Gatsibo: Imiryango yiganjemo iyirukanwe muri Tanzania yasezeranye mu buryo bw’amategeko

Yanditswe na Hakizimana Jean Paul
Kuya 19 Ukwakira 2020 saa 09:34
Yasuwe :
0 0

Imiryango 20 yiganjemo iy’abaturage birukanwe muri Tanzania mu myaka ishize batujwe mu Mudugudu w’Icyitegererezo wa Nyabikiri yasezeranye mu buryo bw’amategeko, inahabwa matera zo kuryamaho.

Ni igikorwa cyabaye kuri uyu wa Mbere, tariki ya 19 Ukwakira 2020, kibera mu Kagari ka Nyabikiri mu Murenge wa Kabarore. Cyateguwe n’ubuyobozi bw’Akarere ka Gatsibo gafatanyije n’Urwego rushinzwe kugenzura Iyubahirizwa ry’Uburinganire n’Ubwuzuzanye.

Iyamuremye Claver ufite imyaka 82 wirukanwe muri Tanzania mu 2013 yavuze ko yari amaze imyaka 58 abana n’umugore we mu buryo butemewe n’amategeko ariko ngo byagiye biterwa no kutaba ahantu hamwe kubera ubuhunzi.

Ati “Nakuriye mu Rwanda nyuma nza guhunga njya muri Tanzania, muri kiriya gihugu ntabwo twari tumeze neza, ubuyobozi bwaho ntabwo bwatwitagaho ngo dusezerane. Ubu nasezeranye kandi ndabyishimiye cyane, mfite ibyishimo pe, mu Rwanda merewe neza nahawe inka, inzu n’ibindi nkenerwa bituma ubuzima bwanjye burushaho kumera neza.”

Kanjyeyo Sarah wabanaga na Iyamuremye Claver yavuze ko ari ibyishimo bikomeye kuba na we asezeranye nyuma yo kubyara abana umunani.

Yakomeje avuga ko bibabaza gushaka ariko ugasaza ucyitwa ingaragu imbere y’amategeko bitewe no kudasezerana.

Ati “Ubu nibwo niswe umugore nyuma y’imyaka 58 nshatse, urumva ko bishimishije cyane.”

Rwamunono Steven we yafashe icyemezo cyo gusezerana nyuma yo kugera mu Rwanda agahabwa inzu yo kubamo, isambu yo guhinga n’ibindi byangombwa bikenewe byose.

Yavuze ko nk’umuntu wifuzaga gukomeza gutera imbere byari bikwiriye ko yubaka icyizere hagati ye n’umugore we bagasezerana imbere y’amategeko.

Umuyobozi w’Akarere ka Gatsibo, Gasana Richard, yavuze ko kuba iyi miryango yasezeranye imbere y’amategeko ari intambwe nziza yanafasha abayobozi kubakangurira kubahiriza gahunda za leta.

Yakomeje avuga ko muri uku kwezi bateganya kuzashyingira imiryango 300 yiyandikishije ku bushake, agaragaza ko igishimishije cyane ari uburyo ababana babanza kujya impaka ku isezerano bagiye gukora bikanabafasha kurikora babyumvikanyeho kandi bazi neza n’icyo risobanuye.

Umunyamabanga wa Leta muri Minisiteri y’Ubutabera, Amb. Solina Nyirahabimana, yashimiye imiryango yasezeranye imbere y’amategeko, akomeza avuga ko kubana n’umuntu mutasezeranye bigira ingaruka nyinshi.

Ati “Ingaruka ni nyinshi ku rwego rw’igihugu, iyo turi mu igenamigambi cyangwa mu ibarurishamibare baba bari mu irangamimerere ridahwanye n’iryanditse mu bitabo, ikindi bituma imibanire yabo itubaka icyizere cyuzuye kuko umuntu utarasezeranye aba ashobora kubivamo igihe cyose ashakiye akajya gusezerana n’undi nta nkomyi.”

Yakomeje avuga ko umugabo cyangwa umugore ubayeho muri ubu buzima adashobora gukorera urugo rwe neza bigatera ubukene mu miryango ndetse bikanatuma abantu batarukorera bikwiye.

Nyuma yo gusezerana, buri muryango wanahawe matela nshya kugira ngo inatangire kuryama ahantu heza.

Umudugudu w’Icyitegererezo wa Nyabikiri wuzuye utwaye miliyari ebyiri na miliyoni 300 Frw, ufite inzu 11 zubatswe mu buryo bw’inzu enye muri imwe; utuyemo imiryango 45 igerwaho na serivisi zirimo ivuriro, amashuri, isoko, ibibuga by’imikino, ikiraro rusange n’ibindi.

Imiryango 20 yiganjemo iyirukanwe muri Tanzania yasezeranye mu buryo bw’amategeko
Rwamunono Steven nyuma yo kurahira yavuze ko yishimiye ubuzima bwiza abayemo mu Rwanda nyuma yo kwirukanwa muri Tanzania
Umunyamabanga wa Leta muri Minisiteri y'Ubutabera, Amb Solina Nyirahabimana, yashimiye imiryango yafashe icyemezo cyo gusezerana imbere y'amategeko
Umuyobozi w'Akarere ka Gatsibo, Gasana Richard, ubwo yakiraga indahiro z'imiryango 20 yari imaze gusezerana
Ubwo basinyaga mu gitabo cy'irangamimerere nyuma yo kurahira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .