Depite Gasinzigwa na Dr Kalinda batorewe indi manda muri komisiyo ya EALA

Yanditswe na Rabbi Malo Umucunguzi
Kuya 24 Kamena 2020 saa 09:01
Yasuwe :
0 0

Depite Oda Gasinzigwa na Depite Dr François-Xavier Kalinda batorewe kuba abakomiseri mu Nteko Ishinga amategeko y’Umuryango wa Afurika y’Iburasirazuba, EALA, mu myaka ibiri n’igice isigaye kuri manda y’imyaka itanu y’iyo Nteko.

Kuri uyu wa Kabiri nibwo EALA yatoye abakomiseri 12 – babiri kuri buri gihugu – mu matora yabaye mu buryo bw’ikoranabuhanga mu kwirinda icyorezo cya Coronavirus. Muri ayo matora, abadepite bane bakomeje muri manda ya kabiri kuko bari no muri komisiyo yasoje manda ku wa 19 Kamena 2020.

Abongeye gutorwa barimo Oda Gasinzigwa na Dr François-Xavier Kalinda bo mu Rwanda na Dr Oburu Oginga na Wanjiku Muhia bo muri Kenya.

Tanzania yo yatanze abayihagarariye bashya, Dr Ngwaru Maghembe na Josephine Lemoyaan, u Burundi butanga Jean Marie Muhirwa na Mo Mamo Karerwa. Ni kimwe na Uganda na Sudani y’Epfo byatanze abakomiseri bashya.

Amategeko agenga imikorere ya EALA avuga ko iyo igihugu cyemeje abantu babiri gusa ku mwanya w’ubukomiseri muri iyi nteko, bihita bibarwa ko batowe, ariko iyo hatanzwe abantu barenga babiri bisaba ko hakorwa itora, rikaba mu ibanga.

U Rwanda, Kenya, u Burundi na Tanzania byemeranyije ku bantu babiri ku mwanya w’ubukomiseri, ariko Uganda na Sudani y’Epfo batanga amazina menshi, bituma hitabazwa matora.

Iyi komisiyo ni urwego rukomeye kuko rushinzwe gukurikirana no gutegura ibikorwa na gahunda by’inteko rusange, no gushyiraho abagize komisiyo zitandukanye zijyanye n’imirimo y’iyi nteko ishinga amategeko.

Iyi komisiyo kandi ni nayo igeza ku nama y’abaminisitiri abakozi bakeneye kwemezwa bafasha Inteko mu kazi kayo. Iba ikuriwe na Perezida w’Inteko Ishinga amategeko, ikanakurikirana ibijyanye n’ingengo y’imari y’inteko.

EALA ni rwo rwego rukurikirana ibijyanye n’amategeko ya EAC, igizwe n’abantu 62 barimo abadepite 54 batorwa mu bihugu binyamuryango buri kimwe kigatanga icyenda, hakiyongeraho abandi umunani bagizwe na ba Minisitiri bashinzwe EAC mu bihugu binyamuryango, Umunyamabanga Mukuru wa EAC n’Umunyamategeko w’umuryango.

Kuri uyu wa Kabiri EALA yakiriye indahiro ya Prof Nshuti Manasseh, uheruka kugirwa Umunyamabanga wa Leta muri Minisiteri y’Ububanyi n’amahanga y’u Rwanda, nk’umwe mu bagize EALA mu rwego rw’abayobozi bo mu nzego zifatanya na EALA.

Gasinzigwa yatorewe guhagararira u Rwanda muri EALA muri Gicurai 2017 ahagarariye Umuryango wa FPR Inkotanyi, kimwe na Kalinda François Xavier watanzwe n’ishyaka PSD.

Oda Gasinzigwa yatorewe gukomeza imirimo muri komisiyo ya EALA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .