Donald Kaberuka: Ubuzima bwo muri Kaminuza, u Rwanda nyuma ya 1994 n’ahazaza ha Afurika nyuma ya COVID-19

Yanditswe na IGIHE
Kuya 24 Kamena 2020 saa 09:54
Yasuwe :
0 0

Donald Kaberuka ni umwe mu banyarwanda bafite amateka akomeye ku ruhando mpuzamahanga nk’umuhanga mu by’ubukungu, aho yayoboye ibigo bitandukanye birimo na Banki Nyafurika Itsura Amajyambere muri manda ebyiri, ndetse ubu ari mu buyobozi bw’inama z’ubutegetsi z’ibigo binyuranye ku Isi ndetse ni intumwa y’Umuryango wa Afurika yunze Ubumwe yihariye mu kurwanya COVID-19.

Ubu Kaberuka ni Umuyobozi Mukuru w’Ikigo SouthBridge gitanga ubujyanama kuri za guverinoma no ku bikorera muri Afurika ku bijyanye n’ishoramari ndetse n’ubucuruzi.

Mu kiganiro aherutse kugirana na CNBC, Kaberuka yagarutse ku rugendo rwe kuva akiri muri Kaminuza, avuga uko yinjiye mu myanya y’ubuyobozi ndetse n’uko abona ahazaza ha Afurika nyuma y’icyorezo cya Coronavirus.

Muri iki gihe abantu 479 896 bamaze guhitanwa n’icyorezo cya Coronavirus mu gihe hafi miliyoni icumi ku Isi aribo banduye. Muri Afurika abantu 8 653 nibo bamaze gupfa mu gihe abanduye 327 465.

Avuga ko ugereranyije n’ahandi ku Isi, umugabane wa Afurika wakoze ibishoboka byose mu kurwanya iki cyorezo mu gihe usanga buri gihe iyo habaye ikibazo, amahanga yihutira kuvuga ko ariwo uzazahara cyane.

Yatanze urugero avuga ko aribyo byatekerezwaga mu gihe cya Ebola no mu 2008 ubukungu bw’Isi buri mu bibazo.

Imibare ya Banki y’Isi yo kuwa 9 Mata igaragaza ko ubukungu bwo muri Afurika yo munsi y’Ubutayu bwa Sahara, bwagizweho ingaruka na Coronavirus ndetse ko buzamanuka ku kigero cya -2.1% na -5.1% buvuye kuri 2.4% bwariho mu 2019.

Ikigega Mpuzamahanga cy’Imari ku Isi, IMF, nacyo giherutse gutanga ikigereranyo ko umusaruro mbumbe w’Isi muri uyu mwaka uzamanuka ku mpuzandengo ya -3% naho uw’ubukungu bw’ibihugu byateye imbere kurusha ibindi bumanuke ku kigero cya -6%.

Kaberuka yavuze ko muri iki gihe Isi iri guhangana n’ikibazo gikomeye cyabayeho mu mateka, aho ubukungu buri mu bibazo bikomeye. Ku ruhande rwa Afurika, avuga ko bishoboka ko hagiye kugaragara ugusubira inyuma k’ubukungu kutigeze kubaho mu myaka 30 ishize.

Ati “Nko kuri Afurika, birashoboka ko tugiye kubona ugusubira inyuma ku bukungu gukomeye mu myaka 30.”

Yakomeje avuga ko ku nshuro ya mbere ubwo Afurika yinjiraga muri iki kinyejana, ubukungu bwari buhagaze neza, ibihugu bya Afurika ubukungu bwabyo buzamuka ku kigero kirenze icyari gisanzwe ariko ubu “birashoboka ko bizasubira inyuma nk’imyaka 30”.

Ati “Icyo ni ikibazo gikomeye. Ariko uyu mugabane ufite ubushobozi bwo guhangana n’ibibazo. Twavuye mu bibazo byatewe n’izahara ry’ubukungu bw’Isi, ibyatewe na Ebola, rero ndatekereza ko ibintu bizagenda bitandukana igihugu ku kindi bigendanye n’uburyo duhangana n’icyorezo n’ubushobozi bwo gushyiraho amahame yo kuzahura ubukungu kugira ngo dusigasire ibyagezweho mu myaka 30 ishize.”

Yavuze ko ibibazo nk’ibi by’ubukungu bibaho ahubwo icy’ingenzi ari uko abantu babyitegura bagashyiraho ingamba hakiri kare, avuga ko nta muntu wari witeze ko ubukungu bwahungabana mu 2008 kimwe na COVID-19.

Yakomeje agaragaza ko uburyo ubukungu bwasubiye inyuma uyu mwaka, butandukanye n’uko byari bimeze mu 2008, kuko icyo gihe ibihugu byinshi bya Afurika bitari bifite ubushobozi bwo guhangana n’ibibazo biturutse hanze.

Yashimye ingamba zashyizweho n’imiryango mpuzamahanga hamwe n’ibihugu byibumbiye muri G20 mu gufasha umugabane wa Afurika kwikura mu bibazo by’ubukungu.

Ibibazo by’ubukungu bizaterwa na COVID-19 avuga ko bishobora kuzahombya Afurika nibura miliyari z’amadolari ziri hagati ya 40 na 70 ku mwaka ariko “gukorera hamwe byatuma tuva muri ibi bibazo”.

Ubuzima bwe bwo mu buto

Kaberuka wavukiye i Byumba mu 1951, yavuze ko ubuzima bwe mu buto ari kimwe n’ubw’abandi banyarwanda bo mu gihe cye, aho benshi byabaye ngombwa ko bahungira mu bihugu by’ibituranyi kubera ibibazo byari mu gihugu.

Ati “Si inkuru yanjye, ni inkuru y’ibihumbi n’ibihumbi by’abanyarwanda. Ndatekereza ko ryari isomo ku cyo ubutegetsi bubi muri Afurika busobanuye gusa ntabwo bikwiriye gufunga icyerekezo cyawe cy’icyo Afurika ikwiriye kuba cyo. Ni ukuvuga umugabane utekanye, uyobowe neza, ku buryo uha amahirwe abaturage bawo kugira ngo bagire uruhare mu iterambere. Rero si inkuru yanjye nihariye, ni inkuru y’ibihumbi by’abanyarwanda bo mu kigero cyanjye.”

Kaberuka ahagana mu 1970 yagiye muri Tanzania yiga muri Kaminuza ya Dar Es Salaam, aho icyo gihe benshi mu bari muri kaminuza bari abantu baharanira impinduka mu bihugu byabo.

Ati “Abantu benshi mu bice bitandukanye by’Isi, abantu benshi bagamije guhindura abandi bahuriye muri iriya kaminuza, byari ibintu byiza. Ndatekereza ko nk’umuntu wari muto, sinari kubura kuba muri icyo gice cy’abahanga.”

Yavuze ko abenshi muri bo, icyo gihe batwawe n’ibitekerezo byari mu gitabo cya Walter Rodney kivuga uburyo u Burayi bwadindije Afurika mu iterambere (How Europe Underdeveloped Africa), ati “cyari nk’igitabo kigomba gusomwa na buri munyeshuri, cyari igitabo cyiza” ku buryo cyahinduye imitekerereze ya benshi.

Mu 1997, Kaberuka yagizwe Minisitiri w’Imari n’Igenamigambi w’u Rwanda, aho yishimira kuba yarahawe uwo mwanya kugira ngo atange umusanzu we mu kubaka igihugu aho abifata nko “kwitura igihugu”.

Ubukungu bw’u Rwanda nyuma ya Jenoside

Kaberuka yavuze ko atari byo kuba hari abagereranya u Rwanda rwo mu 1994 n’u Budage nyuma y’intambara y’Isi, ahubwo ko rwo rwari rufite imiterere yarwo yihariye.

Ati “Icyo twize mu mateka y’ubukungu, ni uko uko itangiriro ryaba ribi gute, iyo abaturage bafite ubushake bwo guhindura ibintu, niba ubuyobozi n’abaturage bakorera hamwe, itangiriro ni ikintu gikomeye ariko si ryo rigena iherezo. Hari ibihugu aho itangiriro ryagaragaraga ko ari ryiza, ariko bitigeze bikora ibyo byagombaga gukora, hari n’ibindi itangiriro ryari ribi ariko byahinduye ibintu.”

“Nkunda gutekereza ko amasomo yava ku bihugu byari bimeze nk’u Rwanda y’uburyo iyo ubuyobozi bwiza, imitekerereze iboneye, gukorera hamwe, kureba kure, gushaka ibisubizo [...] ibyo bintu byose ubishyize hamwe ni byo bifasha igihugu gutera imbere.”

Kaberuka avuga ko ibihugu byose bitandukanye, ariko yishimira ko hari ababona u Rwanda nk’igihugu bakwigiraho ariko kuri we asanga nta mwanzuro umwe umuntu yavuga ko ariwo watumye u Rwanda ruhinduka ahubwo ko ari ibyemezo bihuriye hamwe.

Yatanze urugero rw’ibyo yibuka Perezida Kagame yakundaga kubasaba harimo gukorera hamwe, gutekereza kure no kwemera kubazwa ibitagenze neza aho yavuze ari ikintu gikomeye kuko gituma abaturage bumva ko ababayoboye bacunze ibyabo neza.

Mu bibazo byariho icyo gihe, harimo isura itari nziza amahanga yahaga Afurika, aho hari ababonaga ibibazo nk’ibishingiye ku moko byabaye mu bihugu bitandukanye, bakumva ko ari karande ya Afurika.

Ati “Uko u Rwanda rwitwaye muri ibi, kwari ukuvuga ngo turabireba mu buryo bwacu, turashaka ibisubizo bitubereye.”

Kuri Kaberuka, ibihugu byo hanze iteka bishobora gutanga ubufasha ku gihugu runaka ariko abaturage bo ubwabo nibo baba bafite mu biganza ahazaza h’igihugu cyabo kuba cyatera imbere cyangwa se kigasubira inyuma.

Ati “Ibyo ntibivuze ko utagomba gukorana n’abandi. Bisobanuye ko iyo ubikoze, imikoranire n’abaturanyi n’imiryango mpuzamahanga, ni ingenzi ariko bishingiye ku byo wowe washyizeho nk’inzira yawe. Kuri njye ni byo numva nifuza kubona mu bihugu bya Afurika.”

Yavuze ko hari ubwo usanga ibihugu bitekereza ko mu gihe hari ikibazo, bigomba guhanga amaso amahanga kugira ngo abibwire icyo gukora.

Donald Kabera asanga gukorera hamwe, kureba kure no kwemera kubazwa ibitagenze neza ari bimwe mu byafashije u Rwanda kuzahuka nyuma ya Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .