarakibonye icyo dukora ni ugukangurira abagore tukabereka ko ntaho bahejwe.”

Yakomeje avuga ko kuba abagore batagaragara muri iyi mirimo ko atari uko badashoboye.

Ati “Usanga bashoboye ariko ahanini usanga batarabyitabiriye wenda n’uko batigeze babona bagenzi babo babikora ngo babone ko babishobora ariko tumaze kubona abagore bashobora gutwara amakamyo nk’uko abagabo bayatwara, abagore bashoboye gutwara taxi nk’uko abagabo bazitwara, ahubwo ikibura ni ukubakangurira ko buri wese yabishobora n’abagabo tukabakangurira ko n’abagore babishoboye.”

Mu rwego rwo kuziba iki cy’uho cy’ubusumbane bw’abagore n’abagabo mu nzego z’abikorera, Bapfakulera avuga ko PSF yatangije gahunda y’imyaka itanu ifatanyije n’abandi bafatanyabikorwa batandukanye hagamijwe kureba inzitizi abagore bagira no kubafasha kugaragara cyane mu nzego z’abikorera.

Yakomeje ati “Nk’abikorera twashyizeho gahunda yo kugira ngo turebe ahantu hari ikinyuranyo cyane cy’abagabo n’abagore; twakoze gahunda y’imyaka itanu kugira ngo turebe aho ikibazo kiri. Kuki abagore batagaragara cyane kandi ari mu bintu byafasha igihugu, kugira ngo dushyire imbaraga aho tubona hari ikinyuranyo kinini.?”

Muri iyi gahunda y’imyaka itanu izwi nka ‘Private sector gender mainstreaming strategy’ Urugaga rw’Abikorera ruyifatanyijemo n’Urwego rushinzwe kugenzura Iyubahirizwa ry’Uburinganire n’Ubwuzuzanye rw’abagore n’abagabo mu Iterambere ry’igihugu GMO (Gender Monitoring Office) n’Ishami ry’Umuryango w’Abibumbye rishinzwe iterambere (UNDP).

Uhagarariye UNDP mu Rwanda, Stephen Rodriques, avuga kuba abagabo n’abagore bavuka bafite uburenganzira bungana, ari cyo cyatumye bajya muri iyi gahunda kugira ngo mu bikorera abagore badakomezwa kubuvutswa.

Ati “Abagabo n’abagore, abahungu n’abakobwa bavuka bafite uburenganzira bungana ariko akenshi abagore ntibahabwa amahirwe ndetse n’uburenganzira bungana ariko ni uburenganzira bwabo. Izo ni zimwe mu mpamvu nka UNDP twahisemo kuba umufatanyabikorwa muri iyi gahunda kugira ngo abantu babe bafite uburenganzira bungana kandi bahabwe amahirwe angana.”

Rodriques avuga ko gutsikamira abagore bitarangirira aho gusa ko ahubwo bidindiza iterambere ry’igihugu.

Ati “Twabonye ko ibihugu bitera imbere ku kigero cyo hasi usanga ari nabyo bitsikamira abagore, iyo ushaka ko ubukungu bwawe butera imbere, niba ushaka kugabanya ubukene abantu bakabaho neza ugomba kubikora abagabo n’abagore babigizemo uruhare.”

Icyizere kirahari

Umugenzuzi Mukuru w’Iyubahirizwa ry’Ihame ry’Uburinganire n’Ubwuzuzanye mu Rwanda, Rose Rwabuhihi, avuga ko iyo agendeye ku byo abona mu minsi bamaze bakorana n’abikorera asanga hari icyizere ko ikigero cy’uburinganire kizazamuka cyane ko ari gahunda n’igihugu gishyigikiye.

Yagize ati “Icyizere turagifite icya mbere n’uko tuzi ubushake bw’igihugu, birazwi ko biri mu Itegeko Nshinga ry’igihugu cyacu ko abantu bose bagomba guhabwa amahirwe angana; niba hari amahirwe ntuyambuze kuko ndi umuhungu cyangwa ndi umukobwa, kubera ko igihugu cyacu kibifitemo ubushake icyo ni ikintu cya mbere gikomeye.”

Yakomeje agira ati “Icya kabiri muri iyi minsi tumaze dukorana n’Urugaga rw’Abikorera kuva kuri komite iyobora PSF n’abanyamuryango tugenda dukorana nabo nta hantu twigeze dusanga ukwinangira abantu bose barabyumva.”

Rwabuhihi avuga ko asanga ikibazo mu bikorera, hari harabuze umuntu ubahwitura ngo abereke ko ari byiza guha umugabo n’umugore, umuhungu n’umukobwa amahirwe angana, akemeza ko iyi gahunda bahuriyeho izasiga ibintu bihindutse.

Umubare w'abagore bitabira imirimo imwe n'imwe uracyari muto
Umugenzuzi Mukuru w’Iyubahirizwa ry’Ihame ry’Uburinganire n’Ubwuzuzanye mu Rwanda, Rose Rwabuhihi, avuga ko hari icyizere cy'uko no mu bikorera uburinganire buzahagera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .