Biteye agahinda: Inkuru y’umugabo wahugujwe n’umugore we arenga miliyari 1.5 Frw, akaba ari gutakambira ubutabera

Yanditswe na IGIHE
Kuya 30 Nzeri 2020 saa 08:18
Yasuwe :
0 0

Umugabo witwa Paul Ntizimira wahoze afite ubucuruzi bw’ibikoresho by’ubwubatsi n’ikinamba, ari mu gahinda gakomeye nyuma y’icyo yita guhuguzwa n’uwahoze ari umugore we akayabo karenga miliyari 1.5 Frw, yagana inkiko akabura ubutabera kubera icyo yita ‘akarengane gakabije’.

Ntizimira yashakanye na Mukamwiza Djamila mu 2008, basezerana ivangamutungo risesuye. Mu 2009, binjiye mu bucuruzi bw’ibikoresho by’ubwubatsi, bashinga ibigo by’ubucuruzi byitwa Agenda Hardware Ltd na UHURU Service Ltd.

Muri 2013, ‘Agenda Hardware Ltd’ yaje kugura inzu z’ubucuruzi ebyiri, ibifashijwemo n’inguzanyo ya banki ya KCB. Inzi ziherereye mu Karere ka Nyarugenge, zifite agaciro karenga miliyoni 600 Frw.

Mu 2014, uyu muryango waje kugura ikibanza cyegeranye n’izo nzu, ugikoresha mu bucuruzi bw’ikinamba (cyogerezwamo imidoka zikanacumbikirwamo).

Ubu bucuruzi bwa ‘Agenda Hardware Ltd’ ndetse n’ikinamba, byagenzurwaga na Mukamwiza Djamila, umugore wa Ntizimira. Uyu ni we wari ushinzwe kujya kurangura ibicuruzwa hanze y’igihugu akanabicuruza, ndetse akanamenyekanisha imisoro.

Ku rundi ruhande, Ntizimira yakurikiranaga ubundi bucuruzi bw’amakamyo atwara imizigo, nk’uko bari barabyumvikanye nk’umuryango.

Mu mwaka wa 2015, ubucuruzi bwa ‘Agenda Hardware Ltd, bwatangiye kugenda biguru ntege, kubera icyo Ntizimira yita ‘uburiganya bwatangiye kuranga umugore we’, aho byagaragaye ko yari afite izindi konti zanditse mu mazina ye bwite, yashyiragaho umutungo w’ikigo ‘Agenda Hardware Ltd’ umugabo we atabizi. Ndetse izo konti zigaragaza ko byatangiye kuva 2010.

Inyandiko z’inkiko zigaragaza ko mu iperereza Urwego rw’’Igihugu rw’Ubugenzacyaha (RIB), byagaragaye ko Mukamwiza ku giti cye yari afite konti enye, harimo n’iyanditse ku mwana wabo. Konti ebyiri muri izi, zanyujijweho amafaranga 297 200 490 Frw. Konti ya Agenda Hardware Ltd nayo yafungujwe umugabo we atabizi, yanyujijweho agera kuri 802 873 027 Frw.

Mu nkiko, Ntizimira yavugaga ko kuba izi konti zose zarafungujwe n’umugore we atabizi ari amakosa, akavuga ko ari yo mpamvu yaregeye ko uwo mutungo ungana miliyari 1 100 073 517 Frw kugira ngo ugarurwe mu mutungo w’umuryango.

Urukiko rwaje kwanzura ko nta kigaragaza ko aya mafaranga ari aya ba nyiri izi konti ariko ntirwagaragaje undi nyirayo.

Ntizimira n’abanyamategeko be bavuga ko ibi bidasobanutse, kuko izi konti zari zanditse mu mazina ya Mukamwiza n’umwana we uri munsi y’imyaka 18 (wayifungurijwe na nyina) akaba ari na we wari umuhagarariye kuri iyo konti.

Ntizimira yajuririye Urukiko rw’Ubujurire avuga ko kuba Urukiko rwisumbuye rwa Nyarugenge rwarabivuze gutyo, rwakekaga ko hari icyo byatangiwe, kuko izi konti zanditse mu mazina ya Mukamwiza Djamila wenyine, nta wundi bazifatanyije, bityo ko atumva ukuntu atari aye.

Ikindi ni uko urukiko rwakabaye rwaragaragaje undi nyirazo, bityo ngo kuba rutarabikoze ni uko nta wundi uhari, bityo ari iza Mukamwiza Djamila uzanditsweho akaba ari na we wabazwa ibyazo, cyane ko na we atazihakana.

Ibi byose ariko Mukamwiza Djamila yarabihakanye mu rukiko, akavuga ko atari byo kuko umugabo yari azi amakuru kandi yagiye abimenyeshwa. Mu myanzuro y’Urukiko Rukuru rwa Nyarugenge ku kirego cyabo, yagize ati “Yarabimenyeshejwe na banki, hari abagabo babigaragaza ndetse na Cogebanque yandikiye Agenda Hardware Ltd ndetse na Ntizimira ibiruwa ibamenyesha”.

Ntizimira yavuze ko umugore we yatwaye imitungo yari afatanyije n’uwo bashakanye, akoresheje inyandiko mpimbano yiswe icyemezo cy’ubutane, kandi ataratandukana n’umugabo bashakanye. Imitungo yatwaye ngo igizwe n’inzu ebyiri zifite agaciro k’arenga miliyoni 600 Frw.

Mu bwiregure bwo ku itariki 28 Gashyantare uyu mwaka, Mukamwiza ahakana ibyo guhimba icyemezo cy’ubutane. Yagize ati “Icyo cyemezo cy’ubutane ntabwo cyabayeho, ntabwo nigeze ngikoresha." Gusa urukiko rwaje kukimuhamya.

Usibye iki cyaha cy’inyandiko mpimbano, Urukiko Rwisumbuye rwa Nyarugenge rwanzuye ko Mukamwiza yagifatanyije n’ibindi byaha, birimo gukoresha umutungo w’urugo mu buryo bw’uburiganya, maze rumuhamya ibyaha ‘by’impurirane mbonezamugambi’.

Urukiko rwahanishije aba bombi igihano cy’imyaka itanu isubitse.

Ku ruhande rwa Ntizimira ndetse n’Ubushinjacyaha, bavuga ko ibi bihano uyu mugore n’uwo bafatanyije bahawe bidakurikije amategeko, kuko icyaha cy’impurirane mbonezamugambi “gihanishwa igihano ntarengwa cyo hejuru giteganyirijwe icyaha kirusha ibindi gukomera”.

Ntizimira yavuze ko ‘kuba icyaha gikomeye ari inyandiko mpimbano yakoreshejwe, kandi gihanishwa hagati y’imyaka itanu n’irindwi’, guhabwa imyaka itanu nayo isubitswe ari ukwica amategeko.

Yagize ati “Tubona barabahanishije ibihano bito kandi itegeko risaba ko bahanishwa igihano ntarengwa cyo hejuru giteganyirijwe icyaha kirusha ibindi gukomera, ibi rero ni byo bituma dukomeza gukeka ko hari izindi mbaraga zikoresha inkiko, ku buryo dushobora kuzimwa ubutabera mu rukiko rwajuririwe”.

Ubushinjacyaha bwajuririye uriya mwanzuro w’urukiko nabwo bwavuze ko kuba aba bombi barahanishijwe ibihano bisubitse, nyamara batarigeze babisaba mu iburanisha, ngo na byo n’ababuranyi babijyeho impaka, bidakurikije amategeko, bukavuga ko bahawe ibyo batasabye.

Ku kigendanye n’inzu, Ntizimira avuga ko kuba urukiko rwaremeje ko hakoreshejwe inyandiko mpimbano hagurishwa imitungo y’umuryango we, ndetse n’ababigizemo uruhare bakabihanirwa, urukiko rwagategetse ko izo nzu zigarurwa mu mitungo y’umuryango.

Yagize ati “Ni gute urukiko rwemeje ko yagurishije imitungo agamije kwishyura banki rukirengagiza ko byakozwe hakoreshejwe icyangombwa cy’igihimbano kandi atari abuze ubwishyu hagendewe ku mafaranga yanyujijwe kuri konti ze, nk’uko urukiko ubwarwo rwabyivugiye?”.

Yongeyeho ko “ubwo bugure budakwiye guhabwa agaciro kuko urukiko rwemeje ko bwakozwe hifashishijwe inyandiko mpimbano hagamijwe guhinduranya imitungo ikava muri Agenda Hardware Ltd, ikajya muri Activision company Ltd.”

Mu bwiregure bwe bwo ku wa 28 Gashyantare uyu mwaka, Mukamwiza Djamila ahakana ibyo gukoresha inyandiko mpimbano, kuko ngo ari we wari nyiri ikigo cy’ubucuruzi.

Yagize ati “Inyandiko mpimbano nari kuyishaka ngo imarire iki ko kampani yari iyanjye”.

Andi makosa Ntizimira ashinja Mukamwiza akomeye akaba ari nayo ntandaro y’ibibazo, ni inyerezwa ry’ibicuruzwa by’ibigo byabo, harimo ko mu mwaka wa 2015, uyu mugore yagiye mu Bushinwa, akarangura ibicuruzwa bifite agaciro karenga miliyoni 400 Frw harimo na miliyoni 118 Frw yahawe na Cogebanque mu rwego rwo kongera ibicuruzwa bya Agenda Hardware Ltd, akabizana mu izina ry’ikigo cy’ubucuruzi cyitwa ‘Tech Plus Business Solution Ltd’.

Ntwali Justin, nyir’ikigo cya Tech Plus Business Solution Ltd. yahakanye iby’uko yari aziranye na Mukamwiza mbere yo kumutiza ikigo cye cy’ubucuruzi.

Mu ibazwa rye, yagize ati “Mukamwiza Djamilla yansabye ko namutiza ikigo cyanjye cy’ubucuruzi (muha Tin number yanjye) ngo agicisheho ibicuruzwa mu rwego rwo kubihisha umugabo we ngo batazabigabana kuko bari mu rubanza rwa gatanya, ambwira ko azabyishyurira imisoro kandi ko azampa n’akazi”.

Yongeyeho ko “yigeze no kumpamagara ambuza kuzavuga ko biriya bicuruzwa byari ibye, sinzi igihe byaziye kandi nari umunyeshuri nta mafaranga nagiraga”.

Ntizimira avuga ko kuba Mukamwiza Djamilla na Ntwali Justin barakoranye biriya bikorwa ntaho bitandukaniye no gukora ubujura.

Uyu mugabo yandikiye ubugenzuzi bukuru bw’inkiko z’u Rwanda ku wa 30 Nyakanga uyu mwaka, abusaba gukurikirana ibibazo ‘akeka ko bifatanye isano na ruswa’, byagaragaye mu mikirize y’urubanza rwa mbere, kugira ngo bitazasubira mu rubanza rw’ubujurire.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .