Dr Habumuremyi yasabye ko urubanza rwe ruburanishwa n’abacamanza batatu

Yanditswe na IGIHE
Kuya 16 Ukwakira 2020 saa 01:40
Yasuwe :
0 0

Dr Pierre Damien Habumuremyi ukurikiranyweho ibyaha birimo gutanga sheki zitazigamiye n’ubuhemu, yasabye urukiko ko urubanza rwe rwaburanishwa n’abacamanza batatu, kubera imiterere yarwo.

Habumuremyi wayoboraga Urwego Rushinzwe Intwari z’Igihugu, Imidari n’Impeta z’Ishimwe, akurikiranyweho ibyaha bifitanye isano na Christian University of Rwanda yari yarashinze, iheruka gufungwa.

Kuri uyu wa Gatanu nibwo urubanza rwe rwakomeje, aho yatangiye kuburana mu mizi hifashishijwe ikoranabuhanga, mu kwirinda icyorezo cya COVID-19. Yari kuri gereza afungiyemo i Mageragere, abacamanza bo bari ku cyicaro cy’Urukiko rw’Ibanze rwa Nyarugenge i Nyamirambo.

Ubwo iburanisha ryari ritangiye, uregwa yagaragaje inzitizi ko inteko iburanisha igizwe n’umucamanza umwe n’umwanditsi w’urukiko, idakwiye kuburanisha uru rubanza bitewe n’ingano yarwo, ko abacamanza bakwiye kuba batatu.

Dr Habumuremyi yashimangiye icyifuzo cyazamuwe n’umwunganira, ndetse avuga ko ari we wagitanze.

Ni ubusabe ariko batabonye kimwe n’Ubushinjacyaha, kubera ko ngo iyi nzitizi itigeze igaragazwa na mbere hose, ubu igitahiwe ari ukuburana mu mizi.

Nyuma y’impaka zamaze isaha imwe, Umucamanza yanzuye ko urubanza rusubikwa, rukazasubukurwa ku wa 30 Ukwakira 2020 hatangazwa umwanzuro ku cyifuzo cy’uregwa.

Dr Pierre Damien Habumuremyi yatawe muri yombi ku wa ku wa 3 Nyakanga 2020, aregwa ibyaha bibiri, icyaha cyo gutanga sheki zitazigamiye ku bantu batandukanye ku buryo zirenga agaciro ka miliyoni 200 Frw. Aregwa kandi icyaha cy’ubuhemu, aho bibarwa ko afite imyenda isaga miliyari 1.5 Frw.

Dr Pierre Damien Habumuremyi ubwo yari akiburana ku ifungwa n'ifungurwa ry'agateganyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .